Yaʼab máak tuklik maʼ chéen chʼaʼabil u yojéeltaʼal baʼax jaaj yéetel baʼax maʼ jaajiʼ. Techeʼ, ¿baʼax ka tuklik yoʼolal leloʼ? Yaʼab máakoʼobeʼ chéen ku jáan creerkoʼob jeʼel baʼaxakeʼ wa le baʼaxoʼob ku yaʼalik u maasiloʼ, maʼatech u jóoʼskoʼob tiempo utiaʼal u yilkoʼob wa jach jaaj. Le máaxoʼob beetik beyaʼ hasta tsʼoʼok u yaʼalikoʼobeʼ le baʼax ku beetkoʼobaʼ u kʼaabaʼeʼ posverdad. a Le tʼaanaʼ maases ku meyaj tiʼ tuláakal yóokʼol kaab teʼ kʼiinoʼobaʼ, tumen tsʼoʼok u yaʼabtal máaxoʼob aʼalik minaʼan u jaajil.

 Desde úucheʼ bey u tuukul le máakoʼoboʼ, kex walajki 2,000 añosaʼ le gobernador Poncio Pilatooʼ tu kʼáataj tiʼ Jesús: «¿Baʼax le jaajoʼ?» (Juan 18:38). Pilatoeʼ maʼ táan u páaʼtik ka núukaʼaktiʼiʼ, pero le pregunta tu beetoʼ jach importante. Le Bibliaoʼ ku yaʼalik baʼax le jaajoʼ, yéetel le baʼax ku yaʼalikoʼ jach jeʼel u yáantkoʼon ichil k-kuxtal teʼ kʼiinoʼobaʼ tumen bejlaʼeʼ yaʼab máakoʼob maʼ tu creerkoʼob wa jeʼel u páajtal u yojéeltaʼal u jaajileʼ.

¿Jeʼel wa u páajtal u yojéeltaʼal u jaajileʼ?

 Jeʼeleʼ. Teʼ Bibliaoʼ le tʼaan u jaajiloʼ ku meyaj utiaʼal u yeʼesaʼal baʼaxten jach jaaj junpʼéel baʼal wa baʼaxten maʼalob junpʼéel wa baʼax. Ku yeʼesik xaneʼ tiʼ Jéeoba b u taal le u jaajiloʼ, le oʼolal ku yaʼalaʼal ‹chúukaʼan u yóol u beet baʼax toj› (Salmo 31:5). Tsʼoʼoleʼ le Bibliaoʼ ku kaʼansiktoʼon u jaajil tu yoʼolal Dios. Ku ketik le jaaj yéetel junpʼéel sáasil ku nuʼuktikoʼon tiʼ le yóokʼol kaab jach éeʼjochʼeʼenaʼ (Salmo 43:3; Juan 17:17).

¿Bix jeʼel a wojéeltik u jaajileʼ?

 Dioseʼ maʼ u kʼáat ka a creert le baʼax ku yaʼalik le Biblia chéen tumen bey u beetik u maasiloʼ wa chéen tumen jatsʼuts a wilik le baʼax ku yaʼalikoʼ. Letiʼeʼ u kʼáat ka k-il baʼaxoʼob eʼesik jach jaaj le baʼax ku yaʼalik le Bibliaoʼ (Romanos 12:1). U kʼáat ka k-kʼaj óolte yéetel ka k-yaabilte, le oʼolal ku yaʼaliktoʼon ka k-investigart baʼaxoʼob eʼesik jach jaaj le baʼaxoʼob ku yaʼalik teʼ Bibliaoʼ (Mateo 22:37, 38; Hechos 17:11).

¿Máax aʼal le yáax tuusoʼ?

 Le Bibliaoʼ ku yaʼalikeʼ Satanás, le Kʼaasilbaʼaloʼ. Le oʼolal ku yaʼalaʼaltiʼ u «taatail le tuusoʼ» (Juan 8:44). Letiʼeʼ tu yaʼalaj tuusoʼob tu yoʼolal Dios tiʼ le yáax wíinikoʼoboʼ (Génesis 3:1-6, 13, 17-19; 5:5). Desde teʼ kʼiin jeʼeloʼ Satanáseʼ tsʼoʼok u yaʼalik tuusoʼob tu contra Dios tumen maʼ u kʼáat ka kʼaj óoltaʼak yéetel ka u natsʼuba le máakoʼob tu yiknaloʼ (Apocalipsis 12:9).

