Pesalemo 119:1-176
א [Alefa]
119 Manuʼia ia natou ʼae ʼe agatonu,ʼAe ʼe mulimuli ki te lao ʼa Sehova.
2 Manuʼia ia natou ʼae ʼe natou muliʼi ʼana fakamanatu,ʼAe ʼe natou kumi ia ia ʼaki tonatou loto katoa.
3 ʼE mole natou heʼe faitotonu,ʼE natou haʼele ʼi ʼona ala.
4 Neʼe ke fakatotonuKe matou muliʼi lelei ʼau lekula.
5 Ka na pau la neʼe feala ke au tuʼu malohiKe au muliʼi ʼau fakatotonu!
6 ʼE mole au ufiufi anai auMoka au sivisivi ʼau fakatotonu fuli.
7 ʼE au vikiʼi anai koe ʼaki he loto ʼe faitotonuMoka au ako ʼau fakamau ʼae ʼe totonu.
8 ʼE au mulimuli anai ki ʼau lekula.
ʼAua naʼa ke siʼaki ʼosi au!
ב [Peta]
9 ʼE taupau feafeaʼi anai e he tupulaga ke maʼa tona ala?
ʼAki tana nofo tokaga ʼo mulimuli ki tau folafola.
10 Neʼe au kumi koe ʼi toku loto katoa.
ʼAua naʼa ke tuku ke au hehe ʼo mamaʼo mai ʼau fakatotonu.
11 ʼE au taupau lelei tau folafola ʼi toku lotoKe mole au agahala ai kia te koe.
12 Sehova e, ke vikiʼi koe.Akoʼi mai ʼau lekula.
13 ʼE au kalagaʼi ʼaki ʼoku laugutuTe ʼu fakamau fuli ʼae neʼe ke tala.
14 ʼE au fakafiafia ʼi ʼau fakamanatuʼO laka age ia ʼi te ʼu koloa fuli ʼae ʼe maʼuhiga.
15 ʼE au fia metitasio ki* ʼau fakatotonu,
Pea mo sio fakamamaʼu ki ʼou ala.
16 ʼE au pipiki ki ʼau tonu.
ʼE mole au galoʼi anai tau folafola.
ג [Kimela]
17 Fai te meʼa ʼae ʼe lelei ki tau kaugana,Ke au maʼuli ai mo fakalogo ki tau folafola.
18 Avahi ʼoku mata ke au sio leleiKi te ʼu meʼa fakaofoofo ʼo tau lao.
19 ʼE au matapule ʼi te fenua.
ʼAua naʼa ke fufu mai kia au ʼau fakatotonu.
20 ʼE au fakaʼamu tuʼumaʼuKi ʼau fakamau.
21 ʼE ke fakatonutonuʼi te kau fiameʼalahi,Te kau malaʼia ʼae ʼe hehe ʼo mamaʼo mai ʼau fakatotonu.
22 Fakamamaʼo ia au te manuki mo te fehiʼa,He ʼe au fakalogo ki ʼau fakamanatu.
23 Tatau aipe pe ʼe fakatahitahi he kau ʼaliki ʼo palalau fakafeagai mai kia au,ʼE metitasio tau kaugana ki* ʼau lekula.
24 ʼE au pipiki ki ʼau fakamanatu,ʼE ko ʼoku faitokoni.
ד [Taleta]
25 ʼE au takoto ʼi te efu.
Taupau toku maʼuli ʼo mulimuli ki tau folafola.
26 Neʼe au fakaha atu ʼaku aga, pea neʼe ke tali mai.Akoʼi mai ʼau lekula.
27 Fakamahino mai te fakaʼuhiga ʼo ʼau lao,Ke au metitasio ki* ʼau gaue fakaofoofo.
28 Neʼe mole kei au fia moe ʼi toku lotomamahi.
Fakalotomalohiʼi au ʼo mulimuli ki tau folafola.
