Apocalipsi 5:1-14
5 Tawamhã wa tô duré ꞌmadâ, ibaihâ isinhai ré hã. Danhibꞌapito simasisizém na isãmra hã te tinhibꞌrata nhimire niwĩ tété. Ibaihâ nhinha hã, iꞌuiꞌéré siꞌuiwa ré hã. Duré 7 na ihâiba hã iꞌuptob ré hã siwasihu tõ da, niꞌwa te te duré sõré tõ da hã.
2 Tawamhã wa tô duré ꞌmadâ, hâiwa ãma ꞌRe ihâimana uꞌâsi mono ma romhuriꞌwa, isimiwadaꞌuri pire hã. Ãne te nasi anha ta hã, mreme ꞌrãihâ na:
— E ꞌwa hã danhipai u iwẽ uptabi, duré iwaihuꞌu pese uptabi hã te za 7 na ibaihâ nhinha uptobzé hã prub zaꞌra, ibaihâ te te sõꞌa da. E ꞌwa hã te ãhã da hã sada tihâiba.
3 Tane nherẽ, niꞌwa hã sada hâimana õ di hâiwa ãma hã, ipruꞌwa da hã, te te pru wa, ibaihâ nhoꞌaꞌwa da hã, duré te te isõré da hã. Duré tiꞌai ãma ꞌre idahâimana zaꞌra mono hã sada daꞌmaihâimana õ di. Duré tiꞌai ꞌrowi adâ ꞌre ihâimana zaꞌra mono hã niꞌwai õ di, sada hã.
4 Tahawa, wa tô saꞌẽtẽ aiwaꞌõ, ꞌre idahâimana zaꞌra mono hã sada daꞌmaihâimana õ wa, ipruꞌwa da hã, duré te te isabu da hã.
5 Tawamhã 24 na dama ipire norĩ te misi ĩma tinha, ãne:
— Aiwaꞌõ tõ. Maꞌãpé ꞌmadâꞌâ. Õhõta te za, huꞌu zérépa, Zudaha nhihudu. Ta hã apito Dawihi nhihudu, za isine pire na te te ꞌre idaꞌabꞌmadâꞌâ mono da hã. Ta hã uburé dama waihuꞌu pese uptabi di. Ta hã tinhitobꞌru norĩ nhimiromhuri wasété nhiptetezé hã ma tô tiwi uprosi zaꞌra. Tahawa, te õhõ si sada tihâiba, 7 na iꞌuptobzé hã te te iꞌaprub da hã, duré ibaihâ isinhai ré te te isõꞌa da hã.
6 Tawamhã wa tô ꞌmadâ, Poneꞌẽrebâ hã. Danhibꞌapito simasisizéb ꞌrata te za, maparane siꞌuiwa na ropoto na ihâiba norĩ waꞌwab zama, duré 24 na dama ipire norĩ waꞌwab zama. Da te dasiwi wĩrĩ wa, da te iwaꞌrézéb ré te za. 7 na iꞌõmo ré hã, Poneꞌẽrebâ hã. Duré 7 na itõmo ré hã. ꞌRe ihâimana uꞌâsi mono pẽꞌẽzani hã danhipai u uburé marĩ na iwaihuꞌu pese zé, te wasuꞌu, itõmo zaꞌra hã.
7 Tawamhã Poneꞌẽrebâ hã ma tô aiꞌré, danhibꞌapito simasisizém na isãmra u, ibaihâ nhinha hã te te âri da, tinhimire niwĩ te te itédé hã. Tawamhã Poneꞌẽrebâ hã ma tô tiꞌâ, ibaihâ nhinha hã.
8 Te te âri wamhã, ma tô maparane siꞌuiwa na ropoto na ihâiba norĩ hã Poneꞌẽrebâi ma, hiꞌrãtitõ ana. 24 na dama ipire norĩ zama, ma te duré tãma ana. Rowamremezéb ré ma tô tãma aiwẽꞌẽ zaꞌra, ẽtẽ waipo pré oru ꞌmanharĩ uꞌawi ne ré zama. Uꞌawi ꞌremhã wedewaꞌu isadaze, te iꞌre tiroꞌo zaꞌra. Taha nhizé hã hâimo haré wahu na, ta hã ꞌRe ihâimana uꞌâsi mono nhibꞌaꞌuwẽ norĩ, tãma ꞌre imreme zusi mono zé, te wasuꞌu.
