Surat ha mga Taga-Colosas 4:1-18
4 Kamo nga mga agaron, tratara an iyo mga uripon ha matadong ngan patas nga paagi, kay maaram kamo nga may Agaron liwat kamo ha langit.+
2 Magpadayon ha pag-ampo,+ nga nagpapabilin nga nagmamata may kalabotan hito upod an pagpasalamat.+
3 Ha pariho nga panahon, ig-ampo liwat kami,+ nga an Dios mag-abri hin purtahan para han pulong basi maipasamwak namon an sagrado nga tinago mahitungod han Kristo, nga tungod hito nakagapos ako nga priso,+
4 ngan basi maipahayag ko ito hin klaro sugad han angay ko himoon.
5 Padayon kamo nga maglakat hin maaramon kon kaupod niyo an mga taga-gawas, nga ginagamit ha pinakamaopay nga paagi an iyo panahon.*+
6 An iyo mga pulong magin makaruruyag pirme, sugad hin tinimplahan hin asin,+ basi mahibaro kamo kon paonan-o kamo sadang bumaton ha tagsa nga tawo.+
7 Hi Tiquico+ nga akon hinigugma nga bugto ngan matinumanon nga ministro ngan igkasi-uripon ha Ginoo, an mag-iistorya ha iyo han ngatanan nga sumat mahitungod ha akon.
8 Pakakadaon ko hiya ha iyo basi hibaroan niyo an amon kahimtang ngan basi maliaw niya an iyo kasingkasing.
9 Makada hiya upod hi Onesimo,+ nga akon matinumanon ngan hinigugma nga bugto, nga tikang ha iyo; isusumat nira ha iyo an ngatanan nga nahitatabo didi.
10 Hi Aristarco+ nga akon igkasi-priso nangungumusta ha iyo, ngan sugad man hi Marcos,+ nga patod ni Bernabe (mahitungod ha iya nakakarawat kamo hin mga instruksyon nga abiabihon hiya+ kon kumada hiya ha iyo),
11 ngan hi Jesus nga gintatawag nga Justo, nga mga kaupod han mga tinuri. Ini la hira an akon mga igkasi-magburuhat para ha Ginhadian han Dios, ngan naghahatag hira hin daku nga pagliaw* ha akon.
12 Hi Epafras,+ nga uripon ni Kristo Jesus nga tikang ha iyo, nangungumusta ha iyo. Pirme hiya nangangalimbasog para ha iyo ha iya mga pag-ampo, basi ha kataposan bug-os nga makatindog kamo ngan may marig-on nga pagsarig ha ngatanan nga kaburut-on han Dios.
13 Kay testigo ako nga nangangalimbasog gud hiya para ha iyo ngan para ha mga taga-Laodicea ngan taga-Hierapolis.
14 Hi Lucas,+ an hinigugma nga doktor, nangungumusta ha iyo, ngan sugad man hi Demas.+
15 Ipaabot an akon pangumusta ha kabugtoan ha Laodicea ngan kan Nimfa ngan ha kongregasyon nga nagkakatirok ha iya balay.+
16 Ngan kon mabasa na ha iyo ini nga surat, paghikay nga basahon liwat ini+ ha kongregasyon han mga taga-Laodicea ngan basaha liwat niyo an surat nga akon iginpadara ha Laodicea.
17 Sugad man, sumati hi Arquipo:+ “Paghatag hin atensyon ha ministeryo nga ginkarawat mo ha Ginoo, basi matuman mo ito.”
18 Ako, hi Pablo, ako an nagsurat hini nga akon pangumusta.+ Hinumdumi niyo pirme an akon mga gapos ha kapriso.+ Hinaot makarawat niyo an diri matupngan nga pagkabuotan.