29 Fakamamaʼo ia au te ala ʼo te kaka,Mo ke ʼofa ia au ʼo foaki mai tau lao.
30 Neʼe au filifili te ala ʼo te agatonu.
ʼE au fakamoʼoni ʼe totonu ʼau fakamau.
31 ʼE au pipiki ki ʼau fakamanatu.
Sehova e, ʼaua naʼa ke tuku ke au lotovaivai.
32 ʼE au mulimuli fakamalotoloto anai ki* te ala ʼo ʼau fakatotonu,He ʼe ke tofa tona ala ʼi toku loto.*
ה [He]
33 Sehova e, akoʼi mai te ala ʼo ʼau lekula,Pea ʼe au muliʼi anai ʼo aʼu ki te fakaʼosi.
34 Foaki mai te ʼatamai,Ke au fakaʼapaʼapa ai ki tau laoPea ke au fakalogo ki ai ʼi toku loto katoa.
35 Takitaki au ʼi te ala ʼo ʼau fakatotonu,He ʼe au leleiʼia.
36 Fakafalele toku loto ki ʼau fakamanatu,Kae mole ki te ʼu koloa.
37 Fakahaga kehe ʼoku mata mai te meʼa ʼae ʼe mole hona ʼuhiga.Taupau toku maʼuli ʼi tou ala.
38 Fakahoko te fakapapau ʼae neʼe ke fai ki tau tagata kaugana,Ke manavasiʼi ai te hahaʼi kia te koe.*
39 Fakamamaʼo te ufiufi ʼae ʼe au tuʼania ki ai,
He ʼe lelei ʼau fakamau.
40 Tokagaʼi taku fakaʼamu ki ʼau fakatotonu.
Taupau toku maʼuli ʼuhi ko tau faitotonu.
ו [Vave]
41 Sehova e, fakaha mai tou ʼofa agatonu,Pea ke haofaki au ʼo mulimuli ki tau fakapapau.
42 Pea ʼe au tali anai kia ia ʼae ʼe ina laukoviʼi au,He ʼe au falala ki tau folafola.
43 ʼAua naʼa ke toʼo ʼi toku gutu te folafola ʼo te moʼoni,He ʼe au fakaʼamu ki tau fakamau.
44 ʼE au fia fakalogo tuʼumaʼu ki tau lao,ʼO talu ai.
45 ʼE au haʼele anai ʼi he koga meʼa fimalie,*He ʼe au kumi ʼau fakatotonu.
46 ʼE au palalau anai ki ʼau fakamanatu ia muʼa ʼo ni hau,Pea ʼe mole au ufiufi anai.
47 ʼE au pipiki ki ʼau fakatotonu,ʼEi, ʼe au manako ki ai.
48 ʼE au hiki anai ʼoku nima ki ʼau fakatotonu ʼae ʼe au manako ki ai,Pea ʼe au metitasioʼi* anai ʼau lekula.
ז [Saini]
49 Manatuʼi te folafola ʼae neʼe ke fai* ki tau tagata kaugana,ʼAe ʼe au maʼu ai he ʼamanaki.
50 ʼE ko toku fakapelepele ʼaia ʼi toku lotomamahi,He ʼe au maʼuli ʼuhi ko tau folafola.
51 ʼE vaʼi au e te kau fiameʼalahi,Kae ʼe mole au hehe mai tau lao.
52 Sehova e, ʼe au manatuʼi ʼau fakamau ʼo te temi muʼa,Pea ʼe au fimalie ai.
53 ʼE kovi toku ita ʼuhi ko te kau agakoviʼAe ʼe natou siʼaki tau lao.
54 ʼE hage ʼau lekula ko ni hivaʼI te ʼu koga meʼa fuli ʼae ʼe au nofo ai.
