Soane 6:1-71
6 Hili ia, neʼe fakalaka ia Sesu ʼi te Tai ʼo Kalilea ʼae ʼe toe fakahigoa ko Tipeliate.
2 Pea neʼe haga mulimuli ia te ia te hahaʼi tokolahi, koteʼuhi neʼe natou sisio ki te ʼu milakulo ʼae neʼe ina fakahoko ʼi tana fakamalolo te kau mahaki.
3 Neʼe hake leva ia Sesu ki te moʼuga pea mo heka ai mo ʼana tisipulo.
4 Neʼe kua ovi mai te Pasikate, ia te ʼaho lahi ʼo te kau Sutea.
5 ʼI te hiki ake e Sesu ʼona mata pea mo sio ki te hahaʼi tokolahi ʼae neʼe ʼomai kia te ia, neʼe ina ui fenei kia Filipo: “ ʼE tou totogi anai maifea he ʼu pane ke kai e te hahaʼi ʼaeni?”
6 Kaʼe neʼe palalau feia moʼo ʼahiʼahiʼi ia Filipo, koteʼuhi neʼe kua ina iloʼi te meʼa ʼae ka ina fai.
7 Neʼe tali fenei e Filipo kia te ia: “ ʼE mole feʼauga he ʼu tenalio* ʼe 200 moʼo totogi ʼaki he ʼu pane ke feala ai hanatou maʼu takitahi he kiʼi moʼi pane.”
8 Ko te tahi ʼo ʼana tisipulo, ko Atelea, te tehina ʼo Simone Petelo, neʼe ina ui fenei kia te ia:
9 “ ʼE ʼi heni te kiʼi tama mo ʼana foʼi pane olose* ʼe nima mo kiʼi ika ʼe lua. Kaʼe kotea tona ʼuhiga ki te hahaʼi tokolahi ʼaeni?”
10 Neʼe ui fenei e Sesu: “Kotou fakanofo te hahaʼi ki lalo.” Neʼe lahi te luna ʼi te koga meʼa ʼaia, koia neʼe nonofo ifo ai te hahaʼi ki lalo, pea neʼe lau ko te teitei toko 5 000 tagata ia natou.
11 Neʼe toʼo e Sesu te ʼu foʼi pane pea ʼi tana ʼosi fai he fakafetaʼi neʼe ina tufatufa kia natou ʼae neʼe nonofo ai. Neʼe ina toe fai feia mo te ʼu kiʼi ika, pea neʼe feʼauga ai maʼa natou fuli.
12 Kaʼe ʼi tanatou kua makokona, neʼe ina ui fenei ki ʼana tisipulo: “Kotou tanaki te ʼu toega kai ke ʼaua naʼa alu noa.”
13 Neʼe natou tanaki ai te ʼu toega kai pea mo fakafofonu kato ʼe 12. Neʼe ko te ʼu toega kai ʼaia ʼa natou ʼae neʼe makokona ʼi te ʼu foʼi pane olose ʼe nima.
14 ʼI te sisio ʼa te hahaʼi ki te milakulo ʼae neʼe ina fakahoko, neʼe natou ui fenei: “ ʼE ko ia moʼoni te Polofeta ʼae neʼe tonu ke haʼu ki te malamanei.”
15 ʼI te iloʼi e Sesu ʼe natou ʼomai anai ʼo toʼo ia ia ke natou fakanofo ko he hau, neʼe toe alu ia ki te moʼuga, ʼo nofo tokotahi ai.
16 ʼI te malu ʼo te afiafi, neʼe hihifo ʼana tisipulo ki te matatai,
17 pea neʼe natou heheka ki te vaka ʼo fakalaka ʼi te tai ʼo olo ki Kapenaume. Neʼe kua poʼuli pea neʼe heʼeki alu age ia Sesu kia natou.
18 Pea neʼe hou ia te tai koteʼuhi neʼe lalahi ia te matagi.
19 Kaʼe hili tanatou tau aʼalo ia teitei kilometa ʼe nima peʼe ono,* neʼe natou sisio ki te haʼele ʼa Sesu ʼi te fuga tai ʼo fakaovi age ki te vaka, pea neʼe natou matataku ai.
