Mateo 5:1-48
-
TE AKONAKI ʼI TE MOʼUGA (1-48)
-
ʼE kamata faiakonaki ia Sesu ʼi te moʼuga (1, 2)
-
Natou ʼae ʼe manuʼia (3-12)
-
Te masima mo te malama (13-16)
-
Neʼe haʼu ia Sesu ke ina fakahoko te Lao (17-20)
-
Ni tokoni ʼo ʼuhiga mo te ita (21-26), te tono (27-30), te mavete ʼohoana (31, 32), te ʼu fakapapau (33-37), te lagavaka (38-42), te ʼofa ki te ʼu fili (43-48)
-
5 ʼI tana sio ki te hahaʼi kaugā malie, neʼe hake leva ki te moʼuga, pea ʼi tana ʼosi nofo ifo ki lalo, neʼe olo age ki ai ʼana tisipulo.
2 Pea neʼe kamata faiakonaki kia natou, ʼo ina ui fenei:
3 “Manuʼia ia natou ʼae ʼe natou mahino ʼe ʼaoga kia natou te ʼu meʼa fakalaumalie,* koteʼuhi ʼe ʼa natou anai ia te Puleʼaga ʼo selo.
4 “Manuʼia ia natou ʼae ʼe lotomamahi, koteʼuhi ʼe fakafimalieʼi anai natou.
5 “Manuʼia ia natou ʼae ʼe agamalū, koteʼuhi ʼe natou maʼu anai ia te kele.
6 “Manuʼia ia natou ʼae ʼe fia kakai pea mo fia iinu ki te faitotonu, koteʼuhi ʼe natou fimalie anai.
7 “Manuʼia ia natou ʼae ʼe manavaʼofa, koteʼuhi ʼe fakaha age anai kia natou te manavaʼofa.
8 “Manuʼia ia natou ʼae ʼe maʼa ʼonatou loto, koteʼuhi ʼe natou sisio anai ki te ʼAtua.
9 “Manuʼia ia natou ʼae ʼe natou kumi ke natou tokalelei mo te hahaʼi, koteʼuhi ʼe fakahigoaʼi anai natou ko te ʼu foha ʼo te ʼAtua.
10 “Manuʼia ia natou ʼae neʼe fakatagaʼi ʼuhi ko te faitotonu, koteʼuhi ʼe ʼa natou anai ia te Puleʼaga ʼo selo.
11 “Manuʼia ia koutou moka laukoviʼi pea mo fakatagaʼi koutou e te hahaʼi pea moka natou loi mo palalau kovi ʼo ʼuhiga mo koutou ʼuhi ko au.
12 Kotou fakafiafia lahi koteʼuhi ʼe lahi tokotou fakapale ʼi selo, he neʼe feia te fakatagaʼi ʼo te kau polofeta ʼi te temi muʼa.
13 “Ko koutou ko te masima ʼo te kele. Kaʼe kapau ʼe puli tona kona, ʼe feafeaʼi anai hana toe kona? ʼE mole kei ʼi ai hona ʼaoga kaʼe ʼe tonu ke laku ki tuʼa ke molomoloki e te hahaʼi.
14 “Ko koutou ko te malama ʼo te malamanei. ʼE mole feala ke u he kolo moka ʼe tuʼu ʼi he fuga moʼuga.
15 Pea moka tutu e te hahaʼi he malama, ʼe mole natou tuku anai ki he lalo kato* kaʼe ʼe natou hili anai ki he tuʼulaga malama, pea ʼe ina fakamalamaʼi ia natou fuli ʼae ʼi te loto fale.
16 ʼO toe feia mo koutou, ke mu tokotou malama ia muʼa ʼo te hahaʼi, ke natou sisio ai ki ʼakotou gaue lelei pea mo natou fakakololiaʼi ai takotou Tamai ʼae ʼe ʼi selo.
17 “ ʼAua naʼa kotou manatu neʼe au haʼu ke au molehi ia te Lao mo te ʼu akonaki ʼa te kau Polofeta. Neʼe mole au haʼu ke au molehi kaʼe ke au fakahoko.
18 ʼE au tala moʼoni atu kia koutou: ʼE feala ke molehi te lagi mo te kele. Kaʼe ʼe mole feala ke molehi he kiʼi mataʼi tohi ʼo te Lao, he ʼe fakahoko fuli anai.
