HAAPIIRAA 1
Te mau maitai ia haavî ia tatou iho
EAHA TE AURAA?
Te taata e haavî ia ˈna iho, e nehenehe oia . . .
-
e tiai no te fanaˈo i ta ˈna e hinaaro ra
-
e tapea ia ˈna ia haa ma te feruri ore
-
e rave faahope i te hoê ohipa ta ˈna e ore e au
-
e tuu i te maitai o vetahi ê na mua
NO TE AHA MEA FAUFAA?
E nehenehe te mau tamarii tei haapii i te haavî ia ratou iho e mau papu i mua i te faahemaraa noa ˈtu e hopoi mai te reira i te oaoa poto noa. Area te mau tamarii o te ore e haavî ia ratou iho, e nehenehe ratou . . .
-
e riro mai ei taata iria
-
e riro mai ei taata o te hepohepo hanoa
-
e puhipuhi i te avaava aore ra e rave i te raau taero
-
e amu i te maa e ere i te mea maitai no to ratou tino
Ua faaite te tahi hiˈopoaraa, i rotopu i te mau tamarii o te haavî ia ratou iho, mea iti roa tei maˈihia, tei fifihia i te pae faufaa e i mua atoa i te ture i to ratou paariraa mai. No reira te orometua Angela Duckworth i te haapiiraa teitei o Pennsylvanie i parau ai: “Mea faufaa roa ia haavî ia tatou iho.”
NAFEA IA HAAPII I TE TAMARII?
A haapii i te parau “Eita” e a tapea i ta oe parau.
ARATAIRAA BIBILIA: “Ia riro râ ta outou ‘E’ ei e, ta outou ‘Eita’ ei eita.”—Mataio 5:37.
E nehenehe te tamarii e tamata i te taui i te faaotiraa a to ratou metua ma te faariri noa ˈtu tei mua ratou i te taata. Ia fati te metua, e taa i te tamarii, no te taui i te “Eita” ei “E,” e titauhia ia faariri!
Ia parau râ te metua “Eita” e ia tapea oia i ta ˈna parau, e taa i te tamarii i te hoê haapiiraa faufaa roa i roto i te oraraa: Eita to tatou hinaaro e faatiahia i te mau taime atoa. Ua papai te taote David Walsh: “Te mea maere, te mau taata tei taa i tera haapiiraa faufaa, o ratou te mea oaoa aˈe! Aita tatou e tauturu ra i ta tatou tamarii ia faatiaturi tatou ia ratou e faatiahia to ratou hinaaro i te mau taime atoa.” a
Ia parau outou “Eita” i ta outou tamarii i teie nei â, ia paari mai oia, eita o ˈna e farii i te rave i te raau taero, i te taoto i te apiti na mua ˈˈe i te faaipoiporaa e i te rave i te peu ino.
A tauturu i ta outou tamarii ia taa e faahopearaa to ta ˈna mau faaotiraa.
ARATAIRAA BIBILIA: “Ta te taata hoi e ueue ra, o ta ˈna atoa ïa e ooti.”—Galatia 6:7.
Mea faufaa ia taa ta outou tamarii ia rave oia i te hoê ohipa, te vai ra te faahopearaa. Te auraa ia ore o ˈna ia haavî ia ˈna iho, e faahopearaa ino ta ˈna e ooti mai. Ia haa oia ma te feruri ore no to ˈna riri, e ape paha te taata ia ˈna. Mai te peu râ noa ˈtu te riri, ua ite o ˈna i te haavî ia ˈna iho aore ra i te faaoromai, e piri mai te taata ia ˈna. A tauturu i ta outou tamarii ia taa i te faufaaraa ia haavî ia ˈna iho ia maitai aˈe to ˈna oraraa.
A haapii i ta outou tamarii ia taa maitai eaha te mea faufaa roa ˈˈe.
ARATAIRAA BIBILIA: “Ia taa maitai ia outou eaha te mea faufaa roa ˈˈe.”—Philipi 1:10.
Ia haavî tatou ia tatou iho, eita noa tatou e ape i te rave i te mea ino, e rave atoa râ tatou i te mau ohipa faufaa noa ˈtu e ere i te mea anaanatae. A haapii i ta outou tamarii ia feruri eaha te mea faufaa roa ˈˈe e ia rave mai ta ˈna i faaoti. A tauturu i ta outou tamarii ia rave i te mea faufaa na mua. Ei hiˈoraa, ia rave oia i ta ˈna ohipa o te haapiiraa na mua ˈˈe e haere ai e hauti.
A horoa i te hiˈoraa maitai.
ARATAIRAA BIBILIA: “Ua horoa ˈtu hoi au i te hiˈoraa, mai ta ˈu i rave ia outou, ia na reira atoa ïa outou e tia ˈi.”—Ioane 13:15.
E hiˈo te tamarii i to outou huru i mua i te tupuraa e nehenehe ai outou e riri. Na roto i to outou hiˈoraa, a faaite mea maitai aˈe ia haavî ia outou iho. Ei hiˈoraa ia rave ta outou tamarii i te hoê mea ino, e riri anei outou aore ra e faaoromai outou?
a No roto mai i te buka No: Why Kids—of All Ages—Need to Hear It and Ways Parents Can Say It.