55 Sehova e, ʼe au manatuʼi tou huafa ʼi te poʼuliKe au fakalogo ai ki tau lao.
56 ʼE ko taku agamahani ʼaiaHe ʼe au fakalogo ki ʼau fakatotonu.
ח [Heti]
57 Ko Sehova ʼe ko toku vahe.Neʼe au fakapapau ke au fakalogo ki ʼau folafola.
58 ʼE au kole mamahi atu* ʼi toku loto katoa,Ke ke ʼofa mai kia au ʼo mulimuli pe ki tau fakapapau.
59 Neʼe au sivisivi ʼaku agaKe au toe haʼele ai ʼi ʼau fakamanatu.
60 ʼE au fakavilivili, ʼe mole au tuaiʼI te fakalogo ki ʼau fakatotonu.
61 ʼE takatakai au e te ʼu maea ʼa te kau agakovi,Kae ʼe mole au galoʼi tau lao.
62 ʼE au tuʼu ake ʼi te maʼupo ʼo fakafetaʼi kia te koeKi ʼau fakamau faitotonu.
63 ʼE au kaumeʼa mo natou fuli ʼae ʼe manavasiʼi kia te koe,Mo natou ʼae ʼe mulimuli ki ʼau lao.
64 Sehova e, ʼe fonu te kele ko tou ʼofa agatonu.Akoʼi mai ʼau lekula.
ט [Teta]
65 Neʼe ke fai te meʼa ʼae ʼe lelei ki tau kaugana,Sehova e, ʼo mulimuli pe ki tau fakapapau.
66 Akoʼi mai te aga fakapotopoto mo te ʼatamai malama,He ʼe au falala ki ʼau fakatotonu.
67 Neʼe au hehe* ʼi muʼa ʼo taku tau mo te mamahi,Kae ʼi te temi nei, ʼe au fakalogo ki tau folafola.
68 ʼE ke agalelei pea ʼe lelei ʼau gaue.
Akoʼi mai ʼau lekula.
69 ʼE ʼulihi au e te kau fiameʼalahi ʼaki ni loi,Kae ʼe au fakalogo ki ʼau lao ʼi toku loto katoa.
70 ʼE natou lotofefeka,Kae ʼe au pipiki au ki tau lao.
71 Neʼe ko he meʼa lelei ke au tau mo te mamahi,He neʼe au ako ai ʼau lekula.
72 ʼE lelei kia au te lao ʼae neʼe ke tala,ʼEi, ʼe lelei age ia ʼi ni piesi aulo mo siliva ʼe lauʼi afe.
י [Iota]
73 Neʼe ke faʼu au ʼaki ʼou nima.
Foaki mai te ʼatamaiKe au iloʼi ai ʼau fakatotonu.
74 ʼE fiafia ia natou ʼae ʼe manavasiʼi kia te koe ʼi tanatou sisio mai kia au,He ʼe au tuku taku ʼamanaki ki tau folafola.
75 Sehova e, ʼe au iloʼi ʼe faitotonu ʼau fakamau,Pea neʼe ke fakamamahiʼi au ʼuhi ko tau agatonu.
76 Fakalelei siʼou loto, ke fakapelepeleʼi au e tou ʼofa agatonu,ʼO mulimuli pe ki te fakapapau ʼae neʼe ke fai ki tau kaugana.
77 Manavaʼofa mai kia au ke au maʼuli ai,He ʼe au pipiki ki tau lao.
78 Ke ufiufi te kau fiameʼalahiHe ʼe natou fakamamahiʼi au kae mole hona tupuʼaga,*
Kae au metitasioʼi* anai au ʼau lao.
79 Ke toe liliu mai kia au ia natou ʼae ʼe manavasiʼi kia te koe,Pea mo iloʼi ʼau fakamanatu.
80 Ke mulimuli agatonu toku loto ki ʼau lekula,Ke mole au ufiufi ai.
כ [Kafa]
81 ʼE au fakaʼamu lahi ki tau haofaki,He ʼe au tuku taku ʼamanaki ki tau folafola.