9 Tawamhã ta norĩ hã te Poneꞌẽrebâi ma tinhoꞌre zaꞌra, tinhoꞌre itém na. Ãne te tãma tinhoꞌre zaꞌra:
“A hã ma tô dasiwi aiwĩrĩ ni. Ma tô dazada hã atâ. Dazada atâꞌâzém na ma tô idaꞌawaꞌâ, dawasédé hã dama ꞌre apari mono da ãma, ꞌRe ihâimana uꞌâsi mono nhibꞌaꞌuwẽ oto ꞌre danomro mono da.Dapoto mono bâ a hã ma tô idaꞌawaꞌâ, damreme sipoꞌo mono bâ ꞌre idahâimana zaꞌra mono hã. Danhipai u aiwẽ uptabi di, a hã. Aiwaihuꞌu pese uptabi di duré.Tahawa, te aiwétési sada hã aihâiba, ibaihâ isinhai ré iꞌâri da hã, duré iꞌuptobzé hã aprub da.
10 A hã ma tô duré Wanhibꞌapito ꞌRe ihâimana uꞌâsi mono te te ꞌre iꞌawaꞌâbâ mono norĩ hã ꞌre iꞌapisutu mo, sasedoti na te te tãma daꞌãma ꞌre romhuri uꞌâsi zaꞌra mono da, duré tiꞌai ãma pire na za dama ꞌre hâimana zaꞌra mono da.”
11 Tawamhã wa tô duré ꞌmadâ. Te ꞌmadâꞌâ wamhã, hâiwa ãma romhuriꞌwa norĩ hã te nemo tizadawaꞌaꞌa, ahâ uptabi na. Da te saꞌrata waihuꞌu zaꞌra õ di ta norĩ hã. Danhibꞌapito simasisizé hã ma siwi uirĩ. Duré maparane siꞌuiwa na ropoto na ihâiba norĩ mana wawi te asõré, 24 na dama ipire zaꞌra norĩ hã isisõré mana wawib zama.
12 Ãne te sõꞌre ꞌrãihâ na ta norĩ hã tizadawaꞌaꞌa:
“Poneꞌẽrebâ hã da te dasiwi iwĩrĩ hã, õ hã danhipai u wẽ uptabi di. Õhõ si wẽ uptabi wa, õhõ ãma si ꞌre wawata uꞌâsi zaꞌra waꞌaba mono. Õ hã uburé Roptedeꞌwa. Tô sena waihuꞌu pese uptabi di. Waihuꞌu pese uptabi wa, ãma ꞌre wawata uꞌâsi zaꞌra waꞌaba mono. Wama pire uptabi wab zama, ãma ꞌre wawata uꞌâsi zaꞌra waꞌaba mono.”
13 Tawamhã wa tô duré wapa, uburé pese ꞌRe ihâimana uꞌâsi mono te te idaꞌapoto mono bâ, duré te te iꞌapoto mono bâ, ihâiba ré mono hã, hâiwa ãma, duré tiꞌai ãma, duré tiꞌai ꞌrowi adâ ꞌre ihâimana zaꞌra mono zéb ãma, duré â ꞌrowi uburé pese ihâiba ré mono hã. Uburé pese te simisutu dasiwazari tazadawaꞌaꞌa ni, ꞌRe ihâimana uꞌâsi mono te te idaꞌapoto mono bâ. Ãne te tazadawaꞌaꞌa ni, ta norĩ hã:
“Danhibꞌapito simasisizém na isãmra ãma, ꞌre wawata uꞌâsi zaꞌra waꞌaba mono. Duré Poneꞌẽrebâi ãma, ꞌre wawata uꞌâsi zaꞌra waꞌaba mono. Wẽ uptabi zahuré wa ta norĩ hã, duré waihuꞌu pese uptabi zahuré wa, wa za ãma ꞌre wawata uꞌâsi zaꞌra, õ norĩ ãma.”
14 Tawamhã maparane siꞌuiwa na ropoto na ihâiba norĩ hã te ãma sõꞌre uze pese zaꞌra:
— Tô sena, tô sena.
Duré 24 na dama ipire zaꞌra norĩ hã ma tô hiꞌrãtitõ tãma ana, ãma wata zaꞌra da.
