Soane 1:1-51
1 ʼI te kamataʼaga, neʼe ʼi ai te Folafola, pea neʼe nofo te Folafola mo te ʼAtua, pea ko te Folafola neʼe ko he ʼatua.*
2 ʼI te kamataʼaga, neʼe nofo ia mo te ʼAtua.
3 Neʼe fakatupu ia meʼa fuli ʼaki ia ia, pea neʼe mole fakatupu he meʼa mo ka na pau la neʼe mole fakatupu ʼaki ia ia.
ʼAki ia ia neʼe fakatupu ia te maʼuli,
4 pea ko te maʼuli neʼe ko te malama ʼo te tagata.
5 Pea ʼe gigila te malama ʼi te fakapoʼuli, kaʼe ʼe mole malohi age te fakapoʼuli ʼi te malama.
6 Pea neʼe haʼu he tagata, neʼe fekauʼi mai ko he fakafofoga ʼo te ʼAtua pea neʼe higoa ko Soane.
7 Neʼe haʼu leva ia ko he tagata fakamoʼoni, ke fakamoʼoni ʼo ʼuhiga mo te malama, ke tui te hahaʼi kehekehe ʼaki ia ia.
8 Neʼe mole ko ia te malama ʼaia, kaʼe neʼe fekauʼi mai ke fakamoʼoni ʼo ʼuhiga mo te malama ʼaia.
9 Neʼe ʼamanaki haʼu ki te malamanei ia te malama moʼoni ʼae ʼe ina foaki te malama ki te hahaʼi kehekehe.
10 Neʼe ʼi te malamanei, pea neʼe fakatupu te malamanei ʼaki ia ia, kaʼe neʼe mole iloʼi e te malamanei ia ia.
11 Neʼe haʼu ki tona fenua totonu, kaʼe neʼe mole tali ia ia e tana hahaʼi.
12 Kaʼe, ko natou fuli ʼae neʼe natou tali ia ia, neʼe ina fakafealagia ke natou liliu ko he ʼu fanau ʼa te ʼAtua, koteʼuhi neʼe natou tui ki tona huafa.
13 Pea neʼe natou tutupu ake mai te ʼAtua, kaʼe mole mai te toto peʼe ko te kakano peʼe ko te finegalo ʼo te tagata.
14 Koia neʼe liliu te Folafola ʼo kakano pea neʼe nofo mo matou. Neʼe matou mamata ki tona kololia, te faʼahiga kololia ʼae ʼe maʼu e te foha ʼulu tokotahi mai tana tamai. Pea neʼe fonu ia ʼi te ʼofa makehe mo te moʼoni.
15 (Neʼe fakamoʼoni ia Soane ʼo ʼuhiga mo ia, ʼi tana kalaga fenei: “Neʼe ko ia ʼae neʼe au talanoa ki ai, ʼo ui fenei: ‘Ko ia ʼae ʼe muli mai ia au kua muʼamuʼa ia ia au, koteʼuhi neʼe kua maʼuli ia kaʼe neʼe heʼeki au tupu.’ ”)
16 Pea neʼe tou maʼu fuli mai ia te ia te ʼofa makehe, ʼo lahi ʼaupito, he neʼe fonu ʼi te ʼofa makehe.
17 Koteʼuhi neʼe foaki te Lao ʼaki ia Moisese, kaʼe neʼe tou maʼu te ʼofa makehe mo te moʼoni ʼaki ia Sesu Kilisito.*
18 Neʼe heʼeki ʼi ai he tagata kua sio ki te ʼAtua. Kaʼe ko te ʼatua ʼulu tokotahi ʼae ʼe nofo ia tafa ʼo te Tamai* neʼe ina fakamahino mai pe ko ai te ʼAtua ʼaia.
19 Ko te fakamoʼoni ʼaeni neʼe fai e Soane ʼi te fekauʼi age e te kau Sutea ia he kau pelepitelo mo he kau Levite mai Selusalemi ke natou fehuʼi fenei age ki ai: “Ko ai ia koe?”
