Apocalipsi 12:1-17
12 Tawamhã wa tô duré ꞌmadâ. Te ꞌmadâꞌâ wamhã, marĩ hã ma tô hâiwa nhoꞌre na sihâiꞌré, dama isaꞌreseꞌõ hã, ãma ꞌre idatobꞌuzu zaꞌra mono hã. Ta hã dama iwaihuꞌuꞌõ hã wa tô ꞌmadâ, piꞌõ isa hã. Bâtâ roꞌo ne na iꞌuza hã. Ipara ꞌrowimhã aꞌamo te za. Duré ꞌrãzaza ré te za. Iꞌrãzaza na hã wasi te aimasa, 12 na.
2 Iꞌra te duré ãma sépu, piꞌõi ãma. Ãma sépuꞌu wa, te hâzé te, ꞌre sadari.
3 Tawamhã ma duré marĩ hã sihâiꞌré, hâiwa nhoꞌre na, marĩ isaꞌreseꞌõ hã. Hoꞌorã hâiba ne ropoto siwamnarĩ hâiba zaꞌẽne hã te za. Ihâiba hã ihâiba pré. Duré 7 na iꞌrã hã. 10 na duré iꞌu hã. Powawẽ õmo ne, iꞌõmo zaꞌra hã. Duré 7 na iꞌrãi mono bâ iꞌrãzaza hã, danhibꞌapito ꞌrãzaza ne hã. Iꞌrãzaza siꞌubuzi na iꞌrãzaza zaꞌra hã.
4 Tawamhã tizamo na ma tô wasi hã waibu, hâiwa ãma ꞌre isimasa mono hã. Ahâ uptabi prã na ma tô waibu, isaꞌratazé wãiwa prã na. Tawamhã te te waibui wamhã, tiꞌai u ma tô saꞌẽtẽ sãmra.
Tawamhã piꞌõ nhoꞌre te za, hoꞌorã hâiba ne ropoto siwamnarĩ hã. Piꞌõ te sapa iꞌra zô, waptãꞌã wi te te ꞌrẽne da.
5 Tawamhã ma tô tãma waptãrã aibâ na, simiwadaꞌuri nhiptete na za daro mono bâ te te ꞌre idaꞌawadaꞌuri mono da hã. Tawamhã ma tô tiwi âri ni, ꞌRe ihâimana uꞌâsi mono u, danhibꞌapito simasisizém na ꞌre isãmra mono u, isiré danhibꞌapito na ꞌre hâimana mono da.
6 Tawamhã hoꞌorã hâiba ne ropoto siwamnarĩ wi, te piꞌõ wara, aꞌubuni u, ꞌRe ihâimana uꞌâsi mono te te tãma iropese siromo zéb u, te te tãma ipisutuzéb u. Tame hâimana mono ré, te za 1.260 na bâdâ ihâimana u te te ꞌmadâꞌâ, ꞌRe ihâimana uꞌâsi mono hã.
7 Tawamhã dasiꞌwapé, hâiwa nhoꞌre ãma ma tô watobro. Hâiwa ãma romhuriꞌwa hã Migueu na isisi hã, duré hâiwa ãma isiré tãma iromhuriꞌwa norĩ hã, te hoꞌorã hâiba ne ropoto siwamnarĩ hâiba zaꞌẽne hã siwi ꞌwapé. Tawamhã hoꞌorã hâiba ne ropoto siwamnarĩ hã ma tô sina ana, hâiwa ãma tãma iromhuriꞌwa norĩ me.
8 Tane nherẽ, ma tô Migueu norĩ hã ãma aiꞌuté zaꞌra. Tahawa, hâiwa ãma ꞌre hâimana waihuꞌu zaꞌra mono õ di za oto.
9 Tawamhã hoꞌorã hâiba ne ropoto siwamnarĩ hã ma tô siwi time tiꞌai u, apâ morĩ tõ da. Ta hã Satanasi, wanhitobꞌru. Ta hã duréihã wahi na isihâiba. Uburé tizadawa nhipese na te te ꞌre idaꞌaꞌrãmi mono, ꞌRe ihâimana uꞌâsi mono zadawa para newa, tiꞌai ãma daro mono bâ. Tawamhã waꞌuburé norĩ zama isibꞌaꞌuwẽ zama ma tô isiré siwi sãmra tiꞌai u, apâ siꞌabaꞌré tõ da.