20 Kaʼe neʼe ina ui fenei kia natou: “ ʼE ko au, ʼaua naʼa kotou matataku!”
21 Pea neʼe natou loto ke heka ki te vaka, pea mole faʼa fualoa pea tau atu te vaka ki te fenua ʼae neʼe natou fia olo ki ai.
22 ʼI te ʼaho ake, ko te hahaʼi tokolahi ʼae neʼe nonofo ʼi te tahi kauvai, neʼe natou tokagaʼi kua puli ia te kiʼi vaka ʼae neʼe tau tokotahi ʼi te matatai. Koteʼuhi neʼe heheka te ʼu tisipulo ki te kiʼi vaka ʼaia ʼo olo kaʼe neʼe mole alu ia Sesu mo natou.
23 Kaʼe neʼe tau age ni vaka mai Tipeliate ʼo ovi ki te koga meʼa ʼae neʼe natou kai ai te ʼu foʼi pane, ʼi te ʼosi fai e te ʼAliki he fakafetaʼi.
24 Koia, ʼi te tokagaʼi e te hahaʼi tokolahi kua pupuli ia Sesu mo ʼana tisipulo, neʼe natou heheka ai ki ʼonatou vaka pea mo olo ki Kapenaume ʼo kumi ai ia Sesu.
25 ʼI tanatou maʼu atu ia ia ki te tahi kauvai, neʼe natou ui fenei age: “Lapi, neʼe ke haʼu ʼanafea ki heni?”
26 Neʼe tali fenei e Sesu kia natou: “ ʼE au tala moʼoni atu kia koutou, ʼe mole kotou kumi au ʼuhi ko te ʼu milakulo ʼae neʼe kotou sisio ki ai, kaʼe ʼuhi ko takotou kai ki te ʼu foʼi pane pea mo makokona ai.
27 ʼAua naʼa kotou gaue ki te meʼa kai ʼae ʼe pala, kaʼe ki te meʼa kai ʼae ʼe tologa pea mo ina taki ki te maʼuli heʼe gata, ʼae ʼe foaki atu anai e te Foha ʼo te tagata. Koteʼuhi ko te Tamai, te ʼAtua, neʼe ina foaki kia ia he fakamoʼoni ʼe ina leleiʼia ia ia.”
28 Neʼe natou fehuʼi fenei kia te ia: “Kotea ʼae ʼe tonu ke matou fai moʼo fakahoko te ʼu gaue ʼa te ʼAtua?”
29 Neʼe tali fenei e Sesu kia natou: “Koʼeni te gaue ʼa te ʼAtua, ke kotou tui kia ia ʼae neʼe ina fekauʼi mai.”
30 Pea neʼe natou ui fenei kia te ia: “Kotea he milakulo ʼe ke fakahoko anai, ke matou sisio ki ai pea mo tui atu kia koe? Kotea ʼae ka ke fakahoko anai?
31 Neʼe kai e ʼamatou kui te mane ʼi te toafa, ohage ko tona tohi fenei: ‘Neʼe ina foaki kia natou te pane mai te lagi ke natou kai.’ ”
32 Neʼe ui fenei leva e Sesu kia natou: “ ʼE au tala moʼoni atu kia koutou, neʼe mole foaki e Moisese kia koutou te pane mai te lagi, kaʼe ʼe ko taku Tamai ʼae ʼe ina foaki atu kia koutou te pane moʼoni mai te lagi.
33 Koteʼuhi ko te pane ʼa te ʼAtua, ʼe ko ia ʼae ʼe hifo mai selo ʼo foaki te maʼuli ki te malamanei.”
34 Neʼe natou ui fenei leva kia te ia: “ ʼAliki, foaki tuʼumaʼu mai te pane ʼaia kia matou.”
35 Neʼe ui fenei e Sesu kia natou: “Ko au ia te pane ʼo te maʼuli. Ko ʼae ʼe haʼu kia te au ʼe mole toe fia kai anai, pea ko ʼae ʼe tui kia te au ʼe mole toe fia inu anai.
36 Kaʼe ohage pe ko taku ui atu, ʼe kotou sisio kia te au kaʼe ʼe mole kotou tui.
37 Ko natou fuli ʼae ʼe foaki mai e te Tamai ʼe natou ʼomai anai kia te au, pea ʼe mole au kapu anai ia ia ʼae ʼe haʼu kia te au.
