ROMNHIHÖDÖ 7
E Marĩ hã Höimanaꞌuꞌö Nhimiꞌmadö.
1. E marĩ hã Höimanaꞌuꞌö Nhimiꞌmadö.
E marĩ wa Jesus Rotiꞌwa danhipai u ĩwẽ.— MARCOS 1:40-42.
Höimanaꞌuꞌö Nhimiꞌmadö rotidzé höiwa ãma. Te dza ãma adzaprĩ aihĩni rotiꞌwa norĩ hã duré te dza ãma uwaimra Höimanaꞌuꞌö te te tsima ĩwẽdzé hã watobro da höiwa ãma Tiꞌai ãma dzama. Romahörö wẽ norĩ hã Höimanaꞌuꞌö Nhimiꞌmadöꞌö na hã ĩwẽ uptabi dzaꞌra. Romhutu na, Ĩtsimiꞌmadö te dza ãma uwaimra dama tsô ĩrowaptöꞌödzé hã rotiꞌwai wẽ dzô. Te dza datsiꞌrãꞌõtõ dzaꞌra Tiꞌai mono bö.—Tsõré na 1 Coríntios 15:24, 25; Efésios 1:9, 10; Mateus 24:14.
Rotidzéb ꞌremhã rotiꞌwa ĩré hã. Jeová ma tô pitsutu Tiꞌra, Jesus, Rotiꞌwa da hã Tinhimiꞌmadöꞌö ꞌremhã.—Tsõré na Apocalipse 11:15.
ꞌMadöꞌö ĩropodo E marĩ hã Höimanaꞌuꞌö nhimirobꞌrudzé.
2. E marĩ wa Jesus Rotiꞌwa hã danhipai u ĩwẽ.
Höimanaꞌuꞌö ꞌra hã Rotiꞌwa ĩwẽ danhipai u uptabi tsimidzawi wẽ wa duré ĩbö hã te te ꞌre ꞌmadöꞌö mono wa. (Mateus 11:28-30) Taha nhipai u, tinhiptete uptabi ré hã, te dza te te ꞌre roti duré te dza te te ꞌre dapawapto. Höiwaꞌutu parimhã, höiwa u ma tsaiꞌu, duré ma tô ꞌre tsãmra Höimanaꞌuꞌö nhimire niwĩ ꞌre tsimipari mono tsina. (Hebreus 10:12, 13) Taha parimhã, Höimanaꞌuꞌö ma tô tãma anho ĩtsiptetedzé hã te te ãma tsãnaꞌrata da Rotiꞌwa na.—Tsõré na Lucas 1:31-33.
3. E ꞌwa te dza Jesus tsiré roti.
Höimanaꞌuꞌö ma dapitsutu daꞌubumro daꞌumro na da te ꞌre roti dzaꞌra mono da Jesus tsiré höiwa ãma. (Apocalipse 5:10) Ĩpitsutu morĩꞌrata norĩ hã apóstolo ĩtsimirẽmeꞌõ norĩ hã Jesus te. Dzahadu Jeová te te ꞌre dapitsutu mono, piꞌõ duré aibö, rotiꞌwa dzaꞌra da. Jesus tsine, te dza höiwaꞌutu dzaꞌra ni dahöiba tsamriꞌõ na.—Tsõré na Apocalipse 14:1-3; 1 Coríntios 15:42.
E niha ĩhöiba uburé hã te dza aiꞌabaꞌré höiwa u hã. Jesus te tinha ‘ĩꞌumrore dzaꞌra na’. (Lucas 12:32) Ĩꞌrãtsutu na, õ norĩ hã dza 144 mil duré te dza Tiꞌa te te ꞌre roti dzaꞌra Jesus tsiré.—Tsõré na Apocalipse 14:1.
4. E marĩ ma watobro Jesus roti na te te ãma tsãnaꞌrata wamhã.
Höimanaꞌuꞌö Nhimiꞌmadö ma ãma tsãnaꞌrata roti na 1914 na. * Ĩmorĩꞌrada, Rotiꞌwa na, Jesus ma tô robꞌru Satanás ma duré waꞌuburé norĩ ma Tiꞌai u. Satanás ma tô tidzahi petse duré ma ãma tsãnaꞌrata te te dama ꞌre ĩrobꞌmanharĩ mono dzé Tiꞌai mono bö. (Apocalipse 12:7-10, 12) Ta hawim haré, dama ropire hã ma tô tidzaꞌẽtẽ petse. Datsiꞌwapé hã, mra hã, dahödzé hã duré tiꞌai popo hã te watsuꞌu dzaꞌra romhutu na Höimanaꞌuꞌö Nhimiꞌmadö dza te te ĩroti tsirõmo Tiꞌai ãma wahuré.—Tsõré na Lucas 21:7, 10, 11, 31.
5. E marĩ Höimanaꞌuꞌö Nhimiꞌmadö te dza ãma uwaimra.
Romhuri hawi dama rowahutu na Bíblia na Tiꞌai mono bö, Höimanaꞌuꞌö Nhimiꞌmadö te oto ꞌre datsiꞌrãꞌõtõ daꞌahö uptabi na dapoto mono bö. Aibö duré piꞌõ ahö uptabi na te ꞌre poꞌre petse dzaꞌra Jesus Rotiꞌwa na. Höimanaꞌuꞌö Nhimiꞌmadö te dza ꞌmadöꞌö dzaꞌra te te daꞌaꞌuprotsi wamhã dawatsété norĩ hã Tiꞌai ãma. Ãne, aihĩni te te tsima ꞌre ĩwẽ dzaꞌra mono norĩ hã te te ãma tsima rowẽ dzaꞌra da Höimanaꞌuꞌö Nhimiꞌmadöꞌö na hã, ꞌre ĩpoꞌre petse dzaꞌra mono da tsi Jesus Rotiꞌwa na.—Tsõré na Apocalipse 7:9, 10, 14, 16, 17.
Mil wahub ꞌremhã, Höimanaꞌuꞌö Nhimiꞌmadö te dza ãma uwaimra daꞌãma ĩtsimirotsaꞌrada hã robnaꞌrata hawi. Tiꞌai wahuré hã dza rowẽ uptabi di. Tawamhã, Jesus apö te dza Timama ma Ĩtsimiꞌmadö titsõ. (1 Coríntios 15:24-26) E ꞌwai ma, te atsima ĩwẽ Höimanaꞌuꞌö Nhimiꞌmadöꞌö na hã robdzanhamri da.—Tsõré na 2 Pedro 3:13.
^ romnhihötö waˈõno 6 Awaihuꞌu da Bíblia te te ĩnharĩdzém na wahum na 1914 na, ꞌmadöꞌö ĩwaꞌõtõ nhihötö norĩ hã 215-218 ĩhöiwarobo na O Que a Bíblia Realmente Ensina? waradzu mreme na.
