Acts of Apostles 7:1-60
7 Kaʼe neʼe fehuʼi fenei e te pelepitelo lahi: “ ʼE moʼoni koa te ʼu fakamatala ʼaeni?”
2 Neʼe ui fenei e Setefano: “ ʼU tagata, ʼu tehina pea mo tamai, kotou fagono mai. Neʼe ha ia te ʼAtua ʼo te kololia ki tatatou kui ko Apalahamo ʼi tana kei nofo ʼi Mesopotamia, ʼi muʼa ʼo tana alu ʼo nofo ʼi Halani,
3 pea neʼe ina ui fenei ki ai: ‘Mavae ʼi tou fenua pea mo ʼou kaiga pea ke alu ki te fenua ʼae ka au fakaha atu anai.’
4 Neʼe mavae leva ʼi te fenua ʼo te kau Kaletea ʼo alu ʼo nofo ʼi Halani. Pea hili te mate ʼo tana tamai, neʼe fakamavae ia ia e te ʼAtua mai ai, ʼo taki ki te fenua ʼaeni ʼe kotou maʼuʼuli ai nei.
5 Kaʼe neʼe mole ina foaki ki ai he moʼi kele ʼi te fenua ʼaeni, peʼe ko he koga meʼa pe ke tuʼu ai tona vaʼe. Kaʼe neʼe fakapapauʼi age e te ʼAtua ʼe ina foaki age anai maʼana te fenua ʼaeni, pea ki tona hakoga ki ʼamuli, logo la neʼe heʼeki ʼi ai hana tamasiʼi.
6 Pea neʼe ui age e te ʼAtua ki ai, ʼe liliu anai tona hakoga ko he kau matapule ʼi he fenua ʼe mole ʼa natou, pea ʼe fakapopulaʼi pea mo fakamamahiʼi* anai natou e te hahaʼi lolotoga taʼu ʼe 400.
7 Kaʼe neʼe ui fenei e te ʼAtua: ‘ ʼE au fakamauʼi anai te puleʼaga ʼae ʼe ina fakapopulaʼi anai natou, pea hili ia, ʼe natou mavae anai pea mo natou foaki mai anai kia te au he tauhi taputapu ʼi te koga meʼa ʼaeni.’
8 “Neʼe toe fai e te ʼAtua mo ia te fuakava ʼo te silikosisio. Pea neʼe liliu ia ko te tamai ʼa Isaake pea neʼe ina silikosisioʼi ia ia ʼi te valu ʼaho. Neʼe liliu ia Isaake ko te tamai ʼa* Sakopo, pea neʼe liliu ia Sakopo ko te tamai ʼa te ʼu pule famili* ʼe toko 12.
9 Pea neʼe maheheka te ʼu pule famili kia Sosefo pea neʼe natou fakatau ia ia ki te kau Esipito. Kaʼe neʼe nofo ia te ʼAtua mo ia,
10 pea neʼe ina haofaki ia ia mai ʼona mamahi fuli. Neʼe fakafealagia age e te ʼAtua ke ʼofainaʼi pea ke ina fakaha te poto ia muʼa ʼo Falaone, te hau ʼo Esipito. Pea neʼe ina fakanofo ia ia ke pule ki Esipito pea mo tona loto fale katoa.
11 Kaʼe neʼe to te hoge ʼi Esipito katoa pea mo Kanaane, ʼei, te toe mamahi lahi, pea neʼe mole feala ke maʼu e ʼatatou kui he meʼa kai.
12 Kaʼe neʼe logo ia Sakopo neʼe maʼu te meʼa kai ʼi Esipito, pea neʼe ina fekauʼi ki ai ʼatatou kui. Neʼe ko tana ʼuluaki fekauʼi ʼaia.
13 ʼI tona tuʼa lua leva, neʼe fakaha e Sosefo pe ko ai ia ia ki ʼona tehina, pea neʼe iloʼi e Falaone ia te famili ʼo Sosefo.
14 Neʼe fekauʼi leva e Sosefo ke kumi mai tana tamai ko Sakopo pea mo ʼona kaiga fuli, neʼe natou* toko 75.
15 Koia, neʼe hifo ia Sakopo ki Esipito pea neʼe mate ai, ʼo toe feia mo ʼatatou kui.
16 Pea neʼe ʼave ʼonatou hui ʼo tuku ki te fale maka ʼae neʼe totogi e Apalahamo ki te ʼu foha ʼo Amole ʼi Sekemi ʼaki he ʼu foʼi piesi siliva.