38 Koteʼuhi neʼe mole au hifo mai selo ʼo fai toku finegalo, kaʼe ko te finegalo ʼo ia ʼae neʼe ina fekauʼi mai au.
39 Koʼeni te finegalo ʼo ia ʼae neʼe ina fekauʼi mai au, ke mole puli he tahi ia natou fuli ʼae neʼe ina foaki mai, kaʼe ke au fakatuʼuake natou ʼi te ʼaho fakamuli.
40 He ʼe koʼeni te finegalo ʼo taku Tamai, ke maʼu te maʼuli heʼe gata e ia ʼae ʼe fakamoʼoni ki te ʼAlo pea mo tui kia te ia, pea ʼe au fakatuʼuake anai ia ia ʼi te ʼaho fakamuli.”
41 Pea neʼe muhumuhu ia te kau Sutea ʼo ʼuhiga mo ia he neʼe ina ui fenei: “Ko au te pane ʼae neʼe hifo mai selo.”
42 Neʼe natou ui fenei: “ ʼE mole ko Sesu koa ʼaena, te foha ʼo Sosefo? ʼE mole tou iloʼi koa la ia tana tamai mo tana faʼe? Kaʼe he koʼe ʼe ina ui fenei leva ia: ‘Neʼe au hifo mai selo’?”
43 Neʼe tali fenei e Sesu kia natou: “Tuku takotou muhumuhu.
44 ʼE mole he tahi ʼe feala ke haʼu kia te au mo ka na pau la neʼe mole taki mai ia ia e taku Tamai, ʼae neʼe ina fekauʼi mai au, pea ʼe au fakatuʼuake anai ia ia ʼi te ʼaho fakamuli.
45 ʼE tohi fenei ʼi te ʼu tohi ʼa te kau Polofeta: ‘ ʼE akoʼi fuli anai natou e Sehova.’* Ko ʼae neʼe fagono ki te Tamai pea mo ina tali tana akonaki, ʼe haʼu ia kia te au.
46 Heʼeki sio he tagata ki te Tamai, gata pe kia ia ʼae neʼe haʼu mai te ʼAtua, ko ia ʼaia kua sio ki te Tamai.
47 ʼE au tala moʼoni atu kia koutou, ko ʼae ʼe tui, ʼe ina maʼu ia te maʼuli heʼe gata.
48 “Ko au ia te pane ʼo te maʼuli.
49 Neʼe kai e ʼakotou kui te mane ʼi te toafa kaʼe neʼe natou mamate.
50 Koʼeni te pane ʼae ʼe hifo mai selo, pea ko ʼae ʼe kai ki ai ʼe mole mate anai.
51 Ko au te pane maʼuli ʼae neʼe hifo mai selo. Kapau ʼe kai e he tahi te pane ʼaia, ʼe maʼuli anai ʼo heʼe gata. Pea ko te pane ʼae ʼe au foaki anai ke maʼuli ai te malamanei, ʼe ko toku kakano.”
52 Pea neʼe fepalalauʼaki fenei te kau Sutea: “ ʼE lava feafeaʼi ki te tagata ʼaeni ke ina foaki mai tona kakano ke tou kai?”
53 Koia neʼe ui fenei e Sesu kia natou: “ ʼE au tala moʼoni atu kia koutou, kapau ʼe mole kotou kai te kakano ʼo te Foha ʼo te tagata pea mo inu ki tona taʼataʼa, ʼe mole ia koutou te maʼuli.
54 Ko ʼae ʼe ina kai toku kakano pea mo inu toku taʼataʼa ʼe ina maʼu te maʼuli heʼe gata, pea ʼe au fakatuʼuake anai ia ia ʼi te ʼaho fakamuli.
55 Koteʼuhi ko toku kakano ʼe ko te meʼa kai moʼoni pea ko toku taʼataʼa ʼe ko te meʼa inu moʼoni.
56 Ko ʼae ʼe ina kai toku kakano pea mo inu toku taʼataʼa ʼe fakatahi mo au, pea ʼe au fakatahi mo ia.
57 Ohage pe ko te fekauʼi mai au e te Tamai ʼae ʼe maʼuli pea ʼe au maʼuli ʼuhi ko te Tamai, ʼo toe feia aipe, ko ʼae ʼe ina kai toku kakano ʼe maʼuli anai ʼuhi ko au.
