Apocalipsi 11:1-19
11 Tawamhã ma tô ĩma sõmri ni, wedehu waré ne hã marĩ pibuzé hã. Tawamhã ꞌRe ihâimana uꞌâsi mono hã ma tô ĩzatõ, ãne:
— Mo oto aimorĩ tiꞌai ãma ĩnhorõwa u, wedehu waré ne na, ꞌri hã pibui mono da, duré ĩma danhoprubzé nomrizé hã pibui mono da, wedeza ne hã, danhimizama da te ĩma ꞌre izata zaꞌra mono zé hã. Maꞌãpé duré ĩnhorõwa ãma, ĩꞌãma ꞌre idawata zaꞌra mono norĩ hã saꞌrata zaꞌra na.
2 Tane nherẽ, ꞌri ꞌwawi waꞌra ꞌre, ꞌri nhoꞌremhã pibui mono õ di za. Ta hã wa tô pisutu, ĩnhibꞌaꞌuwẽꞌõ norĩ si te te iwa ꞌre ubumroi mono da. Ta norĩ hã niwapsi te za Zeruzalẽ ãma hã ꞌri nhoꞌu iwẽ uptabi ãma hã daꞌãma aiꞌuté zaꞌra. Tahawa, te za te te sina dawasi zaꞌra. 42 na aꞌamo ihâimana u te za te te daꞌãma rowamnarĩ zaꞌra, 1.260 na bâdâ za daꞌãma isiꞌutõrĩzéb u.
3 Taha ré, wa za ĩzadawa wasuꞌuꞌwa norĩ hã satõrĩ zahuré, tô 1.260 na bâdâ isiꞌutõrĩzéb u simiꞌẽ na te te ĩzadawa wasuꞌu zahuré mono da. Tawamhã poneꞌẽrebâ zéré ꞌmanharĩ na uza wasété ré, te za tineb zahuré, pẽꞌẽzé uptabi zahuré wa, da te dasiwi ꞌre ĩwẽꞌõ pese zaꞌra mono wa.
4 Ã norĩ hã azeitona wede ne, te duré ꞌre hâimana zahuré, iꞌrãi waꞌui wabre hã iroꞌo pese ne, simiꞌẽ na te te dama ꞌre sadawa wasuꞌu zahuré mono wa. Robꞌuiwẽzém ne, te duré ꞌre hâimana zahuré, ꞌRe ihâimana uꞌâsi mono zadawa wasuꞌu na te te dama ꞌre robꞌuiwẽ zahuré mono wa. Uburé Danhibꞌapito nhoꞌa te ꞌre simaꞌwara zahuré.
5 Tawamhã niꞌwa hã te te tãma robꞌmanharĩ wasété zahuré da nherẽ, te za tizadaiꞌré hawi unhama roꞌo na wĩrĩ zahuré. Ãne na te za siꞌutõrĩ isitobꞌru norĩ hã, te te tãma ꞌre robꞌmanharĩ wasété zaꞌra mono da nherẽ.
6 Tawamhã ꞌRe ihâimana uꞌâsi mono zadawa ꞌmahârâꞌwa norĩ hã isimipawapto waihuꞌu pese zém na te za hâiwa pese zahuré, tã taꞌa tõ da, te te dama sadawa wasuꞌu zahuré mono sina. Duré te te waihuꞌu pese zahuré di, te te iꞌâwapru zahuré da hã, duré te te sima iwẽ zahuré zéb zarina, tiꞌai ma, te te nasi iꞌarobꞌmanharĩ wasété zahuré da hã. ꞌRe ihâimana uꞌâsi mono u, dawasété wi ꞌre dasipizari zaꞌra mono da, te za ãne te te dama arobꞌmanharĩ zahuré.
7 Tawamhã te te sadawa wasuꞌu zahuré mono pari, te za ropoto siwamnarĩ hã abꞌre ꞌrehâ hawi iwatobro hã sô tisusi zahuré, te te ꞌwapé zahuré da. Tawamhã ropoto siwamnarĩ hã aibâ norĩ ma, siptete zahuré wa, te za pãrĩ zahuré.