19 Koia, ko he tahi pe ʼe ina maumauʼi he fakatotonu ʼi te ʼu fakatotonu liliki ʼaeni pea mo ina akoʼi ʼihi ke natou fai feia, ʼe fakahigoa anai ko he tahi ʼe veliveli ʼi te Puleʼaga ʼo selo. Kaʼe ko he tahi pe ʼe ina maʼuliʼi pea mo ina akoʼi ia te ʼu fakatotonu ʼaia, ʼe fakahigoa anai ko he tahi ʼe lahi ʼi te Puleʼaga ʼo selo.
20 Koteʼuhi ʼe au tala atu, kapau ʼe mole kotou faitotonu age ʼi te kau sekelipa mo te kau Faliseo, pea ʼe mole kotou hu anai ki te Puleʼaga ʼo selo.
21 “Neʼe kotou logo neʼe ui fenei kia natou ʼi te temi muʼa: ‘ ʼAua naʼa ke faifakapo, pea ko ʼae ʼe faifakapo ʼe ʼave anai ki te fakamauʼaga.’
22 Kaʼe ʼe au tala atu kia koutou, ko he tahi pe ʼe nofo mo hona ita ki tona tehina, ʼe ʼave anai ki te fakamauʼaga. Pea ko he tahi ʼe leakovi ki tona tehina, ʼe ʼave anai ki te Fakamauʼaga Lahi. Pea ko he tahi ʼe ina ui ki tona tehina: ‘Tagata ʼulu vale!’ ʼe feala ke li anai ki te Seʼeni.*
23 “Kapau ʼe ke ʼaumai tou molaga ki te ʼaletale pea mo ke manatuʼi ʼe mamahi tou tehina kia koe,
24 tuku tou molaga ʼi te muʼa ʼaletale pea ke alu. Fakatokatoka muʼa mo tou tehina, hili ia, pea ke toe liliu mai ʼo momoli tou molaga.
25 “Foimo fakatokatoka mo ia ʼae ʼe ina ʼave koe ki te fakamauʼaga, ʼi takolua lolotoga olo ki ai, naʼa ina tuku koe ki te tuʼi fakamau, pea ʼe tuku koe e te tuʼi fakamau ki te tagata leʼo pea pilisoniʼi leva koe.
26 ʼE au tala moʼoni atu kia koe, ʼe hoki ke mavae anai mai ai mo kapau kua ke huʼi fuli tou maʼua.*
27 “Neʼe kotou logo neʼe ui fenei: ‘ ʼAua naʼa ke tono.’
28 Kaʼe ʼe au tala atu kia koutou, ko he tahi ʼe haga sio ki he fafine ʼo holi malohi ki ai, kua tono ia ʼi tona loto.
29 Kapau ʼe ke higa ʼuhi ko tou mata mataʼu, haga ʼo kapeʼi pea mo ke li mamaʼo. Koteʼuhi ʼe lelei age kia koe ke puli he koga ʼo tou sino ʼi te li katoa ʼo tou sino ki te Seʼeni.*
30 Pea kapau ʼe ke higa ʼuhi ko tou nima mataʼu, haga ʼo tuʼusi pea mo ke li mamaʼo. Koteʼuhi ʼe lelei age kia koe ke puli he koga ʼo tou sino ʼi te alu katoa ʼo tou sino ki te Seʼeni.*
31 “Pea tahi ʼae, neʼe ui fenei: ‘Kapau ʼe mavete he tagata mo tona ʼohoana pea ʼe tonu ke ina fakatoʼo age he tohi mavete.’
32 Kaʼe ʼe au tala atu kia koutou, kapau ʼe mavete he tagata mo tona ʼohoana kaʼe neʼe mole ina fai he ʼu felaveʼi fakasino heʼe ʼaoga,* ʼe tono anai te fafine mo kapau ʼe toe ʼohoana. Pea ko he tahi ʼe ʼohoana mo he fafine feia kua mavete ʼe tono ia.