82 ʼE fakaʼamu lahi ʼoku mata ki tau folafola,Kae ʼe au ui: “ʼE ke fakafimalieʼi anai au ʼafea?”
83 ʼE au hage ko he ʼaiʼaga vai ʼe magemage ʼuhi ko te kohu,Kae ʼe mole au galoʼi ʼau lekula.
84 ʼE talitali anai tau kaugana ia ʼaho ʼe fia?
Ko ʼafea ʼae ka ke fakahoko ai tau fakamau kia natou ʼae ʼe natou fakatagaʼi au?
85 ʼE keli e te kau fiameʼalahi ni luo moʼoku,Ia natou ʼae ʼe talagataʼa ki tau lao.
86 ʼE tuha ʼau fakatotonu fuli mo te falala.
ʼE fakatagaʼi au kae mole hona tupuʼaga. Haofaki au!
87 Neʼe meihiʼi pe ke pulihi au ʼi te kele,Kae neʼe mole au lituʼa ki ʼau lao.
88 Taupau toku maʼuli ʼo mulimuli pe ki tou ʼofa agatonu,Ke au fakalogo ai ki te ʼu fakamanatu ʼae neʼe ke tala.
ל [Lameta]
89 ʼE maʼu tau folafola ʼi selo,Sehova e, ʼei, ʼo talu ai.
90 ʼE maʼu tau agatonu mai he taʼiake ki he tahi taʼiake.
Neʼe ke fakatuʼu malohi te kele, ʼei, ke tuʼu maʼu ʼo talu ai.
91 ʼE natou* tuʼu ai ʼo kaku mai ki te temi nei ʼuhi ko ʼau fakamau,He ʼe ko ʼau kaugana fuli.
92 Ka na neʼe mole au pipiki ki tau lao,Neʼe au mate ʼi toku mamahi.
93 ʼE mole au galoʼi anai ʼi he temi ʼau lao,He neʼe ke taupau toku maʼuli ʼuhi ko ʼau lao.
94 Ko au ʼe ʼa koe, haofaki au,He ʼe au kumi ʼau lao!
95 ʼE lamalama au e te kau agakovi ke natou matehi au,Kae ʼe lahi taku tokagaʼi ʼau fakamanatu.
96 Neʼe au sio ʼe ʼi ai te gataʼaga ʼo te ʼu meʼa haohaoa fuli,Kae ʼe mole ʼi ai he gataʼaga ʼo ʼau fakatotonu.
מ [Mema]
97 ʼE au manako ʼosi ki tau lao!
ʼE au metitasio ki ai* ʼi te ʼaho katoa.
98 ʼE au liliu ʼo poto age ʼi ʼoku fili ʼuhi ko tau fakatotonu,Koteʼuhi ʼe au taupau ʼo talu ai.
99 ʼE au fakasiosio poto age ʼi ʼoku faiako fuli,He ʼe au metitasio ki* ʼau fakamanatu.
100 ʼE au ʼatamai age ʼi te kau matuʼa,He ʼe au fakalogo ki ʼau lao.
101 ʼE mole au fia haʼele ʼi he ala ʼe kovi,Ke au fakalogo ai ki tau folafola.
102 ʼE mole au fakamamaʼo mai ʼau fakamau,He ʼe ko koe ʼae ʼe ke akoʼi au.
103 ʼE malie ʼau folafola ʼi toku gutu,ʼEi, ʼe malie age ia ʼi te meli!
104 ʼE au ʼatamai ʼuhi ko ʼau lao.Koia ʼae ʼe au fehiʼa ai ki te ala ʼo te kaka.
נ [Nuna]
105 Ko tau folafola ʼe ko he malama taki ki ʼoku vaʼe,Pea ko he malama ki toku ala.
106 Neʼe au fakapapau ke au fakalogo ki ʼau fakamau faitotonu,Pea ʼe au fia fakahoko.
107 ʼE au lotomamahi ʼaupito.