8 Tawamhã ꞌri nhiꞌriti ꞌre zaꞌẽtẽ ãma, te za taré ihâiba hâ hã tizaꞌwari zahuré, ꞌri nhoꞌõmo zaꞌẽtẽ ãma, wede nhonhiꞌrãmi na Isibꞌapito zaꞌra, da te dasiwi iwĩrĩzém nhoꞌõmo ãma, dama isaꞌrese zaꞌẽtẽ ãma. Sodoma na ꞌri nhoꞌõmo nhisi ãma, ꞌre idahâimana wasété zaꞌra mono ne, ã ꞌri nhoꞌu hã. Duré Ezitu na romnhisi ãma ꞌre idahâimana wasété zaꞌra mono ne hã, ã ꞌri nhoꞌu hã. Ãne ꞌri nhoꞌõmo zahuré na ãma isimiréꞌézé hã, Zeruzalẽ hã.
9 Tawamhã daꞌahâ uptabi na te za itẽme ubumro zahuré ni, ihâiba hâ hã da te dasiwi ꞌmadâꞌâ zahuré da, ꞌri nhiꞌriti saꞌwari ré. Siꞌubdatõ bâdâ ine wãiwab u, te za dapoto mono bâ dasiwi ꞌmadâꞌâ zahuré ni, damreme sipoꞌo mono bâ, ꞌre idahâimana zaꞌra mono hã. Te za duré ãma tasiꞌuwati zaꞌra ni, da te dasiwi za tõ da.
10 Tawamhã tiꞌai ãma daro mono bâ ꞌre idahâimana wasété zaꞌra mono norĩ ma hã rowẽ zaꞌra di za, isadawa wasuꞌuꞌwa norĩ hã dâꞌâ zahuré wa. Tahawa, te za ꞌre dato zaꞌra. Te za duré danhibzari na tasisawi zaꞌra ni. Isadawa wasuꞌuꞌwa norĩ hã dawasété wi ꞌre dasipizari zaꞌra mono da, te te dama ꞌre ropipa zahuré mono ré, dâꞌâ zahuré wa, te za ꞌre dato zaꞌra.
11 Tawamhã siꞌubdatõ bâdâ, ãma ineb zahuré zé wãiwa pari, te za ꞌRe ihâimana uꞌâsi mono hã ipẽꞌẽzani hã apâ tãma sõmri zahuré, hâiba ré ꞌre neb zahuré da apâ. Taha pari, te za oto hâiwi aimaꞌwara zahuré. Simaꞌwara zahuré wamhã, te za tãma tapẽꞌẽwara zaꞌra ni, da te iꞌmadâꞌâ zaꞌra norĩ hã.
12 Tawamhã ꞌRe ihâimana uꞌâsi mono zadawa ꞌmahârâꞌwa norĩ hã te za wapari zahuré, hâiwa hawi niꞌwai mreme hã. Mreme ꞌrãihâ na te za sô tihârâ zahuré, ãne:
— We ane waꞌaba, hâimo.
Tawamhã iꞌruiwapariꞌwa norĩ hã te te ꞌmadâꞌâ zaꞌra mono ré, te za hâiwaꞌa na tizasi zahuré, hâiwa u.
13 Tawamhã zasi zahuré wi, awaꞌawi te za saꞌẽtẽ uptabi tiꞌa sãsã hã watobro. Watobro wamhã, ꞌri hã nima norĩ hã te za sina, Zeruzalẽ ãma, ꞌri nhoꞌõmo ꞌremhã ꞌre isimasa mono hã. 10 na ꞌri ꞌmaihâimana wamhã, te za misi si dawi rereꞌe. Te za duré 7 miu na tadâꞌâ zaꞌra ni, tiꞌa sãsãꞌã na hã. Tawamhã dadâꞌâ ãna idasiꞌatarẽme mono hã te za tapahi uptabi zaꞌra ni. ꞌRe ihâimana uꞌâsi mono ãma te za tawata zaꞌra ni, hâiwa ãma ꞌre isãmra mono ãma, simiꞌmanharĩ waihuꞌu pese uptabi wa.
14 Tawamhã ropipa hã maparane ipu hã tâibâ oto. Tane nherẽ, zahadu siꞌubdatõ ãma zô, te rowaptâ. Romhuture di oto, duré ropipa iwatobro da hã. Maꞌãpé ãne waihuꞌu pese zaꞌra waꞌaba.
