Te Tusi a Luka 22:1-71
-
Aofaga a faitaulaga ke tamate a Iesu (1-6)
-
Fakatokaga mō te ‵toe Paseka (7-13)
-
Ko te kamataga o te ‵Kaiga a te Aliki i te Afiafi (14-20)
-
“Ko ‵nofo fakatasi māua i te taipola mo te tino telā ka fakatogafiti ne ia au” (21-23)
-
Kinauga lasi me ko oi e sili (24-27)
-
Te feagaiga a Iesu mō se malo (28-30)
-
Ko ‵valo mai te fakafitiga a Petelu (31-34)
-
E ‵tau o fakatoka faka‵lei; pelu e lua (35-38)
-
Te ‵talo a Iesu i te Mauga o Olive (39-46)
-
Ko puke fakapagota a Iesu (47-53)
-
Ko fakafiti ne Petelu a Iesu (54-62)
-
Ko fakatauemu atu ki a Iesu (63-65)
-
Ko fakamasino i mua o te Sanetulini (66-71)
22 Ko pili mai te ‵Kaiga Fiafia o Falaoa sē Faka‵fete, telā e taku ki te Paseka.+
2 Kae ne salasala a faitaulaga pule mo failautusi ki se auala magoi ke tamate ei a ia,+ me i a latou ne ma‵taku i tino.+
3 Tenā ne ulu atu ei a Satani ki loto i a Iuta, telā e taku ko te Isikaliota, se tokotasi o te toko Sefululua,+
4 kae ne fano a ia o fai‵pati mo faitaulaga pule mo tino pule o te faletapu e uiga ki se auala ke fakatogafiti ne latou a ia.+
5 Ne fia‵fia malosi latou ki te mea tenei kae lotoma‵lie ke tuku atu ki a ia ne tupe siliva.+
6 Tenā ne talia ei ne ia kae ne kamata o salasala ki se avanoaga ‵lei ke fakatogafiti ne ia a Iesu i se koga telā e seai se vaitino i ei, ke tuku atu ki a latou.
7 Ko oko atu nei ki te aso muamua o te ‵kaiga o Falaoa sē Faka‵fete, telā e ‵tau o ofo atu i ei a te manu o te Paseka;+
8 kae ne uga atu ne Iesu a Petelu mo Ioane, ana muna: “Olo o fakatoka te Paseka ke ‵kai ei tatou.”+
9 Ne fai atu lāua ki a ia: “Tefea te koga e manako koe ke fakatoka ne māua?”
10 Ana muna ki a lāua: “Kiloke! Kafai e ulu atu koulua ki te fakai ka fetaui koulua mo se tagata e amo ne ia se tiā vai. Tau‵tali i a ia ki loto i te fale telā e ulu a ia ki ei.+
11 Ko fai atu ei koulua ki te tino i o ia te fale, ‘Muna a te Faiakoga ki a koe: “Tefea te potu talimalo telā ka ‵kai ei au mo oku soko i te Paseka?”’
12 Kae ka fakaasi atu ne te tagata tenā ki a koulua se potu lasi i luga telā e toka a mea katoa i ei. Ko fakatoka atu ei ne koulua.”
13 Olo ei lāua kae maua atu ne lāua a mea katoa kolā ne fai atu ne ia, fakatoka ei ne lāua mō te Paseka.
14 I te okoatuga ki te taimi tonu, ne sagasaga ei a ia i te taipola, fakatasi mo ana apositolo.+
15 Kae ne fai atu a ia ki a latou: “Ne manako malosi au ke ‵kai fakatasi tatou i te Paseka tenei a koi tuai au o puapuaga;
16 me e fai atu au ki a koutou, ka se toe kai eiloa au ki ei ke oko ki te taimi e fakataunu ei te mea tenā mai lalo i te Malo o te Atua.”
17 Ne puke a ia ki se ipu, fai te fakafetai kae fai atu: “Puke te ipu tenei kae fakasolo o inu i ei,
18 me e fai atu au ki a koutou, mai te taimi nei o fano ki mua, ka se toe inu eiloa au ki te sua o te vine ke oko ki te taimi e oko mai ei te Malo o te Atua.”
