Bangin maghunahuna ka: ‘Diri ako sugad kabaltok basi hisgotan an science ngan kontrahon an ebolusyon.’ Ito an inabat ni Danielle. “Diri ko karuyag kontrahon an akon titser ngan mga kaklase,” siring niya. Nauyon hito hi Diana, “nawuwurok ako kon nangangatadongan hira gamit an mga termino ha science.”

 Pero an imo tumong diri nga magdaog ha mga argumento. Ngan an maopay hini kay diri mo kinahanglan magin genius ha science basi maisaysay kon kay ano nga para ha imo an paglarang an makatadunganon nga pagsaysay han pag-eksister han ngatanan nga butang.

 Tip: Gamita an simple nga pangatadongan han Biblia ha Hebreo 3:4: “An tagsa nga balay may nagtukod, pero an naghimo han ngatanan nga butang amo an Dios.”

 An batan-on nga hi Carol nangangatadongan uyon ha prinsipyo han Hebreo 3:4, siring niya: “Imadyina nga naglalakat ka ha kagurangan. Waray ka nakikita nga ebidensya nga may tawo dida hito. Katapos, tinamod ka ngan nakakita hin toothpick. Ano an imo huhunahunaon? Kadam-an an masiring, ‘May kinanhi na nga tawo.’ Kon an gutiay ngan diri importante nga butang sugad han toothpick usa nga pamatuod nga may tawo, labi na an uniberso ngan an ngatanan nga aada hito pamatuod gud nga may naghimo hito!”

 Kon may magsiring: “Kon tinuod an paglarang, hin-o man an naglarang han Maglalarang?”

 Puydi ka bumaton: “Diri karuyag sidngon nga tungod la kay diri naton nasasabtan an ngatanan mahitungod ha Maglalarang, waray na Maglalarang. Pananglitan, bangin waray ka nahibabaroan mahitungod ha tawo nga nagdisenyo han imo celfon, pero natoo ka la gihapon nga may tawo nga nagdisenyo hito, diri ba? [Tuguti nga bumaton.] Damu an aton mahibabaroan mahitungod ha Maglalarang. Kon karuyag mo, malilipay ako nga isumat ha imo an akon nahibaroan mahitungod ha iya.”

 An Biblia nasiring nga kinahanglan magin “andam [ka] pirme ha pagdepensa ha atubangan han ngatanan nga nangangaro hin rason han iyo paglaom, pero ginbubuhat ito nga may pagkamalumo ngan daku nga respeto.” (1 Pedro 3:15) Salit kinahanglan mo tagan hin atensyon an duha nga butang—kon ano an imo iyayakan ngan kon paonan-o mo ito iyayakan.

1.   Kon ano an imo iyayakan. An imo gugma ha Dios importante ngan ito an mag-aaghat ha imo nga magyakan. Pero an basta la pagsumat ha iba nga hinigugma mo an Dios diri igo basi makombinse hira nga an Dios an naglarang han ngatanan nga butang. Bangin maopay gud nga gumamit ka hin mga ehemplo tikang ha palibot basi ipakita kon kay ano nga makatadunganon nga tumoo ha paglarang.

2.   Kon paonan-o mo ito iyayakan. Magkaada kompyansa, pero ayaw pagin bastos o paghambog. Posible nga pamatian ka han mga tawo kon an imo panyakan nagpapakita nga ginrirespeto mo an ira gintotoohan ngan ginkikilala an ira katungod nga toohan an ira karuyag toohan.

    “Para ha akon, importante nga diri hunahunaon han iba nga nanginginsulto o napakamaaram ako. Diri magigin maopay an resulta kon hambog an akon panyakan.”—Elaine.

 “Kon diri kita andam,” siring han tin-edyer nga hi Alicia, “karuyag na la naton maghinilom basi diri maalohan.” Uyon ha ginsiring ni Alicia, importante an pag-andam basi maglampos. Hi Jenna nagsiring, “Mas komportable ako nga hisgotan an paglarang kon may inandam ako nga simple pero ginhunahuna hin maopay nga ehemplo nga masuporta ha akon gintotoohan.”

 Diin mo mabibilngan ito nga mga ehemplo? Damu nga batan-on an naglampos pinaagi ha paggamit han masunod nga mga materyal:

•  Ginlarang ba an Kinabuhi?

•  The Origin of Life—Five Questions Worth Asking

•  The Wonders of Creation Reveal God’s Glory (video)

•  An serye nga “May-ada ba Nagdisenyo Hito?” ha magasin nga Pagpamata! (I-type an “may-ada ba nagdisenyo hito” [upod an quotation mark] ha search box han Watchtower ONLINE LIBRARY.)

•  Gamita an Watchtower ONLINE LIBRARY para ha dugang nga pag-research.

 Bangin makabulig liwat ha imo an pagrepaso han naglabay nga mga artikulo hini nga serye, “Paglarang o Ebolusyon?”

1.  Bahin 1: Kay Ano nga Kinahanglan Tumoo ha Dios?

2.  Bahin 2: Why Question Evolution?

3.  Bahin 3: Why Believe in Creation?

 Tip: Pagpili hin mga ehemplo nga nakakakombinse ha imo. Mas masayon mo ito nga mahinunumdoman, ngan maisasaysay mo ito nga may kombiksyon. Pagpraktis kon paonan-o mo isasaysay an imo gintotoohan.