17 “ ʼI te fakaovi mai ʼo te temi ʼae neʼe tonu ke fakahoko ai te fakapapau ʼae neʼe fai e te ʼAtua kia Apalahamo, neʼe tuputupu ʼo kaugā malie ia te hahaʼi ʼi Esipito.
18 Neʼe fakanofo leva te tahi hau ʼi Esipito, neʼe mole ina iloʼi ia Sosefo.
19 Neʼe aga fakakaka ki te hahaʼi ʼo totatou lanu pea neʼe ina gaohi koviʼi ʼatatou tamai ʼo fakakinauʼi natou ke natou liakī ʼanatou kiʼi toe meamea, ke ʼaua naʼa natou maʼuʼuli.
20 ʼI te temi ʼaia neʼe tupu ia Moisese, pea neʼe matalelei ʼaupito.* Pea lolotoga mahina ʼe tolu neʼe fafaga* ia ia ʼi te loto fale ʼo tana tamai.
21 Kaʼe ʼi te temi ʼae neʼe fakakinauʼi ai ʼana matuʼā ke nā liakī* ia ia, neʼe toʼo e te ʼofafine ʼo Falaone ia ia ʼo ina taupau ohage pe ko hana tama.
22 Koia neʼe akoʼi age kia Moisese ia te poto katoa ʼo te kau Esipito. Neʼe malohi ʼi ʼana palalau pea mo ʼana gaue.
23 “ ʼI tona taʼu 40, neʼe hake leva ʼi tona loto* ke alu ʼo fakasiosio* ʼona tehina, te ʼu foha ʼo Iselaele.
24 ʼI tana sio ki te gaohi koviʼi ʼo te tahi ia natou, neʼe ina haofaki ia ia pea neʼe lagavaka maʼa ia ʼae neʼe gaohi koviʼi, ʼo ina matehi te tagata Esipito.
25 Neʼe manatu ia ʼe mahino anai ʼona tehina ʼe haofaki natou e te ʼAtua ʼaki tona nima, kaʼe neʼe mole natou mahino ki ai.
26 ʼI te ʼaho ake, neʼe alu kia natou, pea neʼe lolotoga fuhu he toko lua. Neʼe ina faigaʼi ke nā fakatokatoka, ʼo ina ui fenei: ‘ ʼU tagata, ʼe kolua tau tehina. He koʼe ʼe kolua fuhu?’
27 Kaʼe ko ia ʼae neʼe ina gaohi koviʼi tona tehina, neʼe ina humuki ia ia, ʼo ina ui fenei: ‘Ko ai ʼae neʼe ina fakanofo koe ke ke pule pea mo tuʼi fakamau kia matou?
28 ʼE ke fia matehi koa ia au ohage ko tau matehi ia te tagata Esipito ʼanafi?’
29 ʼI te logo ʼa Moisese ki ai, neʼe hola pea neʼe nofo ohage ko he matapule ʼi te fenua ʼo Matiane, ʼo ina maʼu ai ʼona foha ʼe lua.
30 “Hili taʼu ʼe 40, neʼe ha ia te ʼaselo kia ia ʼi te toafa ʼo te Moʼuga ʼo Sinai, ʼi te ulo ʼo te kiʼi fuʼu ʼakau talatala neʼe vela.
31 ʼI te sio ʼa Moisese ki te meʼa ʼaia, neʼe punamaʼuli ʼi te ha ʼaia. Kaʼe ʼi tana fakaovi ʼae ʼo vakavakaʼi, neʼe logo ki te leʼo ʼo Sehova,* ʼe ina ui fenei:
32 ‘ ʼE ko au te ʼAtua ʼo ʼau kui, te ʼAtua ʼo Apalahamo, mo Isaake pea mo Sakopo.’ Neʼe kamata tete ia Moisese pea neʼe mole fia hoko atu tana vakavakaʼi.
33 Neʼe ui fenei e Sehova* ki ai: ‘Huʼi ʼou taka, koteʼuhi ko te koga meʼa ʼae ʼe ke tuʼu ai ʼe ko he kele taputapu ia.
34 Kua au sio moʼoni ki te gaohi koviʼi ʼo taku hahaʼi ʼi Esipito, mo au logo ki tanatou lauga pea ʼe au hifo ʼo haofaki natou. ʼI te temi leva ʼaeni, ʼe au fekauʼi anai koe ki Esipito.’
