Mateo 6:1-34
-
TE AKONAKI ʼI TE MOʼUGA (1-34)
-
ʼAua naʼa kotou fai he ʼu gaue ʼe lelei ke tokagaʼi ai koutou e te hahaʼi (1-4)
-
Te faʼahiga faikole ʼae ʼe lelei (5-15)
-
Te faikole ʼae neʼe akoʼi e Sesu ki te hahaʼi (9-13)
-
-
Te sesunio (16-18)
-
Te ʼu koloa ʼi te kele pea mo selo (19-24)
-
Tuku takotou tuʼania (25-34)
-
Kotou haga fakamuʼamuʼa ia te Puleʼaga (33)
-
-
6 “Kotou tokakaga ke ʼaua naʼa kotou fai he ʼu gaue ʼe lelei ia muʼa ʼo te hahaʼi ke natou tokagaʼi ai koutou, he ʼe mole kotou maʼu ai anai he fakapale mai takotou Tamai ʼae ʼe ʼi selo.
2 Koia ʼaua naʼa ke faiga ke tokagaʼi koe* moka ke foaki he ʼu meʼa ʼofa,* ohage ko tona fai e te kau malualoi ʼi te ʼu sinakoka pea mo te ʼu ala, ke fakakololiaʼi ai natou e te hahaʼi. ʼE au tala moʼoni atu kia koutou, kua natou maʼu katoa tonatou fakapale.
3 Kaʼe kia koe, ka ke foaki he ʼu meʼa ʼofa, ke mole iloʼi e tou nima hema te meʼa ʼae ʼe fai e tou nima mataʼu,
4 pea ke ke foaki fakafufu tou meʼa ʼofa. Pea ko tau Tamai ʼae ʼe sio kia meʼa fuli,* ʼe ina liufaki atu anai.
5 “Pea ka kotou faikole, ʼaua naʼa kotou hage ko te kau malualoi, koteʼuhi ʼe natou leleiʼia tanatou tutuʼu pea mo faikole ʼi te ʼu sinakoka pea mo te ʼu ala* lalahi ke sioʼi natou e te hahaʼi. ʼE au tala moʼoni atu kia koutou, kua natou maʼu katoa tonatou fakapale.
6 Kaʼe kia koe, ka ke faikole, ulu ki tou koga fale, pea ʼi tau ʼosi pupunu te matapa, faikole ki tau Tamai ʼae ʼe ʼi selo. Pea ko tau Tamai ʼae ʼe sio kia meʼa fuli,* ʼe ina liufaki atu anai.
7 Ka kotou faikole, ʼaua naʼa kotou lau liuliuga ʼakotou palalau ohage ko tona fai e te hahaʼi ʼo te malamanei, koteʼuhi ʼe natou manatu ʼe fagono anai te ʼAtua ki ʼanatou faikole ʼi te lahi ʼo ʼanatou palalau.
8 Kaʼe ʼaua naʼa kotou hage ko natou, koteʼuhi ʼe iloʼi e takotou Tamai te meʼa ʼae ʼe ʼaoga kia koutou ʼi muʼa ʼo takotou kole age kia te ia.
9 “Koia, ʼe tonu ke kotou faikole fenei:
“ ‘Ko tamatou Tamai ʼae ʼe ʼi selo, ke tapuha* tou huafa.
10 Ke hoko mai tou Puleʼaga. Ke fai tou finegalo ʼi te kele ohage ko selo.
11 Foaki mai hamatou meʼa kai* ʼi te ʼaho nei,
12 pea ke ke fakamolemole ʼamatou agahala,* ohage ko tamatou fakamolemole kia natou ʼae neʼe agahala mai kia matou.*
13 Pea ʼaua naʼa ke tuku matou ki te fakahala,* kaʼe ke ke haofaki matou mai ia Satana.’*
14 “Koteʼuhi kapau ʼe kotou fakamolemole ki te hahaʼi ʼanatou hala, pea ʼe toe fakamolemole atu anai kia koutou ia takotou Tamai ʼae ʼe ʼi selo,
15 kaʼe kapau ʼe mole kotou fakamolemole ki te hahaʼi ʼanatou hala, pea ʼe mole fakamolemole atu anai takotou Tamai ʼakotou hala.
16 “Moka kotou sesunio, ʼaua naʼa kotou hage ko te kau malualoi ʼo matamamahi, koteʼuhi ʼe mole natou fakamaʼa ʼonatou fofoga ke ha ai ki te hahaʼi ʼe natou sesunio. ʼE au tala moʼoni atu kia koutou, kua natou maʼu katoa tonatou fakapale.
17 Kaʼe kia koe, moka ke sesunio, fakamaʼa ʼou fofoga pea mo pani lolo tou ʼulu,
18 ke mole ha ki te hahaʼi ʼe ke sesunio kaʼe gata pe ki tau Tamai ʼae ʼe ʼi selo. Pea ko tau Tamai ʼae ʼe sio kia meʼa fuli* ʼe ina toe liufaki atu anai.
19 “Tuku takotou tanaki maʼa koutou he ʼu koloa ʼi te kele, ʼae ʼe ukaukamea mo kaina e te ʼu kiʼi manu pea ʼe feala ia ke kaihaʼa.