¿Baʼaxten le máakoʼoboʼ jach uts tu tʼaan u tuusoʼob?

 Le Bibliaoʼ ku yaʼalikeʼ kuxaʼanoʼon ‹tu tsʼook kʼiinoʼob›. Le oʼolal Satanáseʼ táan u yilik u tusik tuláakal máak. Yoʼolal leloʼ bejlaʼeʼ maʼ kʼaas u yilaʼal u tuus máak mix u aprovecharkuba tiʼ u maasiliʼ (2 Timoteo 3:1, 13). Tak ichil u maas yaʼabil le religiónoʼoboʼ tsʼoʼok u yaʼabtal máaxoʼob táan u tuusoʼobiʼ. Le Bibliaoʼ u yaʼalmiliʼeʼ teʼ kʼiinoʼobaʼ le máakoʼoboʼ «yaan u kaxtikoʼob máakoʼob jeʼel u yaʼaliktiʼob chéen baʼax u kʼáat u yuʼuboʼobeʼ. Yaan u xuʼulul u yuʼubikoʼob le u jaajil kaʼansajoʼ» (2 Timoteo 4:3, 4).

¿Baʼaxten jach importante ka a wojéelt u jaajil?

 Tumen le tuusoʼ ku beetik ku peʼerchajal le confianzaoʼ. Wa minaʼan confianzaeʼ maʼ tu béeytal u biskuba máak tubeel mix u múul meyaj yéetel u maasil. Le Bibliaoʼ ku yaʼalikeʼ Dioseʼ u kʼáateʼ le religión tuʼux yanoʼonoʼ ka u kaʼans u jaajil, ku yaʼalikeʼ le máaxoʼob adorartik Diosoʼ «kʼaʼabéet u adorarkoʼob yéetel le jaajil ku taal tiʼ letiʼoʼ bey xan yáanal u nuʼuktaj u espíritu santo» (Juan 4:24). Utiaʼal a wojéeltik máakalmáak le u jaajil ku kaʼansik le Bibliaoʼ, yéetel bix jeʼel a jóokʼol tiʼ le religión maʼatech u kaʼansik u jaajiloʼ ilawil le xookoʼob tu taasaj le revista «Tuusoʼob náachkuntik máak tiʼ Dios».

¿Baʼaxten Dioseʼ u kʼáat ka a kʼaj óolt u jaajil?

 Dioseʼ u kʼáat ka kuxlakech utiaʼal mantatsʼ. Chéen baʼaleʼ utiaʼal leloʼ kʼaʼabéet a kanik u jaajil tu yoʼolal letiʼ (1 Timoteo 2:4). Wa ka kanik baʼaxoʼob uts tu tʼaan, baʼaxoʼob u pʼekmaj yéetel wa ka wilik a beetik baʼax ku yaʼalikeʼ yaan a biskaba jach maʼalob tu yéetel (Salmo 15:1, 2). Utiaʼal u yáantik le máakoʼob u kʼaj óoltoʼob u jaajiloʼ, Dioseʼ tu túuxtaj Jesús way Luʼumeʼ. Le oʼolal letiʼeʼ u kʼáat ka k-beet le baʼaxoʼob tu kaʼansaj Jesúsoʼ (Mateo 17:5; Juan 18:37).

Dioseʼ yaan u xuʼulsik tiʼ le tuusoʼ

 Dioseʼ maʼ uts tu tʼaan u yilik le máaxoʼob ku tuusoʼob utiaʼal u aprovecharkubaʼob tiʼ u maasiloʼ. Letiʼeʼ tsʼoʼok u yaʼalik yaan u xuʼulsik tiʼ tuláakal le máaxoʼob ku tuusoʼoboʼ (Salmo 5:6). Le kéen u beeteʼ yaan xan u béeykuntik le promesaaʼ: «Le chiʼ ku yaʼalik u jaajiloʼ yaan u pʼáatal utiaʼal mantatsʼ» (Proverbios 12:19).