Acts of Apostles 1:1-26
1 Teofile, neʼe au fai te ʼuluaki tohi ʼo ʼuhiga mo te ʼu meʼa fuli ʼae neʼe kamata fai e Sesu pea mo akonaki ki ai
2 ʼo kaku ki te ʼaho ʼae neʼe toʼo ake ai, ʼi tana kua ʼosi foaki te ʼu fakatotonu ʼaki te laumalie maʼoniʼoni ki te kau apositolo ʼae neʼe ina filifili.
3 Hili tana mamahi, neʼe ha tuʼa lahi kia natou ʼo fakamoʼoni papau ai kua maʼuli. Neʼe natou sisio kia te ia lolotoga ʼaho ʼe 40 pea neʼe palalau age ʼo ʼuhiga mo te Puleʼaga ʼo te ʼAtua.
4 ʼI tana nofo mo natou, neʼe ina fakatotonu fenei age: “ ʼAua naʼa kotou mavae ʼi Selusalemi kaʼe kotou haga fakatalitali ki te meʼa ʼae neʼe fakapapauʼi e te Tamai pea neʼe au fakaha atu.
5 ʼE moʼoni, neʼe faipapitema ia Soane ʼaki te vai, kaʼe ʼi te ʼu ʼaho ʼae ka hoa mai, ʼe papitemaʼi anai koutou ʼaki te laumalie maʼoniʼoni.”
6 Pea ʼi tanatou fakatahitahi, neʼe natou fehuʼi fenei kia te ia: “ ʼAliki, ʼe ko te temi koa ʼaeni ʼe ke liufaki ai te puleʼaga ki Iselaele?”
7 Neʼe ina ui fenei kia natou: “ ʼE mole ʼa koutou te iloʼi ia te ʼu temi peʼe ko te ʼu fasiga taʼu, he ʼe gata pe ki te Tamai ʼe feala ke ina fakatuʼutuʼu te ʼu faʼahi ʼaia.
8 Kaʼe ʼe kotou maʼu anai te malohi moka hifo mai ia te laumalie maʼoniʼoni kia koutou, pea ʼe kotou liliu anai ko ʼaku fakamoʼoni ʼi Selusalemi, mo Sutea katoa pea mo Samalia, ʼo kaku ki te ʼu potu taupotu ʼo te kele.”
9 ʼI tana ʼosi fai te ʼu palalau ʼaia, neʼe hake ki te lagi kaʼe natou lolotoga sioʼi ia ia. Neʼe ʼaofi leva ia ia e he ʼao pea neʼe mole kei feala hanatou sisio kia te ia.
10 Pea ʼi tanatou lolotoga sisio ki tana hake ʼaia ki te lagi, fokifa pe neʼe tutuʼu ʼi ʼonatou tafa te ʼu tagata ʼe toko lua neʼe nā teu hina.
11 Neʼe nā ui fenei: “ ʼU tagata ʼo Kalilea, he koʼe ʼe kotou tutuʼu ʼo sioʼi te lagi? Ko Sesu ʼae neʼe toʼo ake mai ia koutou ki te lagi, ʼe tatau pe anai tana haʼu mo tana alu ʼae ki te lagi, ohage ko takotou sisio ki ai.”
12 Neʼe natou mavae mai te Moʼuga ʼo Oliveto ʼo natou toe liliu ki Selusalemi ʼae neʼe mole tuʼu mamaʼo, ia teitei kilometa pe ʼe tahi.*
13 ʼI tanatou tau atu ki ai, neʼe natou hake ki te koga fale ʼi te lau fata, ʼae neʼe natou nonofo ai. Neʼe ko Petelo, mo Soane, mo Sakopo, mo Atelea, mo Filipo, mo Tomasi, mo Paletolomeo, mo Mateo, mo Sakopo te foha ʼo Alefeo, mo Simone te tagata faʼafai pea mo Sutasi te foha ʼo Sakopo.
14 Ko natou fuli ʼaia, ʼi te logo tahi, neʼe natou kataki ʼi te faikole, ʼo fakatahi mo ʼihi fafine, mo te ʼu tehina ʼo Sesu pea mo Malia, tana faʼe.
15 ʼI te ʼu ʼaho ʼaia, neʼe tuʼu ake ia Petelo ʼi te lotolotoiga ʼo te ʼu tehina (neʼe natou teitei toko 120) pea neʼe ina ui fenei:
16 “ ʼU tagata mo tehina, neʼe tonu ke hoko te folafola ʼae neʼe tala fakakikite e te laumalie maʼoniʼoni ʼaki ia Tavite ʼo ʼuhiga mo Sutasi, ʼae neʼe ina taki ia natou ʼae neʼe natou puke ia Sesu.
17 Koteʼuhi neʼe kau ia matou pea neʼe filifili ke kau ki te minisitelio ʼaia.
18 (Ko te tagata ʼaia, neʼe ina toʼo he moʼi kele ʼaki te totogi ʼo tana aga heʼe faitotonu, pea neʼe to ʼo muʼa tona ʼulu ki lalo, ʼo mafahi tona sino pea mo mavete katoa tona gakāu.
19 Neʼe iloʼi te faʼahi ʼaia e te hahaʼi fuli ʼo Selusalemi, koia neʼe fakahigoaʼi ai te moʼi kele ʼaia ʼi tanatou lea, ko Akeletama, ko tona fakaʼuhiga “Kele ʼo Te Toto.”)
20 Koteʼuhi neʼe tohi fenei ʼi te tohi ʼo te ʼu Pesalemo: ‘Ke lavaki tona nofoʼaga, ke mole toe nofoʼi,’ pea ‘Ke toʼo e he tahi kehe tana gaue taupau.’
21 Koia, ʼe maʼua ai ke filifili he tahi ʼi te ʼu tagata ʼae neʼe fakatahi mo tatou ʼi te temi katoa ʼae neʼe fakahoko ai e te ʼAliki ko Sesu ʼana gaue* ia tatou,
22 ʼo kamata mai tona papitemaʼi e Soane ʼo kaku ki te ʼaho ʼae neʼe toʼo ake ai mai ia tatou. Neʼe tonu ki te tagata ʼaia ke mamata ki tona fakatuʼuake ohage ko tatou.”
23 Koia, neʼe natou filifili te ʼu tagata ʼe toko lua, ko Sosefo ʼae ʼe higoa ko Palesapasi, ʼae ʼe toe higoa foki ko Susito pea mo Mateasi.
24 Pea neʼe natou faikole ʼo ui fenei: “Sehova,* ia koe ʼae ʼe ke iloʼi te ʼu loto ʼo te hahaʼi fuli pe, fakaha mai pe ko ai ʼae neʼe ke filifili ʼi te ʼu tagata ʼaeni ʼe toko lua
25 ke ina maʼu ia te minisitelio ʼaia pea mo te gaue fakaapositolo, ʼae neʼe liakī e Sutasi kaʼe mulimuli ki tona ala.”
26 Koia, neʼe natou toho, pea neʼe filifili leva ia Mateasi. Neʼe lau fakatahi leva ia ia mo te ʼu apositolo ʼe toko 11.
Nota
^ Peʼe “te loaloaga ʼo te fagona ʼi te ʼaho ʼo te Sapato.” Ko te loaloaga ʼo te fagona ʼae neʼe fakagafua ki he Sutea ke ina fai ʼi te Sapato.
^ ʼI te Fakakeleka, “neʼe hu ki loto pea mo hu ki tuʼa ia te ʼAliki ko Sesu.”
^ Vakaʼi Te ʼu Kupu Mo ʼOna Fakaʼuhiga.