35 ʼE ko Moisese ʼaia neʼe natou fakafisi ki ai, ʼo natou ui fenei: ‘Ko ai ʼae neʼe ina fakanofo koe ke ke pule pea mo tuʼi fakamau?’ Kaʼe ʼe ko ia totonu ʼae neʼe fekauʼi e te ʼAtua ʼaki te ʼaselo ʼae neʼe ha ki ai ʼi te kiʼi fuʼu ʼakau talatala, ke pule pea mo haofaki tana hahaʼi.
36 Neʼe fakamavae natou e te tagata ʼaia mai Esipito, mo ina fakahoko he ʼu meʼa fakaofoofo* pea mo he ʼu milakulo ʼi Esipito, mo te Tai Kula pea mo tanatou ʼi te toafa lolotoga taʼu ʼe 40.
37 “ ʼE ko Moisese ʼaia neʼe ina ui fenei ki te ʼu foha ʼo Iselaele: ‘ ʼE fakanofo anai e te ʼAtua ʼi ʼokotou tehina he polofeta ohage ko au maʼa koutou.’
38 Neʼe nofo ia Moisese ʼi te lotolotoiga ʼo te hahaʼi ʼo Iselaele ʼi te toafa, mo te ʼaselo ʼae neʼe palalau ki ai ʼi te Moʼuga ʼo Sinai pea mo ʼatatou kui. Pea neʼe foaki ki ai te ʼu folafola maʼuli mo taputapu, ke ina tuku mai kia tatou.
39 Neʼe mole fia fakalogo ʼatatou kui kia ia, kaʼe neʼe natou tuku keheʼi ia ia, pea ʼi ʼonatou loto, neʼe natou toe fia liliu ki Esipito,
40 ʼo natou ui fenei kia Alone: ‘Faʼu maʼa tatou he ʼu ʼatua ke natou takitaki tatou. Koteʼuhi ʼe mole tou iloʼi pe kotea ʼae kua hoko kia Moisese, ʼae neʼe ina fakamavae tatou mai te fenua ʼo Esipito.’
41 ʼI te temi ʼaia, neʼe natou faʼu leva he ʼuhiʼi pipi ʼo natou momoli he sakilifisio ki te taula ʼatua pea mo natou kamata fakafiafia ʼi te ʼu gaue ʼo ʼonatou nima.
42 Koia, neʼe mavae te ʼAtua mai ia natou pea mo ina tuku ke natou foaki he tauhi taputapu ki te kautau ʼo te lagi, ohage pe ko tona tuʼu fenei ʼi te tohi ʼo te kau Polofeta: ‘Hahaʼi ʼo Iselaele, ʼe mahino ia neʼe mole kotou foaki mai kia te au he ʼu molaga pea mo he ʼu sakilifisio lolotoga taʼu ʼe 40 ʼi te toafa.
43 Kaʼe neʼe ko te fale la ʼo Moloke pea mo te fetuʼu ʼo te ʼatua ko Lefani ʼae neʼe kotou fata, ia te ʼu fakatata ʼae neʼe kotou faʼu ke kotou atolasio ki ai. Koia, ʼe au fakaʼaunofo anai koutou ʼo mamaʼo atu ʼi Papiloni.’
44 “Neʼe nofo ʼatatou kui mo te tapenakulo* ʼi te toafa. Neʼe fakatotonu e te ʼAtua kia Moisese ke ina faʼu pea neʼe natou faʼu ʼo mulimuli ki te faʼifaʼitaki ʼae neʼe fakaha age ki ai e te ʼAtua.
45 Neʼe foaki age ki ʼatatou kui pea neʼe natou ʼave mo natou ʼi tanatou hu mo Sosue ki te kele ʼo te ʼu puleʼaga ʼae neʼe kapu e te ʼAtua ia muʼa ʼo ʼatatou kui. Neʼe tuku ai ʼo kaku ki te temi ʼo Tavite.
