‘Kafai e iloa ne te Atua a mea katoa, e aofia i ei ‵tou mafaufauga mo manakoga, kaia la e ‵tau ei o ‵talo atu au?’ kāti e mafai o fesili mai koe penā. A te mea tenā se fesili tāua. E a, e seki fai mai a Iesu “me e iloa ne te Atua a mea kolā e ma‵nako koutou ki ei a koi tuai o fakatagi atu koutou”? (Mataio 6:8) Ne iloa ne te tupu o Isalaelu mua, ko Tavita a te mea tenei, kae ne tusi mai a ia: “Koi tuai au o faipati, ka ko leva ne iloa ne koe aku pati ka fai.” (Salamo 139:4) Kaia la e ‵tau ei o ‵fuli atu tatou ki te Atua e auala i ‵talo? Ke tali aka te fesili tenā, ke mafau‵fau tatou ki pati i te Tusi Tapu e uiga ki ‵talo a tino tapuaki ki te Atua. *

E tiga eiloa e fai mai te Tusi Tapu me e iloa ne Ieova * te Atua a mea katoa, e fakaasi mai foki me e se saga malosi atu a ia ki te fakamaopoopoga o manatu ‵tonu e uiga ki ana tino tapuaki. (Salamo 139:6; Loma 11:33) A tena mafaufau telā e seai se tapula ki mea e mafai o ‵teu aka i ei, e ‵kese mo te komupiuta telā e ‵teu aka ei a fakamatalaga e uiga ki tino taki tokotasi. A te ‵tonuga loa, e sili atu tena fia saga tonu mai ki ‵tou mafaufauga ‵loto me e manako a ia ke fakapilipili atu tatou ki a ia. (Salamo 139:23, 24; Iakopo 4:8) Tenā te pogai ne fakamalosi atu a Iesu ki ana soko ke ‵talo atu, faitalia me e iloa ‵lei ne tena Tamana ‵tou manakoga tāua. (Mataio 6:6-8) Ko te fakaasi ‵soko atu o ‵tou mafaufauga ki te ‵tou Mafuaga, ko te momea aka foki o te ‵tou fakapilipili atu ki a ia.

I nisi taimi, e mafai o faigata ki a tatou ke iloa faka‵lei a mea ‵tonu kolā e e ‵tau o fakamolemole atu ki ei i te ‵talo. I vaegā tulaga penā, e mafai o kilo ‵mao mai te Atua ki ‵tou lagonaga kolā e fui fakaasi atu kae fakaaoga ne ia tena iloaga ‵lei katoatoa i ‵tou fakanofonofoga ke tali mai ki ‵tou manakoga. (Loma 8:26, 27; Efeso 3:20) Kafai e iloa ne tatou me ne fesoasoani mai te Atua ki ‵tou olaga totino, ke oko ki tamā auala fai lēmū, e momea aka ei te ‵tou pili atu ki a ia.

E fakatalitonu mai te Tusi Tapu me e tali mai te Atua Malosi Katoatoa ki ‵talo a ana tavini fakamaoni, kae e tuku mai foki ne ia a pogai e se fakalogologo ei a ia ki nisi ‵talo. E pelā mo te taimi ne salalau ei a amioga fakasaua i Isalaelu mua, ne fakatonu atu te Atua ki tena pelofeta ko Isaia ke fai atu penei ki tino: “Me e pefea eiloa te ‵talo malosi mai o koutou ki a au, kae ka se fakalogo lele atu eiloa au ki a koutou, me i otou lima ko ‵fonu i toto.” (Isaia 1:15) E manino ‵lei, me i tino kolā e se āva ki tulafono a te Atua io me e ‵talo atu mo lagonaga sē ‵lei e se mafai o fakamoe‵moe ke lagona olotou ‵talo ne te Atua.—Faataoto 28:9; Iakopo 4:3.

I te suā feitu, e fai mai te Tusi Tapu: “Kafai e fakatagi atu tatou ki se mea e ‵tusa mo tena loto, ka fakalogologo mai eiloa a ia ki a tatou.” (1 Ioane 5:14) E mata, e fakauiga i ei me ka tali fakavave atu eiloa ne te Atua a fakamolemole katoa o ana tino tapuaki? Ikai, e se penā eiloa. Mafaufau ki te apositolo ko Paulo, telā ne fakamolemole atu fakatolu ki te Atua ke ave keatea “se mea makaikai [mai tena] foitino.” (2 Kolinito 12:7, 8) Kāti ne logo‵mae a Paulo i ana mata i se taimi leva ‵ki. Kāti ne fi‵ta valevale a ia i ei! Ko oti ne maua ne Paulo a te meaalofa ki te faka‵leiga o masaki mo te faka‵tuga fakavavega ne ia o se tino mate, kae ne ‵tau o kufaki foki a ia i tena masaki. (Galuega 19:11, 12; 20:9, 10) E tiga eiloa ne seki tali mai tena talo i te auala telā ne manako a ia ki ei, ne talia mo te fiafia ne Paulo te tali a te Atua.—2 Kolinito 12:9, 10.

