May nakita ka na ba nga para ha imo magigin maopay nga bana o asawa? Kon amo, paonan-o mo masisiring kon hiya na ba an angay para ha imo?

 Importante nga hibaroan mo an iya tinuod nga kinaiya. Kay posible nga an pinakamahusay nga daraga bangin diri masasarigan o an pinakagwapo nga olitawo bangin diri maopay an moral. Syempre an karuyag mo makaupod an nagkakasinabot kamo—mag-angay an iyo personalidad ngan pariho an iyo mga tumong.—Genesis 2:18; Mateo 19:4-6.

 Kilalaha hin maopay an imo naruruyagan. Pero pagbantay! Kay bangin an imo kitaon an karuyag mo la makita. Salit ayaw pagdali-dali. Pangalimbasugi nga makilala an tinuod nga pagkatawo han imo naruruyagan.

 Damu nga mag-uyab an nagkikita ha panggawas la nga hitsura. Nakikita nira dayon an mga butang nga pariho nira naruruyagan: “Pariho an amon naruruyagan nga musika.” “Nag-i-enjoy kami ha pariho nga mga buruhaton.” “Nagkakauyon kami ha ngatanan nga butang!” Pero kinahanglan mahibaroan mo an iya tinuod nga kinaiya. Kinahanglan makilala mo an “an sulod nga pagkatawo han kasingkasing.” (1 Pedro 3:4; Efeso 3:16) Imbes nga magpokus ha iyo mga ginkakauyonan, bangin maopay nga hibaroan kon ano an iyo ginhihimo kon diri kamo nagkakauyon.

 Pananglitan, hunahunaa an masunod:

•   Ano an iya ginhihimo kon may-ada diri pagkasinabtanay—iya ba gin-iinsister an iya karuyag, bangin napadara ha “kasina” o “nakakadaot an [iya] panyakan”? (Galacia 5:19, 20; Colosas 3:8) O makatadunganon ba hiya—andam magpaumaya para ha kamurayawan kon waray man prinsipyo nga natatalapas?—Santiago 3:17.

•   Dominante ba hiya o maabugho? Karuyag ba niya hibaroan an ngatanan mo nga ginbubuhat? “May kilala ako nga mga mag-uyab nga nag-aaway kay an usa diri nagsusumat kon mapakain hiya,” siring ni Nicole. “Para ha akon, problema ito.”—1 Corinto 13:4.

•   Ano an pagkakilala ha iya han iba? Puydi mo kaistoryahon an mga nakilala gud ha iya, sugad han mga hamtong nga kabugtoan ha kongregasyon. Hito nga paagi mahibabaroan mo kon “maopay an ginsisiring mahitungod ha iya.”—Buhat 16:1, 2.