Jwachinyamata jwine jwasasile kuti, “Kuŵalanga Baibulo mpaka kuwoneche kuŵa kwakupesya naga ngawukumanyilila litala lyambone lyakaŵalanjile.”

 Ana akusaka kumanyilila yampaka atende kuti kuŵalanga Baibulo kuŵeje kwakusangalasya? Ngani ajino chijakamuchisye.

•  Ayiwoneje munganisyo mwawo yakuŵalangayo

•  Awungunyeje

•  Yaŵechete ŵachinyamata ŵane

 Aliŵanichisyeje kuti wawojo ŵapali pandaŵijo. Alinje kutenda ayi:

1.   Asagule ngani ja m’Baibulo jakusaka kulijiganya. Mpaka asagule ngani jine mu mabuku ga ngani syambone kapena ngani jilijose ja m’Baibulo jaŵajiŵalasile mwa seŵelo pa jw.org.

2.   Aŵalanje nganijo. Mpaka aŵalanje nganijo jika chinga ni achimjawo kapena ŵa mwiŵasa mwawo. Jwine mpaka aŵalanjeje mwakwimila jwakulondesya nganijo, ŵanewo mpaka ajimile ŵandu ŵane ŵakujigala nawo mbali mu nganijo.

3.   Mpaka akamulichisye masengo matala gakuyichisyaga:

   •   Ajambule yiwulili ya yindu yayikutendekwa mu nganijo. Kapena yakulosya yindu yayatendekwe pandaŵi jine jakwe. Mpaka alembe maloŵe gakulondesya yayikutendekwa mbali jilijose ja nganijo.

   •   Ajambule yiwulili. Mwachisyasyo, pakuŵalanga ya mundu jwine jwakulupichika, mpaka ajambule chiwulili cha mundujo ni kulembaga ndamo syaŵakwete, soni majali gaŵapochele.

   •   Ajilembe nganijo mpela kuti jikutendekwa. Pakusaka kujisala nganijo, mpaka akamulichisye masengo matala gakulekanganalekangana. Mpaka atende yeleyi “mwakuwusya ŵandu” ŵakusimanikwa mu nganijo soni ŵane ŵaŵayiweni yeleyi yili mkutendekwa.

   •   Naga jumo mwa ŵandu ŵa munganijo ŵasagwile yindu mwakulemwecheka, aganichisye yakatesile kuti yindu yimjendele chenene. Mwachisyasyo aganichisye ya Petulo juŵamkanile Yesu. (Maliko 14:66-​72) Ana jwalakwe akatesile yamtuli kuti atende yindu mwalunda?

   •   Naga akwete umanyilisi ŵakupanganya ngani, alinje kulemba sewelo pakujigalila yaŵalasile m’Baibulo. Pakulemba sewelojo, akusosekwa kupwatikaposoni yindu yakulijiganya pa nganijo.​—Aloma 15:4.

 Naga akuwungunya chenene ya ngani jine jakwe, mpaka amanyilile yindu yine yakusisika. Ndaŵi sine maloŵe gamo kapena gaŵili ga m’Baibulo pa ngani jine, mpaka gaŵe gakamuchisya mnope kujipikanichisya nganijo.

 Mwachisyasyo awanichisye yayili pa Mateyu 28:7 ni ya pa Maliko 16:7, (Malangano ga Sambano 1992 Edition)

•    Ligongo chichi Maliko pakulemba yakuti Yesu ŵawonechele kwa ŵakulijiganya ŵakwe, jwasasilesoni kuti “ni Petulo”?

•  Mfundo jakamuchisya: Maliko nganayiwona ni meso gakwe yindu yeleyi yili mkutendekwa, nambo ŵayipikene kutyochela kwa Petulo.

•  Mfundo jakusisika: Ligongo chichi Petulo paŵapikene kuti Yesu ŵasakaga kuwonegana ni jwalakwe yamlimbikasisye mnope? (Maliko 14:66-​72) Ana Yesu jwatesile yamtuli yakulosya kuti Petulo jwaliji mjakwe jusyesyene? Ana m’weji mpaka tusyasye chamtuli chisyasyo cha Yesu mwakuŵa paunasi usyesyene ni achimjetu?

 Pakuyiwona yakuŵalangayo munganisyo soni kuwungunya mfundo sine, ni kuti kuŵalanga Baibulo kwawo kuchiŵa kwakusangalasya soni kwakamuchisya.