46 Neʼe ʼofainaʼi ia ia e te ʼAtua pea neʼe ina kole te fealagia ʼae ke ina foaki he nofoʼaga maʼa te ʼAtua ʼo Sakopo.
47 Kaʼe neʼe ko Salomone ʼae neʼe ina laga he ʼapi maʼa ia.
48 Kaʼe ʼe mole nofo ia te Maʼoluga ʼi he ʼu ʼapi neʼe laga e te tagata, ohage ko tona ui fenei e te polofeta:
49 ‘Ko te lagi ʼe ko toku ʼafioʼaga, pea ko te kele ʼe ko toku hiliʼaga vaʼe. Ko te faʼahiga ʼapi feafeaʼi koa ka kotou laga anai maʼaku? Ko te ui ʼaia ʼa Sehova.* Peʼe ʼifea koa toku maloloʼaga?
50 Neʼe mole ko toku nima koa la ʼae neʼe ina faʼu te ʼu meʼa fuli ʼaena?’
51 “ ʼU tagata uigataʼa ʼae ʼe mole silikosisioʼi ʼokotou loto pea mo ʼokotou taliga, ʼe kotou fakafeagai tuʼumaʼu ki te laumalie maʼoniʼoni. Ohage pe ko tona fai e ʼakotou kui, ʼe kotou fai feia mo koutou.
52 Neʼe ʼi ai koa he polofeta neʼe mole fakatagaʼi e ʼakotou kui? Neʼe natou matehi ia natou ʼae neʼe natou tala fakatomuʼa te haʼu ʼo te tagata faitotonu. Pea heʼeki faʼa fualoa, neʼe kotou lavakiʼi pea mo matehi ia ia.
53 Pea ko koutou ʼae neʼe kotou maʼu te Lao mai te ʼu ʼaselo, kaʼe neʼe mole kotou taupau.”
54 Koia, ʼi tanatou* logo ki te ʼu palalau ʼaia, neʼe natou iita kovi ai ʼi ʼonatou loto pea mo gugu nifo ʼi tanatou sisio ki ai.
55 Kaʼe neʼe fonu ia ʼi te laumalie maʼoniʼoni. Pea neʼe haga ki te lagi ʼo sio ki te kololia ʼo te ʼAtua pea mo Sesu ʼi te toʼomataʼu ʼo te ʼAtua,
56 pea neʼe ina ui fenei: “ ʼE au sio ki te lagi kua ava, pea mo te Foha ʼo te tagata* ʼi te toʼomataʼu ʼo te ʼAtua.”
57 Neʼe natou kalaga leʼo lahi leva, mo pupunu ʼonatou taliga pea mo feʼohofi fakatahi fuli ki ai.
58 Neʼe natou ʼave ia ia ki te tuʼa kolo ʼo taumakaʼi ia ia. Ko te kau fakamoʼoni ʼae neʼe natou tukugakoviʼi ia ia, neʼe natou tuku ʼonatou kofu tuʼa ʼi te ʼu vaʼe ʼo te tupulaga neʼe higoa ko Saulo.
59 ʼI tanatou lolotoga taumakaʼi ia Setefano, neʼe ina fai tana kole ʼaeni: “ ʼAliki Sesu, ʼe au tuku atu ki ʼou nima toku maʼuli.”*
60 Pea neʼe tuʼutuli ifo ʼo kalaga fenei: “Sehova,* ʼaua naʼa ke tauteaʼi natou ʼuhi ko tanatou agahala ʼaeni.” ʼI tana ʼosi fai te palalau ʼaia, neʼe mate leva.*
Nota
^ Peʼe “gaohi koviʼi.”
^ Peʼe lagi “Neʼe toe fai feia e Isaake kia.”
^ Peʼe “te ʼu pateliaka.”
^ ʼI te Fakakeleka, psukhê. Vakaʼi Te ʼu Kupu Mo ʼOna Fakaʼuhiga.
^ Peʼe “neʼe matalelei ia muʼa ʼo te ʼAtua.”
^ Peʼe “taupau.”
^ Peʼe “tuku feiaʼi.”
^ Peʼe “neʼe ina fakatotonu.”
^ Peʼe “ke alu ʼo vakavakaʼi.”
^ Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ Peʼe “he ʼu fakamelomelo.”
^ ʼI te Fakakeleka, “te fale la ʼo te fakamoʼoni.”
^ Vakaʼi Te ʼu Kupu Mo ʼOna Fakaʼuhiga.
^ ʼE fakaʼuhiga kia natou ʼae ʼe kau ki te Sanetualio. Vakaʼi te kupu “Sanetualio” ʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, pneuma. Vakaʼi te kupu “Laumalie” ʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “neʼe moe.”