33 “Pea neʼe kotou logo neʼe ui fenei kia natou ʼi te temi muʼa: ‘ ʼAua naʼa ke holoʼi he fakapapau, kaʼe ʼe tonu ke ke fakahoko ʼau fakapapau ʼae neʼe ke fai kia Sehova.’*
34 Kaʼe ʼe au tala atu kia koutou: ʼAua naʼa kotou fai he fakapapau ʼo fakamoʼoni ʼaki te lagi, koteʼuhi ʼe ko te ʼafioʼaga ʼaia ʼo te ʼAtua,
35 peʼe ʼaki te kele, koteʼuhi ʼe ko te hiliʼaga ʼaia ʼo ʼona vaʼe, peʼe ʼaki ia Selusalemi, koteʼuhi ʼe ko te kolo ʼaia ʼo te Hau lahi.
36 Pea ʼaua naʼa ke fakapapau ʼo fakamoʼoni ʼaki tou maʼuli,* koteʼuhi ʼe mole feala ke ke fakaliliu ʼo hina peʼe ʼuli he fuluʼi ʼulu pe ʼe tahi.
37 Ko takotou ‘ ʼIo’ ke ʼio pea ko takotou ‘Kailoa’ ke kailoa, koteʼuhi ko te ʼu meʼa ʼae ʼe kotou hilifaki ki ai, ʼe haʼu ia mai te Agakovi.*
38 “Neʼe kotou logo neʼe ui fenei: ‘Mata ki te mata, nifo ki te nifo.’
39 Kaʼe ʼe au tala atu kia koutou: ʼAua naʼa kotou fakatutuʼu ki he tahi ʼe agakovi, kaʼe ki ʼae ʼe ina pāki koe ʼi tou kauʼahe mataʼu,* fakahaga age tou tahi kauʼahe.
40 Pea kapau ʼe fia ʼave koe e he tahi ki te fakamauʼaga ke ina maʼu tou kofu loto, toe tuku age ki ai mo tou pulupulu,
41 pea kapau ʼe fakamaʼua atu e he tahi ʼe takitaki ke ke ʼamo he kavega ʼi he kilometa ʼe tahi, hoko atu mo ia ʼi he ʼu kilometa ʼe lua.
42 Foaki kia ia ʼae ʼe kole tokoni atu, pea ʼaua naʼa ke lituʼa kia ia ʼae ʼe kole maʼua atu.*
43 “Neʼe kotou logo neʼe ui fenei: ‘ ʼE tonu ke ke ʼofa ki tou tatau kaʼe ke ke fehiʼa ki tou fili.’
44 Kaʼe ʼe au tala atu kia koutou: Kotou haga ʼoʼofa ki ʼokotou fili pea mo hufakiʼi ia natou ʼae ʼe natou fakatagaʼi koutou,
45 ke kotou liliu ai ko he ʼu foha ʼo takotou Tamai ʼae ʼe ʼi selo. Koteʼuhi ʼe ina fakahopo fakatatau ake tana laʼa ki te kau agakovi pea mo te kau agalelei pea ʼe ina fakato fakatatau ifo te ʼua ki te kau faitotonu pea mo te kau heʼe faitotonu.
46 Kapau ʼe kotou ʼoʼofa pe kia natou ʼae ʼe ʼoʼofa kia koutou, kotea te fakapale ʼe kotou maʼu ai? ʼE toe fai feia foki mo te kau tanaki tukuhau.
47 Pea kapau ʼe kotou fakaʼalofa pe ki ʼokotou tehina, kotea te meʼa maʼuhiga ʼe kotou fai? ʼE toe fai feia foki mo te kau matapule.
48 Koia ʼe tonu ai ke kotou haohaoa* ohage ko takotou Tamai ʼae ʼe ʼi selo, koteʼuhi ʼe haohaoa.
Nota
^ Peʼe “ia natou ʼae ʼe natou kolekole [ki te ʼAtua tona] laumalie.”
^ Ko he kato laulahi neʼe fakaʼaogaʼi moʼo fua te pulapula ohage ko te fulumeto.
^ Neʼe ko te faʼahi ʼae neʼe tutu ai te ʼu ʼotaʼota ʼi te tuʼa kolo ʼo Selusalemi. Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “te foʼi katalane fakaʼosi,” ko te foʼi piesi ʼe mole faʼa maʼuhiga.
^ Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, pornéïa. Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “ ʼaki tou ʼulu.”
^ ʼE fakaʼuhiga kia Satana.
^ Ko te pāki ʼo he tahi moʼo fakalainoaʼi pea mo fakalaga fuhu.
^ ʼE ko he maʼua ʼe mole liufaki anai mo hona tupu.
^ Peʼe “katoa.”