Lucas 21:1-38
21 Tawamhã Zezusi hã ma tô daꞌaꞌmadâ, ꞌRe ihâimana uꞌâsi mono nhorõwa ꞌri ꞌrãihâ ãma. Tame ma tô isibro pese norĩ hã abꞌmadâ, tinhoprubzé te te séme ré, danhoprubzé, da te ꞌre iséme mono zéb ꞌre.
2 Tawamhã piꞌõi mrotõ isibrobꞌõ hã ma tô duré ꞌmadâ, maparane robꞌuiprazé isapotore te te zai ré hã, ĩsurure, da te ãma irobꞌuipra da hã.
3 Tahawa te isiré ꞌre inomro mono norĩ ma tinha, ãne:
— Tô sena wa za aima waihuꞌu zaꞌra waꞌwa, ãne: Ã hã piꞌõi mrotõ hã uburé danhipai u ma tisõ, tinhoprubzé hã.
4 E marĩ wa. Da te isõmri zaꞌra hã isiꞌatarẽme si ma sõmri zaꞌra ni. Tazahã, õ hã sibrob õ nherẽ, uburé ma tô tisõ, aré ãma ꞌre ihâimana mono da hã.
ꞌRe ihâimana uꞌâsi mono nhorõwa ꞌri ꞌrãihâ, za iꞌri siprubzé
5 Tawamhã nima norĩ isiré ꞌre inomro mono norĩ hã ma tô tiwata zaꞌra ꞌri ꞌrãihâ ãma, ꞌri iwẽ uptabi na duré ẽtẽ na iꞌri ꞌmanharĩ wẽ na hã, duré ꞌRe ihâimana uꞌâsi mono ma ꞌre idanhoprub zaꞌra mono zém na zama. Tahawa te Zezusi hã tinha, ãne:
6 — Bâdâ te za iwa waptãrã, ã hã uburé za da te iprub zaꞌra da hã. Tawamhã ẽne hã sisisiwi simiꞌwara õ di za.
7 Tahawa ma tô ãma siwi sadanha, ãne:
— Rowahutuꞌwa, e niwa te za uburé ãne hã tiromhâimana zaꞌra. E marĩ te za watobro, ãma iwaihuꞌuzéb da hã, oto iroꞌrutu na ãne hã uburé iromhâimana zaꞌra da hã.
8 Tawamhã Zezusi hã ma tô tãma nharĩ zaꞌra, ãne:
— Maꞌãpé ꞌre asiꞌmadâꞌâ pese zaꞌra waꞌaba mono, niꞌwa hã te te aima robꞌrãmi zaꞌra waꞌaba tõ da. E marĩ wa. Daꞌahâ uptabi na ĩnhisi na, za datẽme ꞌre danomro mono wa. Ãne te za ꞌre dasiwasuꞌu zaꞌra: “Wa hã Danhoꞌreptuiꞌwa” niwamhã duré ãne: “Bâdâ hã ma tô oto iwa waptãrã.” Ãne wamhã, daꞌãma ꞌre sasõmri zaꞌra waꞌaba mono tõ.
9 Dasiꞌwapéi wasuꞌu hã, duré danhibꞌapito norĩ zada ꞌre idahâimana zaꞌra mono zé, da te ꞌre sani zaꞌra mono wasuꞌu zama ꞌre wapari zaꞌra waꞌaba mono wamhã, tãma ꞌre aipahi zaꞌra waꞌaba mono tõ. Tô iꞌru zahi, imorĩꞌrata na ãne hã iromhâimana zaꞌra da hã. Tane nherẽ, awaꞌawi robꞌrãsutu õ di za aꞌâ.
10 Tawamhã ma duré ãma tãma uzusi zaꞌra, ãne:
— Dawamri mono bâ te za ꞌre dasiꞌwapé zaꞌra. Duré tiꞌai waꞌõtõ nhoꞌõmo ꞌre rotiꞌwa norĩ hã te za ihâiba amoi u rotiꞌwa norĩ hã te te ꞌre ꞌwapé zaꞌra.
11 Nima niwĩmhã tiꞌai popo isaꞌẽne hã te za ꞌre wairébé, duré mrab zépada hã, duré dahâzé waptu na za te te idaduri mono hã. Duré marĩ ipipa uptabi hã te za ꞌre wairébé. Duré ãma iwaihuꞌuzéb da hã te za hâiwa nhoꞌre na marĩ isaꞌẽne hã ꞌre wairébé.
12 — Tane nherẽ, uburé ãne hã romhâimana zaꞌra wana ré hã, te za da te ꞌre aséme ꞌwa. Te za duré da te aima ꞌre robꞌmanharĩ wasété zaꞌra waꞌwa. Rowahutuzéb u te za da te ꞌre asimroi waꞌwa. Taha pari te za duré da te ꞌre aséme ꞌwa, dazazéb re. Danhibꞌapito norĩ nhoꞌre u, te za da te ꞌre asimroi waꞌwa, duré rotiꞌwa norĩ u zama. Ãne hã te za da te aima ꞌre ꞌmanharĩ zaꞌra waꞌwa, ĩnhisi uꞌâbâ.