19 Ne puke foki ne ia te falaoa,+ fai te fakafetai, tofitofi, kae tuku atu ki a latou, ana muna: “E fakauiga te mea tenei ki toku foitino+ telā ka tuku atu mō koutou.+ Ke fai faeloa te mea tenei mo fai se fakamasauaga ki a au.”+
20 Tenā foki te mea ne fai ne ia ki te ipu i te otiga o te lotou ‵kaiga i te afiafi, ana muna: “E fakauiga a te ipu tenei ki te feagaiga fou+ e auala i toku toto,+ telā ka ‵ligi ki tua mō koutou.+
21 “Kae kiloke! ko ‵nofo fakatasi māua i te taipola mo te tino telā ka fakatogafiti ne ia au.+
22 E tonu, ka fano eiloa kea‵tea te Tama a te tagata e ‵tusa mo te mea telā ko oti ne fakaiku aka;+ kae kalofa eiloa i te tagata telā e fakatogafiti ne ia a ia!”+
23 Ne kamata o sau‵tala latou i a latou eiloa me ko oi te tino i a latou telā ko pili o fai ne ia te mea tenei.+
24 E ui i ei, ne sae aka foki se kinauga lasi i a latou me ko oi te ‵toe tino sili i a latou.+
25 Kae ne fai atu a ia ki a latou: “A tupu o atufenua e pule atu ki luga i a latou e pelā me ne aliki, kae ko tino kolā e isi se lotou pule ki luga i a latou e fakaigoa ki Tino Fai Meaalofa.+
26 Kae ko koutou e se ‵tau o fai penā.+ Kae ke fai te tino telā e sili i a koutou e pelā mo te ‵toe tamaliki foliki,+ kae ko te tino telā e takitaki ne ia koutou ke fai pelā me se tavini.
27 Ko oi te tino e sili atu, ko te tino telā e kai io me ko te tino telā e tavini? E a, e se ko te tino telā e kai? Kae ko au tenei e ‵nofo mo koutou kae tavini atu ki a koutou.+
28 “E tiga te feitu tenā, ko koutou eiloa ne ‵piki ‵mau ki a au+ i oku tofotofoga;+
29 kae ka fai ne au se feagaiga mo koutou e pelā eiloa mo te feagaiga ko oti ne fai ne toku Tamana ki a au, mō se malo,+
30 ke mafai koutou o ‵kai kae inu i taku taipola i toku Malo,+ kae saga‵saga i nofogaaliki+ o fakamasino a matakāiga e 12 o Isalaelu.+
31 “Simona, Simona, kiloke! ko manako a Satani ke faka‵ma a koutou katoa e pelā me ne saito.+
32 Kae ko oti ne ‵talo malosi au mō koe ko te mea ke se galo tou fakatuanaki;+ kae ko koe, kafai e toe ‵fuli mai, ke fakamalosi atu la ou taina.”+
33 Tenā ne fai atu ei a Petelu ki a ia: “Te Aliki, au ko toka ke olo tasi mo koe ki te falepuipui mo te mate.”+
34 Kae ne fai atu a Iesu: “Au e fai atu ki a koe, e Petelu, ka se tagi te moa i te aso nei seiloga ko oti ne fakafiti fakatolu a koe me se iloa ne koe au.”+
35 Ne fai atu foki a ia ki a latou: “I te taimi ne uga ei ne au koutou e aunoa mo se taga tupe mo se taga meakai mo taka,+ e a, e isi se mea ne ma‵tiva koutou i ei? Olotou muna: “Ikai!”
36 Tenā ne fai atu ei a ia ki a latou: “Kae nei la, a te tino telā e isi sena taga tupe ke ave ne ia, e penā foki te taga meakai, kae ko te tino e seai sena pelu ke na fakatau atu ne ia tena gatu mo ‵togi tena pelu.
37 Au e fai atu ki a koutou me e ‵tau o fakataunu ki a au a mea kolā ne tusi mai penei, ‘Ne aofia a ia fakatasi mo tino solitulafono.’+ Me ko fakataunu te mea tenei e uiga ki a au.”+
38 Tenā ne fai atu ei latou ki a ia: “Te Aliki, kiloke! e lua a pelu konei.” Ana muna ki a latou: “Ko lava.”
39 I tena fanoga, ne fanatu a ia ki te Mauga o Olive e pelā mo tena masani, kae ne tau‵tali atu foki ana soko i a ia.+
40 I tena okoatuga ki te koga tenā, fai atu ei ki a latou: “‵Talo faeloa ko te mea ke se fakaosoosogina koutou.”+
41 Ne tai faka‵mao atu a ia kea‵tea mai i a latou,* totuli ifo ei ki lalo kae kamata o ‵talo,
42 ana muna: “Toku Tamana, kafai e manako koe ki ei, ave kea‵tea te ipu tenei mai i a au. Kae ke se fai la toku loto, kae ko tou loto.”+
43 Tenā ne fakasae atu ei ki a ia se agelu mai te lagi o fakamalosi atu a ia.+
44 Ona ko tena tigaina ne tumau eiloa a ia i te ‵talo malosi;+ kae ne fai tena tauta e pelā me ne motiga toto e sali‵sali ki te laukele.
