NE FATOA fakafesilisili aka ne se tino fai sukesukega a talavou e toko 800 tupu mai i fakapotopotogā lotu e silia atu i te sefululua, me e tali‵tonu olotou lotu i a Iesu e tali mai ne ia a ‵talo io me ikai. E sili atu i te 60 pasene ne fai mai me e tali‵tonu katoatoa latou me e tali mai ne ia. Kae e tokotasi te talavou ne ‵solo ne ia te igoa o Iesu kae ne tusi mai me ko te “Atua” eiloa.

Se a tau faka‵tau? E mata, e ‵tau o fai atu ‵tou ‵talo ki a Iesu io me ki te Atua? * Ke maua te tali, ke na mafau‵fau muamua tatou ki te auala ne fakaakoako ei ne Iesu ana soko ke ‵talo atu.

Ne akoako kae fakaasi mai ne Iesu ki a tatou a te tino e ‵tau o ‵talo atu ki ei.

ANA AKOAKOGA: I te taimi ne fesili atu ei ki a Iesu sena soko e tokotasi, “Te Aliki, akoako mai ki a matou te faiga o te ‵talo,” ne tali atu a Iesu: “I so se taimi e ‵talo ei koutou, fai atu penei: ‘Te Tamana.’” (Luka 11:1, 2) E se gata i ei, i tena Lāuga takutakua i luga i te Mauga, ne fakamalosi atu a Iesu ki ana tino fakalogo‵logo ke ‵talo atu. Ana muna: “‵Talo ki tou Tamana.” Ne toe fakatalitonu atu a ia ki a latou mai te fai atu: “E iloa ne te Atua a mea kolā e ma‵nako koutou ki ei a koi tuai o fakatagi atu koutou.” (Mataio 6:6, 8) I tena toe po e pelā me se tino, ne fai atu a Iesu ki ana soko: “Kafai e fakatagi atu koutou ki te Tamana mō so se mea, ka tuku atu eiloa ne ia ki a koutou a te mea tenā i toku igoa.” (Ioane 16:23) Ne akoako ei ne Iesu a tatou ke ‵talo atu ki tena Tamana mo te ‵tou Tamana, ko Ieova te Atua.—Ioane 20:17.

TENA FAKAAKOAKOGA: E ‵tusa mo te auala ne akoako ne ia a nisi tino ke ‵talo atu, ne ‵talo atu foki eiloa penā a Iesu: “E tavae koe ne au i mua o tino katoa e toku Tamana, te Aliki o te lagi mo te lalolagi.” (Luka 10:21) I te suā taimi, “ne ‵ti aka a mata o Iesu ki te lagi kae fai atu: ‘Toku Tamana, au e fakafetai atu ki a koe me ko fakalogologo mai koe ki a au.’” (Ioane 11:41) Kae i te taimi ko pili ei o mate, ne ‵talo atu a Iesu: “Toku Tamana, ko tuku atu ne au toku ola ki ou lima.” (Luka 23:46) I te ‵talo atu ki tena Tamana faka-te-lagi—te “Aliki o te lagi mo te lalolagi”—ne tuku mai ei ne Iesu se fakaakoakoga manino ke tau‵tali atu tatou katoa ki ei. (Mataio 11:25; 26:41, 42; 1 Ioane 2:6) E mata, tenā eiloa te malamalama o soko mua o Iesu i ana akoakoga?

I loto i nai vaiaso mai tua o te fokiatuga o Iesu ki te lagi, ne maneanea kae fakamatakutaku atu a tino ‵teke ki soko o Iesu. (Galuega 4:18) E tonu, ne ‵talo atu latou—kae ko oi ne ‵talo atu latou ki ei? “Ne ‵talo fakatasi ei latou ki te Atua,” ke fesoasoani atu ki a latou “i te igoa o [tena] tavini tapu, ko Iesu.” (Galuega 4:24, 30) Tela la, ne tau‵tali atu eiloa a soko o Iesu ki te fakatakitakiga ne tuku mai ne Iesu e uiga ki te faiga o ‵talo. Ne ‵talo atu latou ki te Atua, kae e se ki a Iesu.

I te fia o tausaga mai tua ifo, ne fakamatala mai ne te apositolo ko Paulo a te auala ne ‵talo atu ei a ia mo ana taugasoa. Ne fai atu a ia i tena tusi ki ana taina Kelisiano: “E fakafetai atu faeloa matou ki te Atua te Tamana o te ‵tou Aliki ko Iesu Keliso i omotou talosaga mō koutou.” (Kolose 1:3) Ne tusi mai foki a Paulo ki ana taina tali‵tonu e uiga ki te “fakafetai atu faeloa [a ia] ki te ‵tou Atua telā ko te Tamana mō mea katoa, i  te igoa o te ‵tou Aliki ko Iesu Keliso.” (Efeso 5:20) Mai pati konei, e lavea ei ne tatou me i a Paulo ne ‵talo atu “faeloa’ ki tena ‘Atua te Tamana mō mea katoa’—kae e ‵talo atu eiloa i te igoa o Iesu.—Kolose 3:17.

E pelā mo Kelisiano mua, e mafai foki o fakaasi atu ‵tou a‵lofa ki a Iesu mai te faka‵logo ki ana pati fakatonutonu e uiga ki te faiga o ‵talo. (Ioane 14:15) I te taimi e ‵talo atu ei tatou ki te ‵tou Tamana faka-te-lagi—kae ki a ia tokotasi eiloa—ka momea aka ei te ‵tou loto tali‵tonu ki pati konei i te Salamo 116:1, 2: “Au e alofa ki te Aliki, . . . e fakalogo mai ki a au, i taimi katoa e kalaga atu ei au ki a ia.” *