7 ãma hâiwa ãma romhuriꞌwa hã tinhimnhihârâzém na isimnhihârâzé wasuꞌu
15 Tawamhã 7 ãma hâiwa ãma romhuriꞌwa hã ma tô tinhimnhihârâzém na amnhihârâ. Simnhihârâ wi, hâiwa ãma damreme ꞌrãihâ hã wa tô wapa. Ãne te nharĩ zaꞌra:
— Satanasihi nhimiꞌmadâ, ꞌre danomro mono da, ma tô da te dasima ꞌre wẽ zaꞌra aré, daro mono bâ. Tane nherẽ, ropâ te za oto ꞌRe ihâimana uꞌâsi mono nhimiꞌmadâꞌâ si ꞌre danomro, Wanhibꞌapito nhimiꞌmadâ hã. Danhoꞌreptuiꞌwa da, te te ipisutu nhimiꞌmadâꞌâ zama te za ꞌre dahâimana zaꞌra oto. Wanhibꞌapito hã te za tô te te ꞌre daꞌabꞌmadâꞌâ uꞌâsi oto, õne uꞌâsi.
16 Tawamhã 24 na dama ipire zaꞌra norĩ hã ꞌRe ihâimana uꞌâsi mono nhoꞌa tisimasisizém na isiꞌubumro norĩ hã ma tô hiꞌrãtitõ tãma ana, ãma wata zaꞌra da.
17 Ãne te ãma tiwata zaꞌra:
“Uburé Danhibꞌapito uptabi, ꞌRe ihâimana uꞌâsi mono, a hã danhipai u asiptete uptabi di. Duréihã marĩ õ ré hã, te ꞌre aihâimana uꞌâsi mo. Aiꞌutõrĩ waihuꞌu õ di. Õne uꞌâsi te ꞌre aihâimana mo. A hã aiwaihuꞌu pese zé hã, duré danhipai u asiptetezé hã ma tô oto dama ihâiꞌré, da te oto ꞌre ꞌmadâꞌâ zaꞌra mono da. Taha zarina ma tô oto danhipai u daꞌmadâꞌâ pire na ãma isãnaꞌra, ãhã na hã. Tahawa, wa aiꞌãma wawata zaꞌra ni.
18 Aiꞌãma ꞌre idawata zaꞌra mono õ norĩ hã ma tô asada tizahi pese zaꞌra. Tahawa, ma tô oto iwa waptãrã, asiwi idaꞌawẽꞌõ pese zéb zarina, dama irobꞌmanharĩ wasété zéb da hã.Ma tô duré iwa waptãrã, dahâimanazéb zarina dama iꞌarowairébézéb da hã, uburé adâꞌâ norĩ ma hã, asimiroti hã te te ꞌre iwapari zaꞌra mono õ norĩ hã uburé ꞌre ahâ zaꞌra mono da, duré uburé asimiroti wapari pese ꞌwa norĩ ma, tãma ꞌre abꞌmanharĩ wẽ mono da.Ma tô iwa waptãrã, asadawa wasuꞌuꞌwa norĩ ma, marĩ iwẽ hã ꞌre anhomri mono da, te te aima ꞌre iromhuri pese zaꞌra mono zé waꞌrãmi. Uburé pese asibꞌaꞌuwẽ norĩ ma, marĩ iwẽ hã ꞌre anhomri mono da, ma tô iwa waptãrã, aiꞌãma ꞌre iwata zaꞌra mono norĩ ma, dama ipire norĩ ma, dama iwapu norĩ ma zama.Ma tô duré iwa waptãrã, tiꞌai ãma da te ꞌre irowasété zaꞌra mono norĩ hã uprosi da.”
19 Tawamhã hâiwa ãma ꞌRe ihâimana uꞌâsi mono nhorõwa ꞌri ãma hã, ma tô niꞌwa hã ꞌridawa hã ꞌridawa. Te te ꞌridawa wamhã, te oto wedehâꞌre hã sõꞌawi ꞌri para za. Wedehâꞌre ꞌre, te ẽtẽpo iꞌuiꞌéré ré hã daꞌwa, duréihã ꞌRe ihâimana uꞌâsi mono te te tinhibꞌaꞌuwẽ ma iropisutuzéb uiꞌéré ré hã. Tawamhã ma tô tãiwapsa hã watobro, tãirãrãꞌã zama, tãsiꞌubuzi zama. Tiꞌa hã ma tô duré sãsãꞌã. Tãzâ hã ma duré asaꞌwa, ipire hã.