E tonu, ne maua ne nisi tino i te Tusi Tapu a tali fakavavega ki olotou ‵talo. (2 Tupu 20:1-7) Kae ko vaegā tali ki ‵talo penā e se ne mea masani kolā e ‵tupu faeloa, ke oko foki eiloa ki taimi o te Tusi Tapu. Ne fanoa‵noa a nisi tino tali‵tonu i te taimi ne foliga mai i ei me ne seki tali atu te Atua ki olotou ‵talo. Ne fesili atu a te tupu ko Tavita: “Te Aliki, e fakapuli ne koe au ke afea? Ki te se gata mai?” (Salamo 13:1) Kae i te taimi ne iloa ne te tagata fakamaoni tenā a te uke o taimi ne fakasao ei a ia ne Ieova, ne toe fakamalosi aka ei ne Tavita tena loto talitonu ki te Atua. I te ‵talo foki eiloa tenā, ne toe fai atu a Tavita: “Ka ko au e fakalagolago ki tou alofa tumau.” (Salamo 13:5) E pelā mo Tavita, e mafai o tumau a tino tapuaki a te Atua i aso nei i te ‵talo atu ke oko ki te taimi e maua ei ne latou te tali a te Atua ki olotou fakamolemole.—Loma 12:12.

E saga mai te Atua ki mea kolā e ‵tau o maua ne tatou.

Ona ko pogai ‵lei, e se tuku atu faeloa ne mātua atafai a mea e ma‵nako ki ei olotou tama‵liki māfai ko akai atu ki ei. E penā foki loa, e mafai o se tali mai te Atua ki ‵tou fakamolemole i te auala telā e mafau‵fau tatou me e ‵tau o tali mai i ei io me ko te taimi telā e fakamoe‵moe tatou ki ei. Kae e mafai o tali‵tonu tatou me i te ‵tou Mafuaga, e pelā me se Tamana alofa, ka tali mai eiloa ki mea e manakogina tonu ne tatou i te taimi tonu mo te auala tonu.—Luka 11:11-13.

E mafai o tali mai te Atua i auala sē matea.

Kae e a māfai e ‵talo atu tatou ke maua se faka‵leiga ki se fakalavelave tumau? E mata, e ‵tau o fakaiku aka ne tatou me kafai e se tali fakavavega mai a Ieova, ko tena uiga ko se tali mai eiloa a ia? E ‵kese mai i ei, se mea ‵lei ke masaua ne tatou me e mata, ko oti ne fesoasoani mai a Ieova ki a tatou i auala lilo io me ikai. E pelā eiloa mo se taugasoa atafai, kāti ne fai eiloa ne ia te ‵toe mea e mafai ne ia o fai ke fesoasoani mai ki a tatou i te taimi tonu eiloa. (Faataoto 17:17) E mata, e mafai o fai atu me ne fakagasuesue eiloa ne Ieova a te taugasoa atafai tenā ke fesoasoani mai ki a tatou? E se gata i ei, e mafai o maua atu te tali a te Atua ki se fakamolemole e auala i itulau o te Tusi Tapu. I konā e maua ei ne tatou a te poto telā e manakogina ke fakafesagai atu ki se tulaga faigata.—2 Timoteo 3:16, 17.

I lō te ave keatea o se fakalavelave totino, e masani o tuku atu ne te Atua ki ana tino a te malosi e manakogina ke fa‵ki i ei. (2 Kolinito 4:7) E pelā mo te taimi ne fakamolemole atu ei a Iesu ki tena Tamana ke ave keatea se mea faigata, ona ko tena mataku i te mea ma taku fakamasei ei te igoa o te Atua, ne uga atu ne Ieova se agelu ke fakamalosi aka tena Tama. (Luka 22:42, 43) E penā foki loa, e mafai o fakaaoga ne te Atua se taugasoa pili ke tuku mai ne ia a pati fakamalosi i te taimi eiloa ko ma‵nako malosi tatou ki ei. (Faataoto 12:25) Ona ko te mea e mafai o tali mai i auala sē matea, e ‵tau o momea aka te ‵tou matapula‵pula ki te auala e tali mai ei te Atua ki ‵tou ‵talo.

