Te feia ua papu ia ratou eaha te mea maitai e te mea ino, e haapao ratou i te reira i roto i to ratou oraraa o te mau mahana atoa noa ˈtu aita te taata e hiˈo atu ra ia ratou. E haa atoa ratou ia au i te reira noa ˈtu eaha te tupuraa.

Na roto i te feia ta ratou e amuimui i te fare haapiiraa, te upaupa ta ratou e faaroo, te hohoˈa e te faanahoraa teata ta ratou e mataitai, aita ˈtura te tamarii e taa faahou ra eaha mau na te mea maitai e te mea ino.

Tera te ohipa e tupu ra i nia i te tamarii apî hau atu i te 12 matahiti. Te parau ra te tahi buka: “I tera faito matahiti, mea faufaa ia taa i te tamarii e rave rahi te turai ia ratou ia haa mai te rahiraa ia fariihia ratou. Mea faufaa ïa ia haapii ratou nafea ia rave i ta ratou iho faaotiraa ia au iho â i te mea maitai e te mea ino, noa ˈtu eita te mau hoa e au.” (Beyond the Big Talk) Mea titauhia ia haapii te metua i teie mau mea hou e raea ˈi i te tamarii tera faito matahiti.

A haapapu atu eaha te mea maitai e te mea ino.

ARATAIRAA BIBILIA: “Te feia paari . . . i te pae varua, [o] te feia o te faaohipa noa i to ratou feruriraa, a haapii atu ai ia ratou iho ia faataa ê i te maitai i te ino.”—Hebera 5:14, nota.

• A faaohipa i te parau tano no te ohipa maitai e te ohipa ino. I roto i te mau tupuraa o te mau mahana atoa, a faaite i te taa-ê-raa o te mea maitai e te mea ino. Ia haavare te tahi, e nehenehe outou e parau i te tamarii: “Mea ino ta ˈna i rave, e ere i te haerea afaro!” Ia faaite râ ta outou tamarii i te parau mau, e na ô ïa outou: “Mea maitai ta oe i rave, e taata afaro oe!” Ia ore te tahi e tauturu i te hoê ruhiruhia, e parau paha outou: “Mea ino ta ˈna i rave, e ere o ˈna i te taata maitai!” Ia tauturu râ ta outou tamarii i te ruhiruhia, e nehenehe outou e parau: “Ua hamani maitai oe ia ˈna, e taata maitai oe!” E taa ïa i te tamarii eaha te parau tano no te hoê ohipa maitai e no te hoê ohipa ino.

• A faataa no te aha outou e parau ai mea maitai aore ra mea ino. A haaferuri i te tamarii na roto i te mau uiraa mai teie te huru: No te aha mea maitai aˈe ia faaite i te haerea afaro? E nafea te haavare e tuino ai i te auhoaraa? No te aha mea ino ia eiâ? Ma te na reira, e haapii outou i te tamarii ia faaohipa i to ratou feruriraa no te faataa ê te maitai i te ino.

• A faaite e nafea te tamarii e faufaahia ˈi ia rave i te mea maitai. E nehenehe outou e parau: “Ia faaite oe i te haerea afaro, e tiaturi te taata ia oe!” Aore ra, “Ia hamani maitai oe i te taata, e faahoa ohie ratou ia oe!”

 A hiˈopoa te pee ra anei te taatoaraa o te utuafare i te hoê â aratairaa no nia i te mea maitai e te mea ino.

ARATAIRAA BIBILIA: “A tamau i te hiˈopoa . . . teihea huru taata outou.”—Korinetia 2, 13:5.

• Mai te peu e pee te taatoaraa o te utuafare i te hoê â aratairaa, e nehenehe ïa outou e parau ma te taiâ ore:

  • “Eita to matou utuafare e haavare.”

  • “Eita matou e tupai aore ra e tutuô i te taata.”

  • “Eita matou e parau iria aore ra e faaino i te taata.”

E ite te tamarii eita outou e horoa noa i te aratairaa, e faaohipa roa râ outou i te reira i roto i te oraraa.

• A paraparau pinepine e ta outou tamarii no nia i te mea maitai e te mea ino no to outou utuafare. A faaohipa i te mau tupuraa o te mau mahana atoa no te horoa ˈtu i te haapiiraa. A faaite i te taa-ê-raa i rotopu i to outou manaˈo no nia i te mea maitai e te mea ino, e te faaitehia ra i roto i te afata teata aore ra i te fare haapiiraa. A ani i ta outou tamarii: “Ahani o oe i roto i tera tupuraa, eaha ta oe e rave?” Aore ra, “I roto i tera tupuraa, eaha ta to tatou utuafare e rave?”

A tauturu i te tamarii ia hinaaro mau e rave i te mea maitai.

ARATAIRAA BIBILIA: “Ei manaˈo haava maitai noa to outou.”—Petero 1, 3:16.

• A haapopou ia rave te tamarii i te mea maitai. Ia rave ta outou tamarii i te mea maitai, a haapopou atu ia ˈna e a faataa no te aha mea maitai ta ˈna i rave. E nehenehe outou e parau: “Ua oaoa roa vau ia oe, ua faaite oe i te haerea afaro.” Ia faaite mai ta outou tamarii e ohipa ino ta ˈna i rave, a haapopou na mua ia ˈna no to ˈna faaiteraa mai i te parau mau. I muri mai outou e aˈo atu ai ia ˈna.

• A aˈo ia rave te tamarii i te mea ino. A tauturu i te tamarii ia taa ia rave oia i te ohipa ino, e faahopearaa to muri mai. Mea titauhia ia faataa i te tamarii no te aha mea ino ta ˈna i rave e mea nafea to ˈna haerea i taa ê ai i te aratairaa ta te utuafare e haapao ra. Eita vetahi metua e hinaaro e aˈo i ta ratou tamarii. Ma te paraparau râ no nia i te ohipa ino ta te tamarii i rave, e tauturu te reira ia ˈna ia faaohipa i to ˈna feruriraa ia faataa ê te maitai i te ino.