10 Tawamhã wa tô duré niꞌwai mreme hã wapa. Mreme ꞌrãihâ na te tinha:
— ꞌRe ihâimana uꞌâsi mono hã ma tô oto waꞌanhoꞌreptuzém na wama ãma uwaimra, wanhitobꞌrui wi. Danhibꞌapito na siptete na te te ꞌre idaꞌabꞌmadâꞌâ mono zé hã ma tô duré dama hâiꞌré oto. Duré Danhoꞌreptuiꞌwa da, te te ipisudu hã te duré isiré te te ꞌre daꞌabꞌmadâꞌâ oto, waihuꞌu pese na. Wasiré isazeiꞌwai ãma, awẽ sidâpâsi simizazâri ãna iwasédé hã te te ãma ꞌre iꞌazaꞌra mono hã ma tô oto ꞌRe ihâimana uꞌâsi mono hã sihawi time hâiwa hawi, tiꞌai u, Waꞌuburé hã.
11 Poneꞌẽrebâ hã dazada idâꞌâzéb zarina, ma tô wasiré isazeiꞌwa norĩ hã ãma aiꞌuté zaꞌra, Satanasihi ãma. Iwasuꞌuwẽ hã sena na te te dama ꞌre isadawa wasuꞌu zaꞌra mono zém na zama, ma tô ãma aiꞌuté zaꞌra. Duré da te ꞌre ꞌruiwapari zaꞌra mono wa, dawi ꞌre sihâiba zawi zaꞌra mono õ di, ꞌre dâꞌâ tõ zaꞌra mono da. Tahawa, ꞌRe ihâimana uꞌâsi mono wi sipizari ãna, ma tô duré Satanasihi ãma aiꞌuté zaꞌra.
12 Tahawa, maꞌãpé ꞌre ato zaꞌra waꞌaba mono, hâiwa ãma ꞌre aihâimana zaꞌra waꞌaba mono norĩ hã. Tane nherẽ, tiꞌai ãma ꞌre aihâimana zaꞌra waꞌaba mono norĩ hã aima ꞌre ropipa uptabi zaꞌra waꞌaba mono di za, â poré na ꞌre aihâimana zaꞌra waꞌaba mono norĩ ma zama. E marĩ wa. Waꞌuburé hã sahi uptabi na atẽme morĩ aba na dâꞌâsina, tiꞌai u. Tiꞌai ãma te te aima ꞌre robꞌmanharĩ wasété zaꞌra waꞌaba mono da, za ꞌre ihâimana hutu mono zém na te te sina waihuꞌu wa, ma tô tizahi pese. Tahawa, aima ꞌre ropipa uptabi zaꞌra waꞌaba mono di za.
13 Tawamhã hoꞌorã hâiba ne ropoto siwamnarĩ hâiba zaꞌẽne hã hâiwa hawi da te ime na siwaihuꞌu wamhã, ma tô piꞌõ zarina ꞌre mo, aibâ na iꞌra tãma iwaptãꞌã zarina.
14 Tane nherẽ, ma tô siꞌõmo wawẽ paihi hã isaripi ré hã piꞌõi ma za ni, aꞌubuni u ꞌre isãmra mono zéb u, ãma wara da, tô õme, ꞌRe ihâimana uꞌâsi mono te te tãma iropese siromo zéb u. Tame te za ꞌRe ihâimana uꞌâsi mono hã te te ꞌre ꞌmadâꞌâ, siꞌubdatõ wahum nhipai u wãiwa, hoꞌorã hâiba ne ropoto siwamnarĩ wi.
15 Tawamhã hoꞌorã ne hã ma tô â hã tizadaiꞌré hawi saꞌwa piꞌõ zarina, â pré da, â te te ꞌmapraba da.
16 Tane nherẽ, tiꞌa hã ma tô piꞌõi ãma aime. Tiꞌa hã ma tô siꞌridawa, â zô, â hã iwa aꞌa da. Tawamhã ma tô â hã iwa tiꞌaꞌa tô, hoꞌorã hâiba ne tizadaiꞌré hawi piꞌõ zarina te te isaꞌwari hã.
17 12:17-18 Tawamhã hoꞌorã hâiba ne ropoto siwamnarĩ hã ma tô piꞌõ da tizahi pese, tiwi simani wa. Tahawa, ma tô isihudu norĩ zô mo, te te ꞌwapé zaꞌra da. E ꞌwam norĩ hã te wasuꞌu, isihudu norĩ hã. Ta norĩ hã ꞌRe ihâimana uꞌâsi mono nhimiroti te te ꞌre iwapari pese zaꞌra mono, duré tô sena na Zezusihi zazeiꞌwa na ꞌre isiwasuꞌu zaꞌra mono, te wasuꞌu. Ta norĩ zô te mo, hoꞌorã hâiba ne ropoto siwamnarĩ hã te te ꞌwapé zaꞌra da. 18 Tawamhã te oto ta hã â poré zaihâ na za, suparaꞌré wa.