Nisi tali e ‵tau o faka‵tali ki te taimi tonu o te Atua.

E fai mai te Tusi Tapu me e fakaasi atu ne te Atua Malosi Katoatoa tena taliaga ki tino loto maulalo “i tena taimi tonu.” (1 Petelu 5:6) Tela la, kafai e foliga mai me e tuai tena tali mai ki ‵tou fakamolemole mo te fakamaoni, e se ‵tau o mafau‵fau tatou me ko se fia saga mai a Ieova ki a tatou. I lō te fai penā, a te ‵tou Mafuaga atafai telā e uke ‵ki ana mea e iloa, e seai se fakalotolotolua me e iloilo faka‵lei ne ia a ‵tou fakamolemole e ‵tusa mo te ‵toe mea ‵lei telā e iloa ne ia mō tatou.

Ke fai se fakatusaga: Mafaufau la me ko fakamolemole atu tau tamaliki tagata foliki ki a koe ke ‵togi aka sena pasika-ta-ki-vae. E mata, ka fakataunu fakavave aka eiloa ne koe tena manakoga? Kafai e iloa ne koe me e seki matua ‵lei a ia ke fakatele te pasika-ta-ki-vae, e mafai o fakaiku aka ne koe ke taofi malie mua te ‵togiga. Kae fakamuli loa, e mafai ne koe o fakataunu tena manakoga māfai e iloa ne koe me e aoga eiloa ki a ia. E penā foki loa, e mafai o fakataunu ne te Atua a “mea e ma‵nako tatou ki ei” kae ‵lei i te taimi tonu māfai e tumau tatou i te ‵talo atu.—Salamo 37:4.

E fakamalosi mai te Tusi Tapu ki Kelisiano ‵tonu ke mo a ma galo te loto talitonu ki te tāua o ‵talo. Kāti e fai mai a nisi tino, ‘E sili atu te faigofie o pati i lō te faiga.’ E tonu, kafai ko oti ne kufaki tatou i se fakalavelave tumau io me ko nisi faifaiga sē fakamaoni, e mafai eiloa o faigata ke faka‵tali tatou ki te tali a te  Atua. Kae se mea ‵lei ke masaua me ne akoako mai a Iesu ke ‵talo atu faeloa tatou.

Ne taku mai ne Iesu te tala fakatusa e uiga ki se fafine mativa telā ne fanatu faeloa ki se famasino sē ‵lei ke maua se fakamasinoga tonu. (Luka 18:1-3) E tiga eiloa ne ita fitifiti muamua te famasino ke fesoasoani atu ki tou fafine, ne toe fai fakamuli mai a ia: “Ka fai eiloa ne au se fakamasinoga tonu mō ia ko te mea ke se toe foki mai o fakafi‵ta au ki tena manakoga.” (Luka 18:4, 5) E ‵tusa mo te fuaiupu tenei i te ‵gana mua ne tusi i ei, ne saga atu te famasino ki te fafine ko mate tena avaga i te mea ma “‵kini tena mata” io me mataku “i [tena] ata ma fakamasei” ne tou fafine. * Kafai e fesoasoani atu se famasino sē ‵lei penā ki se fafine mativa ko mate tena avaga, ona ko te manavase ki tena ata, e pefea la te sili atu o te tuku atu ne ‵tou Atua atafai a te fakamasinoga tonu ki tino kolā “e ka‵laga atu ki a ia i te ao mo te po.”—Luka 18:6-8.

E tiga eiloa e mafai o fi‵ta tatou i te akai ‵soko atu mō se fesoasoani, e se ‵tau o ‵fiu vave tatou. Mai i te tumau i te ‵talo, e fakaasi atu ei me ma‵nako tonu tatou ki te fesoasoani o te Atua i ‵tou olaga. E tauloto foki ei ne tatou me i tali a te Atua ki ‵tou fakamolemole, e iku atu ki te momea aka o te ‵tou pili atu ki a ia. Ao, e mafai o tali‵tonu tatou me ka tali mai ne Ieova ‵tou ‵talo kolā e ‵lei māfai e tumau tatou i te akai atu i te fakatuanaki.—Luka 11:9.