58 Koʼeni te pane ʼae neʼe hifo mai selo. ʼE mole tatau mo te pane ʼae neʼe kai e ʼakotou kui pea natou mamate. Ko ʼae ʼe kai ki te pane ʼaeni ʼe maʼuli anai ʼo heʼe gata.”
59 Neʼe ina fai te ʼu palalau ʼaia ʼi tana faiakonaki ʼi he sinakoka* ʼi Kapenaume.
60 ʼI tanatou logo ki tana palalau ʼaia, tokolahi ʼi ʼana tisipulo neʼe natou ui fenei: “Kotea koa te taʼi palalau ʼaia? Ko ai ʼae ʼe kei fia fakalogo ki ai?”
61 Kaʼe neʼe iloʼi e Sesu neʼe muhumuhu ʼana tisipulo ʼo ʼuhiga mo te faʼahi ʼaia, koia neʼe ina ui fenei kia natou: “ ʼE kotou tukia koa ʼuhi ko ʼaku palalau?
62 Pea ʼe feafeaʼi age leva mo kapau ʼe kotou sisio ki te hake ʼo te Foha ʼo te tagata ki te potu ʼae neʼe nofo ai ʼi muʼa atu?
63 ʼE ko te laumalie ʼae ʼe ina foaki te maʼuli kaʼe ʼe mole he ʼaoga ia ʼo te kakano. Ko te ʼu palalau ʼae neʼe au fai atu ʼe haʼu mai te laumalie maʼoniʼoni pea ʼe maʼuli.
64 Kaʼe ʼe ʼi ai ʼihi ia koutou ʼe mole natou tui.” Neʼe kua iloʼi e Sesu talu mai te kamataʼaga ia natou ʼae ʼe mole tui pea mo ia ʼae ka ina lavakiʼi ia ia.
65 Neʼe ina hoko atu fenei: “Ko te tupuʼaga la ʼaia ʼo taku ui atu, ʼe mole feala ke haʼu he tahi kia te au mo ka na pau la neʼe mole fakagafua age e te Tamai.”
66 Koia, ʼuhi ko te faʼahi ʼaia, tokolahi ʼi ʼana tisipulo neʼe natou toe liliu ki te ʼu meʼa ʼae ʼi muli pea neʼe mole kei natou mulimuli ia te ia.
67 Neʼe ui fenei leva e Sesu ki te toko Hogofulu-ma-lua: “ ʼE kotou fia olo koa mo koutou?”
68 Neʼe tali fenei e Simone Petelo kia te ia: “ ʼAliki, ke matou olo la kia ai? ʼE ke maʼu te ʼu folafola ʼo te maʼuli heʼe gata.
69 ʼE matou tui pea ʼe matou iloʼi ʼe ko koe te Maʼoniʼoni ʼa Te ʼAtua.”
70 Neʼe ui fenei e Sesu kia natou: “Neʼe mole koa la au filifili koutou, te toko hogofulu-ma-lua? Kaʼe ʼe ʼi ai he tahi ia koutou ʼe ko te tagata fasituʼu.”*
71 Neʼe palalau ia ʼo ʼuhiga mo Sutasi te foha ʼo Simone Isekaliote, koteʼuhi ʼe ko ia ʼae ka ina lavakiʼi ia ia, logo la tana kau ki te toko Hogofulu-ma-lua.
Nota
^ Vakaʼi Te ʼu Kupu Mo ʼOna Fakaʼuhiga.
^ ʼE ko he ʼu pane neʼe fai ʼaki he faʼahiga falena, neʼe totogi lelei age ʼi te falena ʼae neʼe fai ʼaki te fulumeto, pea ʼi te agamahani neʼe kai e te kau masisiva.
^ ʼI te Fakakeleka, “teitei sitate ʼe 25 peʼe 30.”
^ Vakaʼi Te ʼu Kupu Mo ʼOna Fakaʼuhiga.
^ Peʼe “ ʼi te fakatahiʼaga ʼa te hahaʼi.”
^ Peʼe “he tevolo.”