20 Neʼe ina tali fakahagatonu fenei age: “ ʼE mole ko au ia Kilisito.”
21 Pea neʼe natou toe fehuʼi fenei age ki ai: “ ʼE ko koe koa te polofeta ko Elia?” Neʼe ina tali fenei age: “Kailoa ia.” “ ʼE ko koe koa te Polofeta?” Neʼe ina toe tali fenei age: “Kailoa ia.”
22 Neʼe natou fehuʼi fenei leva ki ai: “Ko ai ia koe? Fakaha mai ke feala hamatou foaki he tali kia natou ʼae neʼe natou fekauʼi mai matou. Kotea ʼae ʼe ke ui ʼo ʼuhiga mo koe?”
23 Neʼe ina ui fenei: “Ko au ia ia ʼae ʼe kalaga fenei ʼi te toafa: ‘Kotou fakatokatoka te ala ʼo Sehova,’* ohage ko tona ui e te polofeta ko Isaia.”
24 Neʼe ko te kau Faliseo* ʼae neʼe natou fekauʼi mai te kau pelepitelo mo te kau Levite ʼaia.
25 Koia neʼe natou fehuʼi fenei age ki ai: “Pea he koʼe ʼe ke faipapitema mo kapau ʼe mole ko koe ia Kilisito peʼe ko Elia peʼe ko te Polofeta?”
26 Neʼe tali fenei age e Soane kia natou: “ ʼE au faipapitema ʼaki te vai. ʼE nofo ia koutou he tahi ʼe mole kotou iloʼi,
27 ia ia ʼae ʼe muli mai ia au, pea ʼe mole tuha mo au ke au veteki te ʼu haʼi ʼo ʼona taka.”
28 Neʼe hoko te ʼu faʼahi ʼaia ʼi Petania ʼi te tahi kauvai ʼo Solotane, ʼae neʼe faipapitema ai ia Soane.
29 ʼI te ʼaho ake, neʼe sio ki te alu age ʼa Sesu kia ia, pea neʼe ina ui fenei: “Koʼeni te Akeno ʼa te ʼAtua, ʼae ʼe ina toʼo te agahala ʼo te malamanei!
30 ʼE ko ia ʼae neʼe au talanoa ki ai, ʼo ui fenei: ‘ ʼE muli mai ia au he tagata kua muʼamuʼa ia ia au, koteʼuhi neʼe kua maʼuli ia kaʼe neʼe heʼeki au tupu.’
31 Maʼiape la mo au neʼe mole au iloʼi ia ia, kaʼe neʼe au faipapitema ʼaki te vai ke feala ke fakaha ia ia ki Iselaele.”
32 Neʼe toe fai leva e Soane te fakamoʼoni ʼaeni: “Neʼe au sio ki te laumalie ’e hifo ifo mai te lagi ohage ko he lupe pea neʼe nofo ia te ia.
33 Maʼiape la mo au neʼe mole au iloʼi ia ia, kaʼe ko Ia ʼae neʼe ina fekauʼi mai au ke au faipapitema ʼaki te vai, neʼe ina ui fenei mai: ‘Ko ia ʼae ka ke sio ʼe hifo ifo anai ki ai te laumalie maʼoniʼoni pea mo nofo ai, ʼe ko ia ʼae ʼe faipapitema ʼaki te laumalie.’
34 Pea neʼe au sio ki ai, mo au fakamoʼoni ʼe ko ia ʼaeni ko te ʼAlo ʼo te ʼAtua.”
35 ʼO toe feia ʼi te ʼaho ake, neʼe nonofo ai ia Soane mo ʼana tisipulo ʼe toko lua,
36 pea ʼi tana sio ki te fakalaka ʼa Sesu, neʼe ina ui fenei: “Koʼeni te Akeno ʼa te ʼAtua!”
37 ʼI te logo ʼa te ʼu tisipulo ʼe toko lua ki tana palalau ʼaia, neʼe nā mulimuli leva ia Sesu.