Sehova e, taupau toku maʼuli ʼo mulimuli pe ki tau fakapapau.*
108 Sehova e, fakalelei siʼou loto, ke ke fiafia ʼi ʼaku fakavikiviki,*Pea mo ke akoʼi mai ʼau fakamau.
109 ʼE tuʼutamakiʼia tuʼumaʼu pe toku maʼuli,Kae ʼe mole au galoʼi tau lao.
110 Neʼe fakatuʼu e te kau agakovi he hele kia au,Kae neʼe mole au maliu kehe mai ʼau lao.
111 ʼE au fakamaʼuhigaʼi tuʼumaʼu ʼau fakamanatu,He ʼe ko te fiafiaʼaga ʼaia ʼo toku loto.
112 Neʼe au fakatotonu ke au fakalogo ki ʼau lekulaʼI te temi fuli pe, ʼo kaku ki te fakaʼosi.
ס [Sameke]
113 ʼE au fehiʼa ki te kau lotolotolua,Kae au manako au ki tau ia lao.
114 Ko koe toku nonoʼaga mo toku meʼa tali tau,He ʼe au tuku taku ʼamanaki ki tau folafola.
115 Hahaʼi agakovi, ʼaua naʼa kotou fakaovi mai kia au,Ke feala ai ke au fakalogo ki te ʼu fakatotonu ʼo toku ʼAtua.
116 Tokoni mai kia au ohage ko tau fakapapau,Ke feala ai ke au maʼuli.ʼAua naʼa ke tuku ke to noa taku ʼamanaki.
117 Tokoni mai ke au hao.Pea ʼe au tokaga tafito anai ki ʼau lekula.
118 ʼE ke siʼaki ia natou fuli ʼae ʼe maliu kehe mai ʼau lekula,He ʼe ko te hahaʼi malualoi mo kaka.
119 ʼE ke pulihi te kau agakovi fuli ʼo te kele ohage ko te sikoli.*
Koia ʼae ʼe au manako ai ki ʼau fakamanatu.
120 ʼE tete toku sino katoa ʼi taku tuʼania ʼae kia te koe,ʼE au tuʼania ʼau fakamau.
ע [Aini]
121 Neʼe au fai te meʼa ʼae ʼe totonu.
ʼAua naʼa ke tuku au kia natou ʼae ʼe natou gaohi koviʼi au.
122 Fai ke manuʼia ia meʼa fuli ki tau kaugana,Ke mole fakamamahiʼi au e te kau fiameʼalahi.
123 Kua nenefu ʼoku mata ʼi te fakatalitali ki tau haofakiPea mo tau fakapapau faitotonu.
124 Fakaha tou ʼofa agatonu ki tau kaugana,Pea mo akoʼi mai ʼau lekula.
125 ʼE ko au tau kaugana. Foaki mai te ʼatamai,Ke au mahino ai ki ʼau fakamanatu.
126 Kua hoko mai te temi gaue ʼo Sehova,He neʼe natou talagataʼa ki tau lao.
127 Koia ʼae ʼe au manako ai ki ʼau fakatotonuʼO laka age ia ʼi te aulo, ʼei, ʼi te aulo ʼae neʼe fakamaʼa.
128 ʼE au ui ʼe totonu ʼau lao fuli,ʼO au fehiʼa ai ki te ʼu ala fuli ʼo te kaka.
פ [Pe]
129 ʼE taulekaleka ʼau fakamanatu.
Koia ʼae ʼe au mulimuli ai ki ai.
130 Ka fakamahino ʼau folafola pea ʼe maʼu ai te malama,ʼE toe maʼu ai mo te ʼatamai e natou ʼae ʼe heʼeki popoto.
131 ʼE au fia inu ki ʼau fakatotonu,Koia ʼae ʼe au fakaʼamu lahi ai ki ai.
