Sumala ha usa nga surbey, 80 porsyento ha mga batan-on ha Amerika an nag-aampo, pero katunga la ha ira an nag-aampo kada adlaw. Waray ruhaduha, an pipira ha ira naghuhunahuna, ‘An pag-ampo ba usa la nga paagi para magmaopay an akon pag-abat, o mas labaw pa hito?’

•  Ano an pag-ampo?

•  Namamati ba an Dios?

•  Ano an puydi ko ig-ampo?

•  An ginsisiring han imo mga igkasi-batan-on

 An pag-ampo tinuod nga pakig-istorya ha Maglalarang han ngatanan nga butang. Hunahunaa la an kahulogan hito! Hi Jehova labaw ha mga tawo ha ngatanan nga paagi, pero “diri hiya hirayo ha tagsa ha aton.” (Buhat 17:27) Ngani, mababasa ha Biblia inin makalilipay nga imbitasyon: “Magin duok ha Dios, ngan magigin duok hiya ha iyo.”​—Santiago 4:8.

 Paonan-o ka magigin duok ha Dios?

•   An usa nga paagi amo an pag-ampo​—hito nga paagi nakikig-istorya ka ha Dios.

•   An usa pa nga paagi amo an pag-aram han Biblia​—hito nga paagi “nakikig-istorya” an Dios ha imo.

 An sugad nga komunikasyon​—an pag-ampo ngan pag-aram han Biblia—​mabulig ha imo nga magkaada marig-on nga pakigsangkay ha Dios.

 “An pakig-istorya kan Jehova​—an pakigkomunikar ha Gihitaasi—​amo an usa han pinakadaku nga pribilehiyo han mga tawo.”​—Jeremy.

 “Kon iginsusumat ko kan Jehova pinaagi ha pag-ampo an akon mga inaabat, nagigin mas duok ako ha iya.”​—Miranda.

 Bisan kon natoo ka ha Dios​—ngan bisan kon nag-aampo ka ha iya—​bangin makuri hunahunaon nga namamati gud hiya. Kondi, ha Biblia hi Jehova gintatawag nga “Parapamati han pag-ampo.” (Salmo 65:2) Gin-aaghat ka pa ngani hito nga ‘ipasa ha iya an ngatanan mo nga kabaraka.’ Kay ano? ‘Kay nagtatagad hiya ha imo.’​—1 Pedro 5:7.

 Hunahunaa ini: Naggagahin ka ba hin panahon nga regular nga makig-istorya ha imo duok nga kasangkayan? Mahihimo mo liwat ito ha Dios. Regular nga makig-istorya ha iya pinaagi ha pag-ampo, ngan gamita an iya ngaran nga Jehova. (Salmo 86:5-7; 88:9) Ngani, gin-aaghat ka han Biblia nga “padayon nga mag-ampo.”​—1 Tesalonica 5:17.

 “An pag-ampo amo an pag-istorya namon ngan han akon langitnon nga Amay, diin iginsusumat ko an sulod han akon kasingkasing.”​—Moises.

 “Igin-iistorya ko kan Jehova hin detalyado an akon inaabat, pariho ha pakig-istorya ko ha akon nanay o ha akon duok gud nga sangkay.”​—Karen.

 An Biblia nasiring: “Ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo.”​—Filipos 4:6.

 Karuyag sidngon ba hito nga okey la mag-ampo mahitungod han imo mga problema? Oo! Ngani, an Biblia nasiring: “Ipasa ngadto kan Jehova an imo pinas-an, ngan bubuligan ka niya.”​—Salmo 55:22.

 Syempre, ha imo mga pag-ampo ha Dios, dapat diri la mga problema an imo ig-iistorya. “Diri magigin maopay an amon pagkamagsangkay kon makikig-istorya la ako kan Jehova para mangaro hin bulig,” siring han batan-on nga babaye nga hi Chantelle. “Inaabat ko nga dapat una an pagpasalamat, ngan dapat hilaba an lista han mga butang nga mapasalamaton ako.”

 Hunahunaa ini: Ano an mga butang nga imo iginpapasalamat? May nahuhunahuna ka ba nga tulo nga butang nga igpapasalamat mo kan Jehova yana nga adlaw?

 “Bisan an simple nga butang, sugad han pakakita hin mahusay nga bukad, mahimo magpagios ha aton nga mag-ampo hin pagpasalamat kan Jehova.”​—Anita.

 “Pamalandonga an usa han mga linarang nga nakakabilib ha imo o usa nga teksto ha Biblia nga nakabantad han imo kasingkasing, katapos, pasalamati hi Jehova tungod hito.”​—Brian.