An tin-edyer nga hi Elaine nagsiring: “Han nakit-an ko nga an akon mga kaklase may-ada ginatos nga followers online, naghunahuna ako, ‘Wow—sikat hira!’ Ha pagkatinuod, medyo naawa ako.”

 Inabat ka na ba hin sugad? Kon oo, ini nga artikulo makakabulig ha imo basi malikayan an paghingyap nga magin sikat online.

•  Ano an mga peligro?

•  “Ilusyon ha pagin sikat”

•  Ano kaimportante an mga followers ngan likes?

•  Paghirot ha “pasimple nga paghambog”

 Ha Proberbios 22:1, an Biblia nasiring nga “an maopay nga ngaran mas maopay pilion kay han damu nga bahandi.” Salit okey la nga maghingyap hin maopay nga reputasyon—ngan maghingyap pa ngani nga maruyagan han iba.

 Pero usahay an hingyap nga karawaton han iba nagigin hingyap nga magin sikat. May-ada ba ito peligro? Hi Onya, nga 16 anyos, inuyon hito:

 “May mga tawo nga nagbubuhat hin delikado nga mga butang, sugad han paglayog tikang ha second floor han amon eskwelahan—basi la magin sikat.”

 Basi makuha an atensyon han ira mga igkasi-batan-on, an iba nagbi-video han ira delikado nga mga ginbubuhat ngan iginpu-post ito online. Pananglitan, damu nga tin-edyer an nag-a-upload han ira mga video nga nakaon hin sabon nga panlaba nga naka-capsule nga may makahirilo nga sulod—usa nga butang nga diri gud angay buhaton han bisan hin-o!

 An Biblia nasiring: “Ayaw kamo pagbuhat hin bisan ano . . . tungod hin pasikat.”—Filipos 2:3, Baraan nga Biblia.

 Hunahunaa ini:

•   Ano kaimportante ha imo an pagin sikat online?

•   Ibubutang mo ba ha peligro an imo kahimsog o kinabuhi basi la makakuha hin atensyon ngan karawaton han imo mga igkasi-batan-on?

 Pero diri man pirme delikado an ginbubuhat han mga tawo para la magin sikat. Pansina an ginsiring ni Erica, nga 22 anyos, parte ha mga tawo nga nagamit hin iba nga estratihiya:

 “Ginpu-post han mga tawo an mga piktyur han mag-opay nga nahitatabo ha ira nga baga hin iginpapakita an damu nira nga duok nga kasangkayan nga pirme nira nakakaupod. Tungod hito, nahuhunahuna han mga tawo nga sikat na gud hira.”

 Hi Cara, nga 15 anyos, nagsiring nga an iba nanlilimbong basi la hunahunaon han mga tawo nga sikat hira:

 “May nakikita ako nga mga tawo nga nagpu-post hin mga piktyur nga baga hin aadto hira ha parti pero an tinuod ada hira ha ira balay.”

 Gin-amin ni Matthew, nga 22 anyos, nga ginbuhat niya an pariho hito:

 “Nag-post ako hin piktyur ngan gin-tag ko an location nga baga hin aadto ako ha Mount Everest, bisan kon waray pa gud ako hingadto ha Asia!”

 An ginsisiring han Biblia: “Karuyag namon gumawi hin tangkod ha ngatanan nga butang.”—Hebreo 13:18.

 An dapat hunahunaon:

•   Kon nagamit ka hin social media, nag-post ka na ba hin diri tinuod basi magin mas sikat?

•    An iginpu-post mo ba nga mga piktyur ngan mga comment nagpapakita kon hin-o ka ngan kon ano an imo mga prinsipyo?

 Damu nga tawo an natoo nga an sekreto ha pagin sikat online amo an pagkaada hin damu nga followers ngan likes. Hi Matthew, nga gin-unabi na, nagsiring nga sugad hito an iya inabat:

 “Ginpapakianhan ko an mga tawo, ‘Pira na an imo followers?’ o ‘Pira an pinakadamu nga likes nga imo nakarawat?’ Para magdamu an akon followers, ginpa-follow ko bisan an diri ko kilala, kay naglalaom ako nga igpa-follow liwat nira ako. Nagkaada ako hingyap nga magin sikat, ngan tungod han social media nagtikakusog pa gud ito nga hingyap.”

 Hi Maria, nga 25 anyos, nakaobserba nga an pagkita han pipira nga tawo ha ira kalugaringon nakabase ha kadamu han followers ngan likes nga ira nakakarawat:

 “Kon an selfie han usa nga babaye gutiay la an nag-like, naghuhunahuna hiya nga diri hiya mahusay. Syempre, sayop gud ito nga panhunahuna, pero damu nga tawo an naabat hin sugad hito. Sugad hin hira mismo an nagbu-bully ha ira kalugaringon.”

 An ginsisiring han Biblia: “Diri kita magpaimportante ha kalugaringon, nag-aaghat hin pakigkompetensya ha usa kag usa, naaawa ha usa kag usa.”—Galacia 5:26.

 An dapat hunahunaon:

•   Kon nagamit ka hin social media, napapansin mo ba nga iginkukompara mo na an imo kalugaringon ha iba?

•    Mas importante ba ha imo an pagkaada damu nga followers kay ha pagkaada tinuod nga kasangkayan nga nahigugma ha imo?