Pa wiki kaŵili, ŵa Mboni sya Yehofa akusasonganaga pa malo gawo gakulambilila gakusagakolanga kuti Nyumba ja Uchimwene. Ana kumaloga kukusatendekwa yamtuli? Soni ana kusimanikwa ku maloga, mpaka kwakamuchisye chamtuli?

•  Ana ku Nyumba ja Uchimwene kukusatendekwa yamtuli?

•  Ana ligongo chichi akusosekwa kusimanikwa pa misonganoji?

•  Yaŵechete ŵachinyamata ŵane

 Ku Nyumba ja Uchimwene gali malo gatukusalijiganya mfundo syakutyochela m’Baibulo. Misongano jajikusatendekwa kweleku mpaka jakamuchisye:

•   kumanyilila yisyesyene yakwamba Mlungu.

•   kupikanichisya ngopolelo ja yayikutendekwa masiku agano.

•   kuŵa mundu jwambone.

•    kupata achimjawo ŵambone.

 Ana akumanyilila? Malo gakusasongana ŵa Mboni sya Yehofa akusagakolanga kuti Nyumba ja Uchimwene ligongo lyakuti ndaŵi syejinji ngani syakusalijiganya kweleko, sikusaŵa syakwayana ni Uchimwene wa Mlungu.​—Mateyu 6:​9, 10; 24:14; Luka 4:​43.

 Yampaka alijiganye kweleku yichakamuchisya. Mfundo syakutyochela m’Baibulo syasikusaŵechetedwa pamisongano ja Mboni sya Yehofa, sichakamuchisya kuti ‘apate lunda.’ (Misyungu 4:5) Yeleyi yikugopolela kuti mfundo sya m’Baibulo mpaka syakamuchisye kuti asaguleje yindu mwalunda paumi wawo. Mpaka syakamuchisyesoni kupata kwanga kwa yiwusyo yakusosekwa mnope mpela yakuti:

•   Ana chakulinga cha umi chili chichi?

•   Ana Mlungu ni jwakusatendekasyaga yakusawusya?

•   Ana chikusatendekwa chichi mundu pawile?

 Pasipa pana jine mwa mitwe ja ngani syasikusaŵechetedwa pa misongano jetu ja kumbesi kwa wiki:

•   Ligongo Chichi Tukusosekwa Kujikunda Baibulo Kuti Jitulongoleleje?

•   Ana Mpaka Apate Kwapi Chikamuchisyo Mundaŵi ja Yipwetesi

•   Ana Uchimwene wa Mlungu Ukututendela Chichi Lelojino?

 “Mjangu jwa m’kalasi jwayiche ku misongano jetu. Twatemi najo yalumo mwamti twaŵalangaga yimpepe mabuku. Tuli tumalisisye, jwalakwe jwaŵechete kuti yaŵaŵechataga ŵandu pandaŵi jamisongano, yamlimbikasisye mnope. Jwalakwe jwasasilesoni kuti ku dini jakwe nganakola mabuku gakulijiganyila mpela mwayiŵelele ni m’weji.”​—Brenda.

 Ana akumanyilila? Ngakusosekwa kulipila mbiya kuti akajinjile m’Nyumba ja Uchimwene soni kwangali kwendesya mbale ja yakupeleka.

 Ŵandu ŵachachisongana nawo kumisonganoku chachalimbikasya. Baibulo jikusasala kuti ligongo line lyalikusatendekasya Aklistu kusongana pampepe lili ‘kulimbisyana mitima jwine ni mjakwe.’ (Ahebeli 10:24, 25) Kumisonganoku chakasimane ŵandu ŵakusanonyela mnope Mlungu soni kwanonyela ŵane yayili yakusoŵa mnope m’chilambochi.

 “Ndaŵi sine lisiku palikumala, ngusaŵaga jwakutenguka soni jwakupela. Nambo panjawile ku Nyumba ja Uchimwene ŵandu akusandendekasya kuti sangalaleje. Mwamti panguwuja ngusaŵa jwakusangalala. Yeleyi yikusangamuchisyasoni kuti ndande lisiku line mwakusangalala.”​—Elisa.

 Ana akumanyilila? Pachilambo chosope, pana mipingo ja Mboni sya Yehofa jakwana 120,000. Jemanjaji akusasongana mmalo gakulekanganalekangana gakupunda 60,000. Chiŵalanjilo cha ŵakusongana chikukwela mnope chaka chilichose. Yeleyi yitendekasisye kuti Nyumba sya Uchimwene chiŵandika 1,500 sitaŵidweje chaka chilichose. a