45 I tena otiga ne ‵talo, tu aka ei o fano ki ana soko kae maua atu ne ia latou e ‵moe ona ko te lotou fanoa‵noa.+
46 Ne fai atu a ia ki a latou: “Kaia e ‵moe ei koutou? ‵Tu ki luga kae ‵talo faeloa ko te mea ke se fakaosoosogina koutou.”+
47 Kae koi faipati a ia, kiloke! ne oko mai se potukau o tino kolā ne ‵taki atu ne te tagata e igoa ki a Iuta, se tokotasi o te toko Sefululua, kae ne fanatu a ia ki a Iesu o sogi atu ki a ia.+
48 Ne fai atu a Iesu ki a ia: “Iuta, e a, e fakatogafiti ne koe te Tama a te tagata ki se sogi?”
49 I te laveaga ne tino i ana tafa a te mea telā ko pili o tupu, fai atu ei latou ki a ia: “Te Aliki, e a, ka fakaaoga ne matou a pelu?”
50 E tokotasi te tino i a latou ne ‵kati ne ia te taliga fakaatamai o te pologa a te faitaulaga sili ke tō kea‵tea.+
51 Kae ne tali atu a Iesu: “Ko lava.” Kae puke atu a ia ki te taliga kae faka‵lei ne ia.
52 Tenā ne fai atu ei a Iesu ki faitaulaga pule mo tino pule i te faletapu mo toeaina kolā ne olo atu o puke a ia: “A koutou na e o‵mai mo otou pelu mo pago o puke au e pelā me se tagata kaisoa?+
53 I aso takitasi ne ‵nofo fakatasi ei au mo koutou i te faletapu+ kae ne seki puke ne koutou au.+ Kae tenei eiloa te otou taimi mo te pule o te pouliga.”+
54 Tenā ne puke ei ne latou a Iesu kae ‵taki kea‵tea,+ ne avatu ne latou a ia ki te fale o te faitaulaga sili; kae ne tautali atu a Petelu mai i se koga tai ‵mao.+
55 I te taimi ne faka‵ka ei ne latou te afi i te kogaloto o te koga ateatea o te fale kae saga‵saga fakatasi ki lalo, ne sagasaga foki a Petelu i konā.+
56 Kae i te laveaga ne se pologa fafine i te mainaga o te afi a tou tagata e sagasaga mai i ei, ne kilo faka‵lei atu tou fafine ki a ia, kae fai aka: “A te tagata tenei ne ‵nofo foki mo Iesu.”
57 Kae ne fakafiti a ia, ana muna: “Toku fafine, e se iloa ne au a ia.”
58 Mai tua malie ifo, ne lavea a ia ne se isi tino kae fai atu: “A koe foki se tokotasi o latou.” Kae ne fai atu a Petelu: “Toku tagata, e se ko au.”+
59 Kae kāti i se itula mai tua ifo i ei, ne kamata o kinau malosi atu se isi tagata: “E mautinoa eiloa me i te tagata tenei ne ‵nofo foki mo ia, me i a ia se tino Kalilaia!”
60 Kae ne fai atu a Petelu: “Toku tagata, e se iloa ne au a te mea e faipati koe ki ei.” I konā eiloa, e seki palele ana pati kae tagi te moa.
61 Ne mafuli aka te Aliki kae kilo ‵tonu atu ki a Petelu, kae ne masaua ne Petelu a pati a te Aliki ki a ia: “Koi tuai o tagi te moa i te po nei kae ko oti ne fakafiti fakatolu ne koe au.”+
62 Fano ei a ia ki tua kae tagi mautuutu i ei.
63 Ne kamata o fakatauemu+ atu ki a Iesu a tāgata kolā ne puke fakapagota ne latou a ia, kae fusufusu foki ne latou;+
64 kae i te otiga ne ‵pono ne latou ana mata ne fesili atu faeloa latou: “Kafai koe se pelofeta, taku mai me ko oi ne ta ne ia koe?”
65 Kae ne fai atu foki ne latou a nisi pati sē ‵tau e uke ki a ia.
66 I te okoga ki te taeao, ne maopoopo a toeaina katoa o te fono, ko faitaulaga pule mo failautusi,+ kae ne avatu ne latou a Iesu ki loto i te fale fono o te Sanetulini, kae fai atu:
67 “Kafai koe ko te Keliso, taku mai ki a matou.”+ Kae ne fai atu a ia ki a latou: “Kafai e fai atu ne au ki a koutou, e se tali‵tonu eiloa koutou ki ei.
68 E se gata i ei, kafai e fesili atu au ki a koutou, e se tali mai eiloa koutou.
69 E ui i ei, mai te taimi nei o fano ki mua, ka sagasaga eiloa te Tama a te tagata+ i te feitu fakaatamai o te Atua malosi.”+
70 Tenā ne fai atu ei latou katoa: “Ko tena uiga, a koe ko te Tama a te Atua?” Ana muna ki a latou: “Tenā eiloa e fai mai ne koutou me ko au.”
71 Olotou muna: “Kaia e toe ‵sala ei tatou ki nisi molimau? Me ko oti eiloa ne lagona ne tatou a pati konā mai tena gutu.”+
Fakamatalaga mai lalo
^ Io me “ki te ‵mao o te fatu ma pei.”