132 Haga mai ʼo ʼofa mai kia au,ʼO mulimuli ki te tonu ʼae neʼe ke fai kia natou ʼae ʼe manako ki tou huafa.
133 Fakamalohiʼi ʼoku lakaʼaga ʼaki tau folafola.ʼAua naʼa puleʼi au e he meʼa ʼe kovi.
134 Haofaki au mai ia natou ʼae ʼe natou gaohi koviʼi au,Pea ʼe au mulimuli ai anai ki ʼau fakatotonu.
135 Ke inaina tau kaugana e te malama ʼo tou fofoga,Pea ke ke akoʼi mai ʼau lekula.
136 ʼE hali ʼoku loʼimata
He neʼe mole fakalogo te hahaʼi ki tau lao.
צ [Sati]
137 Sehova e, ʼe ke faitotonu,Pea ʼe totonu ʼau fakamau.
138 ʼE totonu ʼau fakamanatu,Pea ʼe tuha ia mo te falala.
139 ʼE hage taku faʼafai kia te koe ko he afi kakaha,He neʼe galoʼi e ʼoku fili ʼau folafola.
140 ʼE maʼa* ʼaupito tau folafola,Pea ʼe manako ki ai tau kaugana.
141 ʼE mole hoku ʼuhiga pea ʼe fehiʼaʼinaʼi au.Kae neʼe mole au galoʼi ʼau lao.
142 ʼE heʼe gata tau faitotonu,Pea ʼe moʼoni tau lao.
143 Logope la taku tau mo te ʼu fihifihia pea mo te ʼu mamahi,Kae ʼe au pipiki aipe ki ʼau fakatotonu.
144 ʼE heʼe gata te faitotonu ʼo ʼau fakamanatu.
Foaki mai te ʼatamai ke au maʼuli ai.
ק [Kofi]
145 ʼE au tagi atu mo toku loto katoa. Sehova e, ke ke tali mai!
ʼE au fia mulimuli ki ʼau lekula.
146 ʼE au kole tokoni atu, haofaki au!
ʼE au fakalogo anai ki ʼau fakamanatu.
147 ʼE au ʼala ake kae heʼeki mafoa te ʼaho ʼo tagi atu ke ke haofaki au,He ʼe au tuku taku ʼamanaki ki ʼau folafola.
148 Neʼe au ʼala ʼi te poʼuli,Ke feala ai ke au metitasioʼi* tau folafola.
149 Fagono ki toku leʼo ʼo mulimuli pe ki tou ʼofa agatonu.
Sehova e, taupau toku maʼuli ʼi tau faitotonu.
150 ʼE fakaovi mai ia natou ʼae ʼe aga fakaufiufi,*ʼE natou mamaʼo ʼi tau lao.
151 Sehova e, ʼe ke ovi mai,Pea ʼe moʼoni ʼau fakatotonu fuli.
152 ʼE au iloʼi talu mai fualoa
Neʼe ke fakatuʼu ʼau fakamanatu ke talu ai.vר [Lesa]
153 Sio ki toku mamahi pea ke haofaki au,Koteʼuhi neʼe mole au galoʼi tau lao.
154 Puipui mo haofaki au.Taupau toku maʼuli ʼo mulimuli ki tau fakapapau.
155 ʼE mamaʼo te haofaki mai te kau agakovi,Koteʼuhi neʼe mole natou kumi ʼau lekula.
156 Sehova e, ʼe lahi tou manavaʼofa!
Taupau toku maʼuli ʼo mulimuli ki tau faitotonu.
157 ʼE kaugamalie ʼoku fili mo natou ʼae ʼe natou fakatagaʼi au,Kae neʼe mole au maliu kehe mai ʼau fakamanatu.
158 ʼE au sio fakalialia ki te hahaʼi kaka,He ʼe mole natou fakalogo ki tau folafola.