13 Ãne wamhã, bâdâ te za aima ꞌre hâimana zaꞌra waꞌwa, ĩwasuꞌuwẽ na ꞌre irobꞌmahârâ zaꞌra waꞌaba mono zéb da hã dama.
14 Tahawa, õne haré asima ꞌre waihuꞌu zaꞌra waꞌaba mono, za ꞌre inharĩ zaꞌra waꞌaba mono zém na, ꞌre aihâtâꞌâ zaꞌra waꞌaba mono tõ da, asiꞌwawi za ꞌre iꞌaimapa zaꞌra waꞌaba mono zéb da hã.
15 E marĩ wa. Wa hã ꞌre iꞌaimreme zusi aba mono zéb da hã, za te aima ꞌre sõmri zaꞌra waꞌaba mono wa, duré rowaihu iwẽ zama. Tawamhã asada ꞌre ihâimana zaꞌra waꞌaba mono norĩ hã siptete na te te ꞌre aiꞌwapéi waihuꞌu zaꞌra waꞌaba mono õ di za. Duré iꞌuptabi na wa, te te ãma ꞌre asadaꞌâbâ waihuꞌu zaꞌra waꞌaba mono õ di za.
16 Aimama norĩ hã te za te te dama ꞌre aihâiba zaꞌré zaꞌra waꞌwa, duré asisãnawã norĩ hã duré asiwadi norĩ hã, duré asiwaihuꞌu norĩ aba zama. Tawamhã nima norĩ asiré waꞌwa hã te za da te ꞌre asimroi waꞌwa.
17 Uburé te za da te ꞌre aiꞌruiwapari zaꞌra waꞌwa, ĩnhisi uꞌâbâ.
18 Tane nherẽ, aséré ꞌwa hã, siꞌmanhimini waihuꞌu õ di za.
19 Asiptete sina ĩꞌãma ꞌre anomro uꞌâsi aba mono wapsi, te za dahâimanazé isiꞌutõrĩꞌõ hã asina ꞌre iꞌuwaimrami zaꞌra waꞌaba mo.
Zezusi hã, Zeruzalẽ za isiprubzém na te te inharĩzé
20 Tawamhã Zezusi hã ma duré tãma waihuꞌu zaꞌra, ãne:
— Niwamhã Zeruzalẽ, dasiꞌwapéi ꞌmanharĩꞌwa norĩ te te siwi iꞌuirĩ na asiwi ꞌmadâꞌâ aba wamhã, te za iwaihuꞌu zaꞌra waꞌwa, za da te iprubzé hã oto tãma iroꞌrutu na hã.
21 Tawamhã Zudéa ãma ꞌre isiꞌubumroi mono norĩ hã isimani zaꞌra da si, ẽtẽ ꞌrãihâ u. Duré ꞌri nhoꞌõmo norĩ ãma ꞌre isiꞌubumroi mono norĩ hã ihawi wairébé. Duré rom na ꞌre isiꞌubumroi mono norĩ hã sisisi tõ, ꞌri nhoꞌõmo u hã.
22 E marĩ wa. Ã hã bâtâ mono hã, dama robꞌmanharĩ wasété zéb ré, te za tihâimana zaꞌra, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré isimiꞌwara siromo hã te te sina uwaimrami zaꞌra da.
23 Taha bâtâ mono na hã, piꞌõ iwasã ré norĩ ma hã ropipa uptabi di za, duré iꞌra te te iwapsõmri ré norĩ ma zama! E marĩ wa. Saꞌẽtẽ na te za robzépata zaꞌra ni, taha bâtâ mono na hã. Duré ꞌRe ihâimana uꞌâsi mono nhimihâzé hã te za dazada tihâiba.
24 Daꞌahâ na te za aiꞌutõrĩ ni, sibꞌézé ꞌwapa na. Duré niꞌwam norĩ hã tiꞌai waꞌõtõ nhoꞌõmo amoi u te za da te simro, pawasisi ré. Tawamhã Zudeuꞌõ norĩ hã te za siwi tiꞌâ Zeruzalẽ hã, bâdâ tãma iwisi zaꞌra zé hã te te sina iꞌuwaimrami zaꞌra zéb u.
Tiꞌai ãma Dasiré Ipodo, apâ za we imorĩzé
25 Tawamhã Zezusi hã ma duré ãma uzusi, ãne:
— Marĩ hã te za ꞌre wairébé, bâtâ na hã duré aꞌamo na hã duré wasi norĩ na zama, ãma iwaihuꞌuzéb da hã. Tawamhã duré tiꞌai ãma hã uburé dapoto mono bâ te za dawi tirowaihuꞌuꞌõ pese zaꞌra za, dapahi te, â pore ruruꞌu ma, duré â pore sisasisi ma zama.
