ʼUluaki Palalau
NEʼE tohi te Tohi-Tapu ʼaki te takitaki ʼa te ʼAtua ʼi te ʼu lea Fakahepeleo, mo Fakaalamea, pea mo Fakakeleka. Koia ʼe ʼaoga ke fakaliliu te Tohi-Tapu ki ni lea kehekehe ke fua lelei ai te Folafola ʼa te ʼAtua ki te hahaʼi ʼo “te ʼatu puleʼaga.” (Mateo 24:14) Ko te ʼu tohi ʼe ʼuafulu-ma-fitu mai ia Mateo kia Fakaha, ʼe fakahigoaʼi ko te “Koga Tohi-Tapu Fakakeleka Fakakilisitiano” koteʼuhi neʼe ʼuluaki tohi ʼi te Fakakeleka. Neʼe takitaki e te ʼAtua he kau faitohi Kilisitiano ʼi te temi ʼo te kau apositolo, ke natou tohi te ʼu tohi ʼaia.
Ko te Fakaliliu ʼo Te Malama Foʼou ʼo Te Koga Tohi-Tapu Fakakeleka Fakakilisitiano, neʼe ʼuluaki ta ʼi te Fakapilitania ʼi te taʼu 1950. ʼE fakatafito ki te tohi iloa Fakakeleka ʼa Westcott mo Hort, ʼae ʼe alu tahi mo te ʼu tohi Fakakeleka ʼafeā. Ko te Fakaliliu ʼo Te Malama Foʼou ʼe ina faigaʼi ke totonu te fakaliliu ʼo mulimuli ki te Fakakeleka. Ko te Tohi-Tapu Fakaʼuvea ʼaeni ʼe fakatafito ki te Tohi-Tapu Fakapilitania ʼo te taʼu 2013, pea mo faigaʼi ke taupau te totonu ʼo te fakaliliu.
Ko te huafa makehe ʼo te ʼAtua, ko Sehova, ʼe tuʼu tuʼa 241 ʼi te Fakaliliu ʼo Te Malama Foʼou ʼo Te Koga Tohi-Tapu Fakakeleka Fakakilisitiano. ʼUhi ko te maʼuhiga ʼo te fakatapuha ʼo te huafa ʼo te ʼAtua pea mo te ʼaoga ʼae ke fetapa te hahaʼi fuli ki te huafa ʼaia ke natou maʼu ai te haofaki, koia ʼi te fakaliliu ʼaeni neʼe toe fakatuʼu te huafa ʼo Sehova ki tona tuʼulaga totonu ʼi te Tohi-Tapu.—Mateo 6:9; Loma 10:13.
Ko te higoa, Fakaliliu ʼo Te Malama Foʼou, ʼe fakatafito ki te fakapapau ʼa te ʼAtua ʼo ʼuhiga mo he malama foʼou ʼe faitotonu ke fua lelei ai ki te tagata fuli. (2 Petelo 3:13) Ko te kau fakaliliu ʼe natou ʼoʼofa ki te ʼAtua te Tupuʼaga ʼo te Tohi-Tapu, pea ʼe natou logoʼi ʼe ko honatou maʼua makehe te fakaha ʼo ʼana manatu mo ʼana folafola ʼo faigaʼi ke totonu. Ko tamatou fakaʼamu ke tokoni te fakaliliu ʼaeni ki te kau lautohi fakamalotoloto ʼae ʼe natou faigaʼi ke “natou maʼu te ʼatamai malama totonu ʼo te moʼoni.”—1 Timoteo 2:4.
New World Bible Translation Committee
2021