Surat ha mga Taga-Colosas 1:1-29
1 Tikang kan Pablo, nga apostol ni Kristo Jesus pinaagi han kaburut-on han Dios, ngan kan Timoteo+ nga aton bugto,
2 para ha mga baraan ngan matinumanon nga kabugtoan nga kahiusa han Kristo ha Colosas:
Makarawat unta niyo an diri matupngan nga pagkabuotan ngan kamurayawan tikang ha Dios nga aton Amay.
3 Pirme kami nagpapasalamat ha Dios nga Amay han aton Ginoo nga hi Jesu-Kristo kon nag-aampo kami para ha iyo,
4 kay nakabati kami mahitungod han iyo pagtoo kan Kristo Jesus ngan han iyo gugma ha ngatanan nga baraan
5 tungod han paglaom nga iginreserba para ha iyo ha langit.+ Hinbatian na niyo hadto an mahitungod hini nga paglaom pinaagi han mensahe han kamatuoran han maopay nga sumat
6 nga nakaabot ha iyo. Sugad la nga an maopay nga sumat namumunga ngan nag-uuswag ha bug-os nga kalibotan,+ sugad liwat hito an nahitatabo ha iyo tikang ha adlaw nga hinbatian niyo ngan hinbaroan hin husto kon ano gud an diri matupngan nga pagkabuotan han Dios.
7 Ito an iyo hinbaroan kan Epafras+ nga aton hinigugma nga igkasi-uripon, nga matinumanon nga ministro han Kristo nga kasaliwan namon.
8 Nagsumat liwat hiya ha amon han iyo gugma ha espirituwal nga paagi.*
9 Ito liwat an hinungdan nga tikang ha adlaw nga hinbatian namon ito, waray gud kami undang ha pag-ampo para ha iyo+ ngan paghangyo nga mapuno unta kamo han husto nga kahibaro+ mahitungod han iya kaburut-on ha ngatanan nga kinaadman ngan pagsabot ha espirituwal nga mga butang,+
10 basi maglakat kamo nga takos kan Jehova* para bug-os nga mapalipay hiya samtang padayon nga namumunga kamo ha tagsa nga maopay nga buhat ngan nag-uuswag ha husto nga kahibaro mahitungod ha Dios;+
11 ngan hinaot maparig-on kamo han daku nga gahum uyon ha iya mahimayaon nga pagkagamhanan+ basi bug-os nga makailob kamo nga may pagpasensya ngan kalipay,
12 samtang nagpapasalamat kamo ha Amay nga binulig ha iyo nga magin kwalipikado nga makiangbit ha panurundon han mga baraan+ nga aada ha kalamrag.
13 Gintalwas kita niya tikang ha awtoridad han kasisidman+ ngan ginbalhin kita ngadto ha ginhadian han iya hinigugma nga Anak,
14 nga pinaagi ha iya nagkaada kita hin kagawasan pinaagi han lukat, an kapasayloan han aton mga sala.+
15 Hiya an dagway han diri nakikita nga Dios,+ an suhag han ngatanan nga linarang;+
16 kay pinaagi ha iya ginlarang an ngatanan nga iba pa nga butang ha langit ngan ha tuna, an mga butang nga nakikita ngan an mga butang nga diri nakikita,+ mga trono man ito o mga pagkaginoo o mga gobyerno o mga awtoridad. An ngatanan nga iba pa nga butang ginlarang pinaagi ha iya+ ngan para ha iya.
17 Hiya liwat an nauna ha ngatanan nga iba pa nga butang,+ ngan pinaagi ha iya an ngatanan nga iba pa nga butang ginpahinabo nga umeksister,
18 ngan hiya an ulo han lawas, han kongregasyon.+ Hiya an tinikangan, an suhag tikang ha mga patay,+ basi hiya an magin una ha ngatanan nga butang;
19 kay nalipay an Dios nga an ngatanan nga kabug-osan mag-ukoy* ha iya,+
20 ngan pinaagi ha iya maipahiuli ha iya kalugaringon an ngatanan nga iba pa nga butang+ pinaagi ha pakigmurayaw pinaagi han dugo+ nga iya ginpaagay ha pasakitan nga kahoy,* an mga butang man ha tuna o an mga butang ha langit.
21 Ha pagkamatuod, kamo nga hadto nahibulag ngan mga kaaway kay naghunahuna kamo han magraot nga mga buhat,
22 iya yana iginpahiuli pinaagi han unudnon nga lawas hito nga usa pinaagi han iya kamatayon, basi maipresentar kamo nga baraan ngan waray hugaw ngan waray maiaakusar ha iya atubangan+—
23 basta magpadayon kamo ha pagtoo,+ nakatukod ha pundasyon+ ngan marig-on,+ waray mahibulag tikang ha paglaom hito nga maopay nga sumat nga iyo hinbatian ngan iginsangyaw ha ngatanan nga linarang ha ilarom han langit.+ Mahitungod hini nga maopay nga sumat, ako, hi Pablo, nagin ministro.+
24 Nagrarayhak ako yana ha akon mga pag-antos para ha iyo kaopayan,+ ngan naieksperyensyahan ko an mga kasakitan han Kristo nga waray pa mahitabo ha akon unod para ha iya lawas,+ nga amo an kongregasyon.+
25 Nagin ministro ako hini nga kongregasyon uyon ha pagkatinaporan+ nga tikang ha Dios nga iginhatag ha akon para ha iyo kaopayan basi maisangyaw hin bug-os an pulong han Dios,
26 an sagrado nga tinago+ nga waray isumat ha naglabay nga mga sistema han mga butang*+ ngan ha naglabay nga mga henerasyon. Pero yana iginpahayag na ito ha iya mga baraan,+
27 nga ha ira nalipay an Dios nga ipahibaro dida ha mga nasud an mahimayaon nga karikohan hini nga sagrado nga tinago,+ nga amo an Kristo nga kahiusa niyo, an paglaom han iya himaya.+
28 Hiya an aton iginpapasamwak, ginpapahamangnoan an ngatanan ngan gintututdoan an ngatanan han ngatanan nga kinaadman, basi maipresentar naton an tagsa nga tawo hin bug-os nga kahiusa han Kristo.+
29 Tungod hini, maduruto gud ako nga nagbubuhat, nga nangangalimbasog pinaagi han iya kusog nga gamhanan nga nagios ha akon.+