159 Sio, ʼe au manako ʼosi ki tau lao!
Sehova e, taupau toku maʼuli ʼo mulimuli pe ki tou ʼofa agatonu.
160 ʼE moʼoni tau folafola katoa,Pea ʼe heʼe gata ʼau fakamau faitotonu fuli.
ש [Sini] peʼe [Sihini]
161 ʼE fakatagaʼi au e te kau ʼaliki kae mole hona tupuʼaga,Kae ʼe au fakaʼapaʼapa ki ʼau folafola.
162 ʼE au fiafia ʼi tau folafola,Ohage ko he tahi ʼe ina maʼu ni koloa lalahi.
163 ʼE au fehiʼa ki te kaka, ʼei, ʼe au fakalialia ki ai.ʼE au manako ki tau lao.
164 ʼE au vikiʼi koe ʼo tuʼa fitu ʼi te ʼahoʼUhi ko ʼau fakamau faitotonu.
165 ʼE lahi te tokalelei ʼo natou ʼae ʼe manako ki tau lao,ʼE mole feala ke natou tukia ʼi he meʼa.
166 Sehova e, ʼe au ʼamanaki ki tau haofaki,Pea ʼe au fakalogo ki ʼau fakatotonu.
167 ʼE au mulimuli ki ʼau fakamanatu,Pea ʼe au manako lahi ki ai.
168 ʼE au fakalogo ki ʼau lao mo ʼau fakamanatu,He ʼe ke iloʼi ia meʼa fuli ʼae ʼe au fai.
ת [Tau]
169 Sehova e, ke kaku atu taku tagi!
Foaki mai te ʼatamai ʼae ʼe maʼu ʼi tau folafola.
170 Ke kaku atu taku kole.
Haofaki au ʼo mulimuli ki tau fakapapau.
171 Ke au vikiʼi tuʼumaʼu ia koe,He ʼe ke akoʼi mai ʼau lekula.
172 Ke au hiva tau folafola,He ʼe faitotonu ʼau fakatotonu fuli.
173 Ke tokalelei tou nima ʼo tokoni mai,He ʼe au filifili ke au fakalogo ki ʼau lao.
174 Sehova e, ʼe au fakaʼamu ki tau haofaki,Pea ʼe au pipiki ki tau lao.
175 Ke au maʼuli moʼo vikiʼi ʼo koe.Ke haofaki au e ʼau fakamau.
176 ʼE au taka ohage ko he ovi neʼe hehe. Kumi tau kaugana,He ʼe mole au galoʼi ʼau fakatotonu.
Nota
^ Peʼe “ako.”
^ Peʼe “ako tau kaugana.”
^ Peʼe “ako.”
^ Hep. “lele anai ʼi.”
^ Peʼe lagi “He ʼe ke foaki mai he lotofalala.”
^ Peʼe lagi “ʼAe neʼe ke fai kia natou ʼae ʼe manavasiʼi kia te koe.”
^ Peʼe “laulahi.”
^ Peʼe “ako.”
^ Peʼe “tau fakapapau.”
^ Hep. “fakamalū ifo tou fofoga.”
^ Peʼe “Neʼe au faihala ʼo agahala ai.”
^ Peʼe lagi “ʼaki ni loi.”
^ Peʼe “ako.”
^ ʼE fakaʼuhiga ki tana fakatupu fuli.
^ Peʼe “ako.”
^ Peʼe “ako.”
^ Peʼe “folafola.”
^ Hep. “ʼi te ʼu meʼa ʼofa ʼo toku gutu ʼae neʼe fai atu ʼaki te lotolelei.”
^ Peʼe “ʼotaʼota.”
^ ʼI te Fakahepeleo, ʼe fakaʼuhiga te kupu ʼaia ki te haka ʼo te ukamea ke toʼo ai te ʼu ʼotaʼota.
^ Peʼe “ako.”
^ Peʼe “fakalialia.”