26 Daꞌahâ na te za dapahi te, ꞌre danhimizaꞌreseꞌõ siꞌutõrĩ zaꞌra, niha za ꞌre iromhâimana mono zém na, da te ꞌre rosaꞌrata zaꞌra mono wa. E marĩ wa. Hâiwa na ꞌre isimasa mono norĩ hã za oto sirési zaꞌra wa.
27 Tawamhã Tiꞌai ãma Dasiré Ipodo hã te za dasiwi ꞌmadâꞌâ ni, hâiwaꞌa na apâ wei morĩ ré, waihuꞌu pese uptabi na duré ihâiba na rowaꞌa isaꞌẽtẽ uptabi ré.
28 Ãne hã iromhâimana zaꞌra zé sãnaꞌrata zaꞌra wamhã, maꞌãpé asiptete uꞌâsi aihâimana zaꞌra waꞌaba, asibꞌru na, ato sina. Duré aiꞌrãi wahutu zaꞌra waꞌaba, robꞌumnhasi sina, ꞌRe ihâimana uꞌâsi mono hã romhutu na za oto te te asõꞌreptu zaꞌra waꞌaba wa.
Robꞌrã figu wede na romnhimiré
29 Tawamhã Zezusi hã te duré romnhimiréꞌé na rowasuꞌu, ãne:
— Maꞌãpé, ãma rosaꞌrata pese zaꞌra waꞌaba, robꞌrã figu wede na duré niwamhã aimawi rowede norĩ ãma.
30 ꞌRe su téb zaꞌra mono wamhã, te za iwaihuꞌu ꞌwa, tã itaꞌazéb u oto iroꞌrutu na hã.
31 Tane duré, ãne hã marĩ ꞌre iwairébé mono na ꞌre ꞌmadâꞌâ zaꞌra waꞌaba mono wamhã, waihuꞌu zaꞌra waꞌaba, ꞌRe ihâimana uꞌâsi mono daꞌãma ꞌre isibꞌaꞌuwẽ mono zé iwisizéb u oto iromhuture na hã.
32 Tô sena wa za aima waihuꞌu zaꞌra waꞌwa, ãne: Ãhã na idahâimana zaꞌra hã dadâꞌâ zaꞌra õ ré, te za tô uburé ã hã iromhâimana mono zé hã ꞌre wairébé.
33 Hâiwa duré tiꞌai me, te za aiꞌutõrĩ zahuré. Tane nherẽ, ĩmreme hã niwa siꞌutõrĩ waihuꞌu õ di za.
34 Tawamhã Zezusi hã ma tô ãma ꞌrãsutu, ãne:
— Maꞌãpé, asimizaꞌrese ꞌre aihâimana zaꞌra waꞌaba mono! Dato na si ꞌre aiꞌrãzaꞌõtõ zaꞌra waꞌaba mono tõ da. Duré niwamhã âzé na si ꞌre asiꞌrãiwamnarĩ zaꞌra waꞌaba mono tõ da, duré niwamhã tiꞌai ãma ropire dahâimanazéb ꞌre dama ꞌre ihâimana zaꞌra mono na si, tô õ hã bâdâ hã za wisi wa, rosaꞌrese õ ré, aima wisi zaꞌra waꞌaba tõ da.
35 E marĩ wa. Ta hã za wisi wa, uburé tiꞌai ãma ꞌre idahâimana zaꞌra mono norĩ ma.
36 Tahawa, maꞌãpé asimizaꞌrese ꞌre aihâimana uꞌâsi zaꞌra waꞌaba mono. Duré ꞌre rowaptẽrẽ uꞌâsi zaꞌra waꞌaba mono, uburé marĩ wi, ꞌre asisõꞌreptu zaꞌra waꞌaba mono da, za ꞌre iwairébé mono wi, duré hâiwi aimasa waꞌaba da, Tiꞌai ãma Dasiré Ipoto nhoꞌre, apâ wei morĩ wamhã.
37 Zezusi hã bâtâ sidâpâsi ma tô te te dama ꞌre rowahutu, ꞌRe ihâimana uꞌâsi mono nhorõwa ꞌri ꞌrãihâ ãma hã. Tane nherẽ, ꞌre mara mono wamhã, ma tô ꞌre ne, Olivera na ẽtẽ ꞌrãihâ nhisi u, tame ãma ꞌre awẽ mono da.
38 Tawamhã awẽ wi, ma tô ꞌre danomro, ꞌRe ihâimana uꞌâsi mono nhorõwa ꞌri ꞌrãihâ u hã, da te ꞌre wapari zaꞌra mono da.