20 Kaʼe kotou tanaki maʼa koutou he ʼu koloa ʼi selo, ʼae ʼe mole ukaukamea mo kaina e te ʼu kiʼi manu pea ʼe mole feala ia ke kaihaʼa.
21 Koteʼuhi ko te faʼahi ʼae ʼe tuku ai tou koloa ʼe toe tuku ai foki mo tou loto.
22 “Ko te malama ʼo te sino ʼe ko te mata. Kapau ʼe tokaga tou mata ki he faʼahi pe ʼe tahi, pea ʼe malamagia anai tou sino katoa.
23 Kaʼe kapau ʼe tokaga tou mata ki te meʼa ʼae ʼe kovi,* pea ʼe fakapoʼuli anai tou sino katoa. Kapau ʼe mole maʼu ia koe te malama kaʼe ko te fakapoʼuli, ʼi fakapoʼuli gaogao leva!
24 “ ʼE mole feala ke kaugana he tahi ki he ʼu pule ʼe toko lua. Koteʼuhi ʼe fehiʼa anai ki te tahi kaʼe ʼofa ia ki te tahi, peʼe pipiki anai ki te tahi kaʼe ina meʼa noaʼi te tahi. ʼE mole feala ke kotou kaugana ki te ʼAtua pea mo te Paʼaga.
25 “Koia ʼe au tala atu kia koutou: Tuku takotou tuʼania ʼo ʼuhiga mo ʼokotou maʼuli* pe kotea ʼae ka kotou kai anai, mo inu anai, pea mo laofi anai. ʼE mole maʼuhiga age koa la ʼokotou maʼuli ʼi te meʼa kai pea mo te meʼa laofi?
26 Kotou tokagaʼi fakalelei ia te ʼu manulele, ʼe mole natou tūtū te pulapula peʼe utu peʼe tanaki ʼi te fale tanakiʼaga taʼukai, kaʼe ʼe fafaga natou e takotou Tamai ʼae ʼe ʼi selo. ʼE mole kotou maʼuhiga age koa la ia natou?
27 ʼE feala koa ke loaloaga age tokotou maʼuli ʼaki takotou tuʼania?
28 Pea he koʼe ʼe kotou tuʼania ki te meʼa laofi? Kotou ako mai te maʼuli lelei ʼo te ʼu lilio ʼo te vao, logo la tanatou mole kinakina pea mo faifilo,
29 kaʼe ʼe au tala atu kia koutou, maʼia mo Salomone, te tagata ʼae neʼe koloa’ia, neʼe mole teu ohage ko te ʼu lilio ʼaia.
30 Kapau ko te ʼAtua ʼe ina teuteuʼi feiaʼi te ʼu fisiʼi teu ʼo te vao ʼae ʼe maʼuli ʼi te ʼaho ʼaeni pea mo laku ki te afi apogipogi, pea ʼe mahino ia ʼe lahi ake anai tana teuteuʼi koutou, hahaʼi tui vaivai.
31 Koia ʼaua naʼa kotou tuʼania pea mo ui fenei: ‘Kotea ʼae ka matou kai anai?’ peʼe ‘Kotea ʼae ka matou inu anai?’ peʼe ‘Kotea ʼae ka matou laofi anai?’
32 Koteʼuhi ʼe ko te hahaʼi ʼo te malamanei ʼae ʼe natou faiga ki te ʼu meʼa fuli ʼaia. Kaʼe ʼe iloʼi e takotou Tamai ʼae ʼe ʼi selo ʼe ʼaoga kia koutou te ʼu meʼa ʼaia.
33 “Koia, kotou haga fakamuʼamuʼa ia te Puleʼaga pea mo tana faitotonu, pea ʼe toe foaki atu anai mo te ʼu meʼa fuli ʼaia kia koutou.
34 Pea ʼaua naʼa kotou tuʼania ki te apogipogi, koteʼuhi ʼe toe ʼi ai anai mo ʼona tuʼania. ʼE feʼauga pe te ʼaho takitahi mo ʼona fihifihia.
Nota ’i te lalo pasina
^ ʼI te Fakakeleka, “ ʼaua naʼa ke pupuhi te fakatagi pupuhi.”
^ Peʼe “meʼa ʼofa ki te kau masisiva.” Vakaʼi te kupuʼi palalau “Meʼa ʼofa ki te kau masisiva” ʼi Te ʼu Kupu Mo ʼOna Fakaʼuhiga.
^ Peʼe “sio mai he potu fakalilo.”
^ Peʼe “te ʼu magafa.”
^ Peʼe “sio mai he potu fakalilo.”
^ Peʼe “fakamaʼoniʼoni.”
^ ʼI te Fakakeleka, “pane.”
^ ʼI te Fakakeleka, “ ʼomatou maʼua.”
^ ʼI te Fakakeleka, “ ʼae ʼe tuʼu maʼua mai kia matou.”
^ Peʼe “ke matou to ki te fakahala.”
^ ʼI te Fakakeleka, “ia ʼae ʼe agakovi.”
^ Peʼe “sio mai he potu fakalilo.”
^ ʼI te Fakakeleka, “kapau ʼe kovi tou mata.”
^ ʼI te Fakakeleka, psukhê. Vakaʼi Te ʼu Kupu Mo ʼOna Fakaʼuhiga.