“Taani naatettan deˈiyo wode, ubba galla ta ishay tana asatettaaninne haasayan qohiis. Taani aqo oyqqa simminkka ta bollotiya qohiyo gishshawu tana gakkiya qohoy attibeenna. Anne ta bolloy tana aylledan xeellidosona. Tana tarkka woranawu qoppaas.”—Madu, a Hindde.

 “Maccaasaa gakkiya qohoy kumetta saˈan aakkidoogaa,” Alamiya Payyatettaa Dirijjitee qonccissiis. He dirijjitee, heezzu maccaasaappe issinno I deˈo layttan issi wode asatettan woy mattuman qohoy gakkana danddayiyogaa yootiis.

 Nena hegaa malabay gakkidaba gidikko, neeni awan deˈinkka issi asi haasayan, asatettan woy mattuman nena qohana gaada hirggana danddayaasa. Hegaa mala mattumaa gaasuwan gakkiya qohuwappenne naaquwappe denddidaagan, ‘Maccaasi aynne maaddenna’ giidi qoppiya daro asaagaadan neeyyokka siyettana danddayees. Shin maccaasaabay tumuppe Xoossaa qofissii?

 Xiqisiya: “Xoossai . . . eta attumaasanne maccaasa medhdhiis.”—Doomettaabaa 1:27.

 Hegaa birshshettaa: Xoossay attuma asaanne macca asaa medhdhiis. I naaˈˈaayyokka bonchchoy bessiyabadan qoppees. Hegaa bollikka, azinay ‘ba machchiyo ba huuphedan siiqanaadan’ I koyees; qassi azinay ba machchee bolli iitabaa haasayiiddi woy qohiiddi O haarana bessenna. (Efisoona 5:33; Qolasiyaasa 3:19) Maccaasaa gakkiya qohuwabay Xoossaa qofissiyogee qoncce.

 “Taani naatettan deˈiyo wode ta dabboti mattuman tana qohidosona. Taayyo layttay 17 gidiyo wode, ta halaqay taani aara mattumaa gayttennaba gidikko tana oosuwappe yedettana giidi yashissiis. Taani gitaa gidido wode ta azinay, ta so asaynne ta shooroti tana bonchchennaagaa bessiyabaa oottidosona. Shin guyyeppe, ubbabaa Medhdhida Yihoowabaa b tamaaraas. I maccaasaa bonchchees. Hegee I tana siiqiyogaanne xoqqu ootti xeelliyogaa taani ammanettanaadan oottiis.”—Maariyo, Arjjenttiina.

 Xiqisiya: “Ishappe aadhdhidi ammanttiya laggee de7ees.”—Leemiso 18:24.

 Hegaa birshshettaa: Tumu laggee nena maaddana. Danddayettikko, neeni ammanettiyo urawu neeyyo siyettiyabaa yoota.

 “Taani mattuman qohettidoogaa 20u layttawu ooyyonne yootabeykke. Hegee taani ufayttennaadan, hirgganaadaaninne unˈˈettanaadan oottiis. Shin wurssettan, eeno giidi siyiya urawu tana gakkidabaa yootido wode, tumuppe woppu gaas.”—Elifo, Turkkiyye.

 Xiqisiya: “I intteyyo qoppiyo gishshau, inttena hirggissiya ubbabaa [Xoossaa] bolli olite.”—1 PHeexiroosa 5:7.

 Hegaa birshshettaa: Neeni woossiyo wode Xoossay tumuppe siyees. (Mazamure 55:22; 65:2) I neeyyo qoppiyo gishshawu, neeni tumuppe goˈˈiya asa gidiyogaa akeekanaadan maaddanawu koyees.

 “Yihoowabaa eridoogee qofan tana masunxxissidabaappe paxada woppu gaanaadan maaddiis. Haˈˈi taani Xoossaa woossananne tawu siyettiya ubbabaa awu yootana danddayays. I tawu siyettiyabaa tumuppe loytti akeekiya lagge mala.”—Aano, Beelize.

 Xiqisiya: “[Yihoowawu, neeni] aawi bainnaageetanne un77ettidaageeta morggiyaa oiqqada, asi biittappe merettidaagee, simmi mulekka eta yashissenna mala, eta waasuwaa siyaasa.” —Mazamure 10:17, 18.

 Hegaa birshshettaa: Maccaasaa keehi qohiyogaanne naaqiyogaa gujjin, pirdda paca ubbaa Xoossay matan xayssana.

 “Maccaasaanne yelaga macca naata gakkiya naaquwa Yihooway matan xayssanaagaa eriyogee, tawu qohuwappe pattiya xale mala gidiis. Hegee taani woppu gaanaadan oottiis.”—Roobertto, Mekisiiko.

 Geeshsha Maxaafay hidootaa yootiyoy ayba ogiyanakko, he hidootan neeni ammanettana danddayiyoy aybissakko, qassi Yihoowa Markkati ha wodiyan Geeshsha Maxaafaabaa yootiyogan harata waati maaddiyakko gujjada eranawu, miishsha qanxxennan yiidi nena haasayissanaadan oychcha.

 Attamettiya meran giigida ha huuphe yohuwa dawunloodda.