Taʼaga Lea 10:1-32
10 Te ʼu taʼaga lea ʼa Salomone:
ʼE fakafiafiaʼi e he foha poto tana tamai,Kae ʼe fakamamahiʼi e he tama vale tana faʼe.
2 ʼE mole he ʼuhiga ʼo te ʼu koloa ʼae neʼe maʼu ʼi he aga fakakaka,Kae ko te faitotonu ʼe ina haofaki mai te mate.
3 ʼE mole tuku anai e Sehova te tagata faitotonu ke pakupaku,Kae ʼe mole ina foaki anai ki te kau agakovi te meʼa ʼae ʼe natou manumanū ki ai.
4 ʼE fakatupu masiva ni nima pikoʼelo,Kae ʼe koloaʼia ni nima faʼa gaue.
5 ʼE tanaki e te foha ʼae ʼe fakasiosio poto te taʼukai ʼi te temi mafana,Kae ʼe fakaufiufi te foha ʼae ʼe moe mate ʼi te temi ʼo te taʼukai.
6 ʼE maʼu e te tagata faitotonu ni tapuakina.Ka palalau te tagata agakovi ʼe ina fufu tana agamalohi.
7 ʼE manatuʼi anai te tagata faitotonu pea ʼe palalauʼi lelei anai,Kae ʼe galoʼi anai te higoa ʼo te agakovi.
8 ʼE mulimuli anai ia ia ʼae ʼe poto ki te ʼu fakatotonu,Kae ʼe malamalaki anai ia ia ʼae ʼe palalau vale.
9 ʼE haʼele fimalie anai ia ia ʼae ʼe agatonu,Kae ko ia ʼae ʼe pikopiko ʼona ala ʼe mole feala anai ke ina fufu te meʼa ʼae neʼe ina fai.
10 ʼE fakatupu mamahi ia ia ʼae ʼe kaka ʼo kemoʼi tona mata,Pea ʼe malamalaki anai ia ia ʼae ʼe palalau vale.
11 ʼE ko he matapuna ʼo te maʼuli te ʼu palalau ʼa te tagata faitotonu,Kae ka palalau te tagata agakovi ʼe ina fufu tana agamalohi.
12 ʼE fakatupu kē te fehiʼa,Kae ʼe ʼuʼufi e te ʼofa te ʼu lakahala fuli.
13 ʼE maʼu te poto ʼi te ʼu laugutu ʼo ia ʼae ʼe ina maʼu te fakasiosio tonu,Kae ko ia ʼae ʼe mole aga fakapotopoto ʼe fakatuʼā anai ʼaki te kauʼi ʼakau.
14 ʼE taupau lelei e natou ʼae ʼe natou maʼu te poto ia te ʼatamai malama,Kae ʼe fakatupu fihifihia te ʼu palalau ʼa te vale.
15 Ki he tagata, ʼe hage ʼona koloa ko he kolo tau.
Ko te mamahi ʼo te kau fakaʼofaʼofa ʼe ko tonatou masisiva.
16 ʼE maʼu te maʼuli ʼi te gaue ʼa te tagata faitotonu,Kae ʼe fakaʼaogaʼi e te tagata agakovi te fua ʼo tana gaue ki te agahala.
17 Ko ia ʼae ʼe ina tokagaʼi te fakatonutonu ʼe ko he ala ia* ʼe ina taki ʼihi ki te maʼuli,Kae ko ia ʼae ʼe ina meʼa noaʼi te valoki ʼe ina fakaheʼi natou.
18 ʼE kaka ia ia ʼae ʼe ina fufu tona fehiʼa,Pea ʼe vale ia ia ʼae ʼe ina folahi ni fasituʼu.
19 Ka lahi fau te palalau ʼa he tahi, ʼe lakahala,
Kae ko ia ʼae ʼe tokaga ki ʼana palalau, ʼe aga fakapotopoto.
20 ʼE hage te ʼalelo ʼo te tagata faitotonu ko te siliva ʼae neʼe fakamaʼa,Kae ʼe mole faʼa maʼuhiga te ʼu manatu ʼa te tagata agakovi.
21 ʼE fua lelei te ʼu palalau ʼa te tagata faitotonu ki te tokolahi,Kae ʼe mamate te kau agavale he ʼe mole natou aga fakapotopoto.
22 ʼE fakakoloa te tapuakina ʼa Sehova,Pea ʼe mole Ina hilifaki he mamahi ki ai.
23 ʼE meʼa noaʼi e te tagata agavale te aga fakaufiufi,Kae ʼe maʼu te poto e te tagata ʼae ʼe fakasiosio tonu.
24 ʼE hoko anai ki te tagata agakovi te meʼa ʼae ʼe tuʼania ki ai,Kae ʼe foaki anai ki te tagata faitotonu te meʼa ʼae ʼe fakaʼamu ki ai.
25 ʼE puli anai te tagata agakovi moka ʼosi to te afā,Kae ko te tagata faitotonu ʼe ko he fakatafito ia ʼe tuʼu ʼo talu ai.
26 Ohage ko te maninia ʼo te ʼu nifo ʼi te vinika, pea mo te ʼahu ki te ʼu mata,ʼE feia te tagata pikoʼelo ki tona pule.
27 ʼE fakatologa te maʼuli ʼi te manavasiʼi kia Sehova,Kae ko te ʼu taʼu ʼo te kau agakovi ʼe nounou anai.
28 ʼE ko he matapuna ʼo te fiafia te fakaʼamu ʼa te kau faitotonu,Kae ʼe puli anai te ʼamanaki ʼa te kau agakovi.
29 ʼE ko he kolo tau ki te tagata agatonu te ʼu aga ʼa Sehova,Kae ʼe ko he malaʼia ia ki te kau agakovi.
30 ʼE mole tukia anai te tagata faitotonu ʼi he temi,Kae ki te kau agakovi, ʼe mole natou toe maʼuʼuli anai ʼi te kele.
31 ʼE haʼu te poto mai te gutu ʼo te tagata faitotonu,Kae ko te ʼalelo fasituʼu ʼe pulihi anai ʼo talu ai.
32 ʼE iloʼi e te ʼu laugutu ʼo te tagata faitotonu te meʼa ʼae ʼe lelei,Kae ko te gutu ʼo te tagata agakovi, ʼe kaka pe ia.
Nota
^ Peʼe lagi “ ʼe haʼele ʼi te ala ʼae.”