38 Neʼe maliu ia Sesu, pea ʼi tana sio ki tanā mulimuli ia te ia, neʼe ina ui fenei kia naua: “Kotea ʼae ʼe kolua kumi?” Neʼe nā ui fenei age kia te ia: “Lapi (ko tona fakaʼuhiga, “Faiako”), kofea ʼae ʼe ke nofo ai?”
39 Neʼe ina ui fenei kia naua: “Kolua ʼomai pea ʼe kolua sisio anai.” Neʼe nā olo ai pea neʼe nā sisio ki te faʼahi ʼae neʼe nofo ai, ʼo nā nonofo ai mo ia ʼi te ʼaho ʼaia. Neʼe ko te vaʼevaʼe hola fa afiafi.*
40 Ko Atelea, te tehina ʼo Simone Petelo, neʼe kau ia naua ʼae neʼe logo ki te ʼu palalau ʼae neʼe fai e Soane pea mo nā mulimuli ia Sesu.
41 Neʼe ʼuluaki felaveʼi mo tona tehina ko Simone pea neʼe ina ui fenei age: “Kua ma maʼu ia te Mesia” (ko tona fakaʼuhiga, “Kilisito”),
42 pea neʼe ina taki ia ia kia Sesu. ʼI te sio ʼa Sesu kia ia, neʼe ina ui fenei: “Ko koe ko Simone, te foha ʼo Soane. ʼE fakahigoaʼi anai koe ko Sefasi” (ko tona fakaliliu ko “Petelo”).
43 ʼI te ʼaho ake, neʼe fia mavae ʼo alu ki Kalilea. Neʼe felaveʼi leva ia Sesu mo Filipo pea neʼe ina ui fenei age: “Muli mai ia te au.”
44 Ko Filipo neʼe ko he tagata mai Petesaita, te kolo ʼo Atelea mo Petelo.
45 Neʼe felaveʼi ia Filipo mo Natanaele ʼo ina ui fenei age: “Kua matou maʼu ia ia ʼae neʼe tohi ʼo ʼuhiga mo ia e Moisese ʼi te Lao, pea mo te kau Polofeta: ko Sesu, te foha ʼo Sosefo, mai Nasaleti.”
46 Kaʼe neʼe ui fenei age e Natanaele: “ ʼE feala koa ke haʼu mai Nasaleti he meʼa ʼe lelei?” Neʼe tali fenei age e Filipo: “Haʼu ʼo sio.”
47 Neʼe sio ia Sesu ki te alu age ʼa Natanaele kia te ia, pea neʼe ina ui fenei ʼo ʼuhiga mo ia: “Koʼeni te tagata Iselaele totonu, ʼe mole maʼu ia ia he kaka.”
48 Neʼe fehuʼi fenei age e Natanaele kia te ia: “He koʼe ʼe ke iloʼi au?” Neʼe tali fenei age e Sesu: “ ʼI muʼa ʼo tou pauʼi e Filipo, ʼi tau heka ʼi te lalo fuʼu fiku, neʼe kua au sio kia koe.”
49 Neʼe ui fenei e Natanaele: “Lapi, ko koe ko te ʼAlo ʼo te ʼAtua, ko koe te Hau ʼo Iselaele.”
50 Neʼe ui fenei age e Sesu: “ ʼE ke tui koa he neʼe au ui atu neʼe au sio kia koe ʼi te lalo fuʼu fiku? ʼE ke sio anai ki he ʼu meʼa ʼe lalahi age ʼi te ʼu meʼa ʼaeni.”
51 Pea neʼe ina ui fenei leva kia ia: “ ʼE au tala moʼoni atu kia koutou, ʼe kotou sisio anai ki te ava ʼo te lagi pea mo te hake mo te hifo ʼa te kau ʼaselo ʼa te ʼAtua ki te Foha ʼo te tagata.”*
Nota
^ Peʼe “neʼe hage ko te ʼAtua.”
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “ ʼi te fatafata ʼo te Tamai.” Ko te aluʼaga ʼe ha ai ʼe maʼu e he tahi te ʼofa ʼo te ʼAtua.
^ Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “vaʼevaʼe hogofulu hola.”
^ Vakaʼi Te ʼu Kupu Mo ʼOna Fakaʼuhiga.