Koheleta 8:1-17
8 O vai tei tia i te taata paari? O vai tei ite e nafea ia faaafaro i te hoê fifi?* E anaana te hohoˈa mata o te hoê taata i to ˈna paari e e mǎrû mai to ˈna hohoˈa mata etaeta.
2 Te parau ra vau: “A auraro i te mau faaueraa a te arii+ no tei horeohia i te Atua.+
3 Eiaha e ru i te haere atu mai mua ia ˈna.+ Eiaha e paturu i te tahi noa ˈˈe ohipa ino,+ e nehenehe hoi ta ˈna e rave pauroa ta ˈna e hinaaro,
4 no te mea tei te arii te parau hopea.+ O vai hoi te nehenehe e parau ia ˈna: ‘Te aha nei oe?’”
5 Eita te taata o te haapao i te faaueraa e faaruru i te ati,+ e e ite te aau paari eaha te taime au e eaha te raveraa* e au.+
6 E taime hoi e e raveraa* to te mau ohipa atoa,+ mea rahi roa hoi te ati ta te huitaata e faaruru ra.
7 I te mea aita e taata i ite eaha te tupu, o vai ïa te nehenehe e faaite ia ˈna e nafea te reira e tupu ai?
8 Aita hoi e taata e mana to ˈna i nia i te puai ora* aore ra e nehenehe e haavî i te puai ora, aita atoa ïa e taata e mana to ˈna i nia i te mahana poheraa.+ Aita hoi e taata e tuuhia i te hiti i roto i te hoê tamaˈi, eita atoa ïa te ino e tuu i te feia o te rave i te ino ia ora ˈtu.*
9 Ua ite pauroa vau i te reira, e ua tuatapapa to ˈu aau i te mau ohipa atoa e ravehia ra i raro aˈe i te mahana, i te roaraa o te tau i faatere ai te taata i te taata no to ˈna iho ati.*+
10 E ua ite au i te feia ino i te hunaraahia, ratou tei matau i te haere i roto e i rapae i te vahi moˈa, oioi noa ˈtura râ ratou i te haamoˈehia i roto i te oire i na reira ˈi ratou.+ Mea faufaa ore atoa te reira.
11 No te mea aita i faautua-oioi-hia te ohipa ino,+ matau atura te aau o te taata i te rave i te ino.+
12 Noa ˈtu hoê hanere taime te raveraa te taata rave hara i te ino e e ora maoro oia, ua ite râ vau e maitai mai te feia e mǎtaˈu ra i te Atua mau, no te mea te mǎtaˈu ra ratou ia ˈna.+
13 Eita râ te taata ino e maitai mai,+ eita atoa to ˈna mau mahana o te au i te marumaru e faaroahia,+ no te mea aita oia e mǎtaˈu ra i te Atua.
14 E ohipa faufaa ore* te tupu ra i nia i te fenua: Te ravehia ra te taata parau-tia mai te huru ra ua rave ratou i te ino,+ e te ravehia ra te taata ino mai te huru ra ua rave ratou i te ohipa parau-tia.+ Te parau nei au mea faufaa ore atoa te reira.
15 Ua parau ïa vau i te taata ia oaoa,+ aita ˈtu hoi e mea maitai aˈe no te taata i raro aˈe i te mahana ia tamaa, ia inu e ia oaoa. Ia na reira oia a rave ai i te ohipa rohirohi i te roaraa o te mau mahana o to ˈna oraraa,+ ta te Atua mau e horoa no ˈna i raro aˈe i te mahana.
16 Ua faaoti to ˈu aau e titau i te paari e e ite i te mau ohipa atoa e tupu ra i nia i te fenua,+ ma te ore atoa e taoto i te ao e te po.*
17 E tuatapapa ihora vau i te mau ohipa atoa a te Atua mau, e ite ihora vau e eita e taa i te huitaata te ohipa e tupu ra i raro aˈe i te mahana.+ Tutava noa ˈtu â te taata, eita e taa ia ratou. Noa ˈtu e parau ratou ua navai to ratou paari no te ite i te reira, eita e taa roa ia ratou te reira.+
Nota i raro i te api
^ Aore ra “ia tatara i te auraa o te hoê parau?”
^ Aore ra “haavaraa.”
^ Aore ra “haavaraa.”
^ Huri-atoa-hia “te ino o te feia ino e nehenehe e faaora ia ratou.”
^ Aore ra “ino.”
^ Aore ra “au ore.”
^ Huri-atoa-hia “a ore ai te taata e taoto i te ao e i te po.”
