Se a te Papatisoga?
Te tali mai te Tusi Tapu
A te papatisoga e fakasino atu ki se tino e ufi ki lalo i te vai kae toe fanaka mai i ei. * Tenā te pogai ne papatiso ei a Iesu i se vaitafe tai lasi. (Mataio 3:13, 16) E penā foki a te tagata Aitiope, ne fai atu ke papatiso a ia “i te vai.”—Galuega 8:36-40.
Te uiga o te papatisoga
E fakatusa ne te Tusi Tapu a te papatisoga ki te ‵tanuga. (Loma 6:4; Kolose 2:12) A te papatisoga ki te vai se fakamailoga me ko mate se tino ki tena olaga mua kae ko kamata tena olaga fou e pelā me se Kelisiano tukugina atu ki te Atua. A te papatisoga mo mea kolā e iku atu ki ei, se fakatokaga a te Atua ke maua ne se tino se loto lagona ‵ma telā e fakavae ki tena fakatuanaki ki te taulaga a Iesu Keliso. (1 Petelu 3:21) Tela la, ne akoako atu ne Iesu me i ana soko e ‵tau o papatiso.—Mataio 28:19, 20.
E mata, e ‵fulu faka‵ma ne te papatisoga ki te vai a agasala?
Ikai. E akoako mai te Tusi Tapu me e mafai o faka‵ma tatou mai te agasala e auala fua i te toto maligi o Iesu. (Loma 5:8, 9; 1 Ioane 1:7) Kae ke maua a mea aoga mai te taulaga a Iesu, e ‵tau o fakatuanaki se tino ki a Iesu, ‵fuli tena vaegā olaga ke ola e ‵tusa mo akoakoga a Iesu, kae papatiso foki.—Galuega 2:38; 3:19.
E mata, e akoako mai i te Tusi Tapu a te papatisoga o pepe?
Ikai. A te papatisoga o pepe e se maua i te Tusi Tapu. E isi se faifaiga telā e fai i nisi lotu māfai ko “papatiso” se pepe (ko te fakamutulutulu o vai io me e ‵ligi atu ki te ulu o te pepe) kae taku atu tena igoa. A te papatisoga o Kelisiano se mea mō tino kolā ko ma‵tua ke malamalama kae tali‵tonu ki te “tala ‵lei o te Malo o te Atua.” (Galuega 8:12) E isi sena sokoga ki te fakalogologo ki te muna a te Atua, talia, kae salamo—ko faifaiga kolā e se mafai o fai ne se pepe.—Galuega 2:22, 38, 41.
E se gata i ei, e fakaasi mai i te Tusi Tapu me e kilo atu te Atua ki tama‵liki a Kelisiano e pelā me e tapu, io me e ‵ma i tena kilokiloga ona ko te fakamaoni o olotou mātua. (1 Kolinito 7:14) Moi fai ne talia ke papatiso a pepe, ko se manakogina ei ne tama‵liki konā a te fakamaoni o te suā tino ke aoga ki a latou. *
Manatu ‵se e uiga ki te papatisoga Kelisiano
Manatu ‵se: A te fakamatulutulu io me ko te ‵ligi atu o vai ki se tino se faifaiga ‵lei telā e mafai o sui ki ei a te ufi kātoa ki lalo i te vai.
Manatu tonu: A papatisoga kolā e taku mai i te Tusi Tapu ne aofia i ei a te ufi kātoa ki lalo. E pelā mo te taimi ne papatiso ei ne te soko ko Filipo a te tagata Aitiope, ne ‘olo ifo lāua ki te vai’ mō te papatisoga. Mai tua i konā, ne ‘olo aka lāua mai te vai.”—Galuega 8:36-39. *
Manatu ‵se: E fakaasi mai i te Tusi Tapu me ne aofia foki a tama‵liki i te taimi ne papatiso ei a te kau kāiga kātoa. E pelā mo te tausi pagota i Filipi, e fai mai penei e uiga ki a ia: “Ne papatiso ei a ia fakatasi mo tena kāiga kātoa.”—Galuega 16:31-34.
Manatu tonu: E fakaasi mai i te tala e uiga ki te ‵fuliga o te tausi pagota me i a latou kolā ne papatiso ne malamalama i “te muna a Ieova” kae “fia‵fia malosi” latou. (Galuega 16:32, 34) Ona ko manatu ‵tonu konā, ne fakaiku aka ei me ne seki papatiso a tama‵liki i te kau kāiga o te tausi pagota, me ne seki mafai o malamalama latou i te muna a Ieova.
Manatu ‵se: Ne akoako mai ne Iesu a te papatisoga o pepe i ana pati me i o tama‵liki penā a te Malo o te lagi.—Mataio 19:13-15; Maleko 10:13-16.
Manatu tonu: Ne seki faipati a Iesu e uiga ki te papatisoga i te taimi ne fai atu ei ne ia a pati konā. I lō te fai penā, ne fakaasi atu ne ia me i tino kolā e ‵tau o ulu atu ki te Malo o te Atua, e ‵tau o fai pelā me se tamaliki—e agamalu kae akoakogofie.—Mataio 18:4; Luka 18:16, 17.
^ pala. 1 A te pati Eleni telā ne ‵fuli ki te “papatisoga” ne māfua mai i se pati telā e fakauiga ki te “ke ufi ki lalo.” Onoono ki te Theological Dictionary of the New Testament, Tusi I, itulau e 529.
^ pala. 5 E ‵tusa mo The International Standard Bible Encyclopedia, “e seai eiloa se mea e maua i te Feagaiga Fou e uiga ki te papatisoga o pepe.” E fai mai foki i ei me i te faifaiga tenā, ne māfua mai “i se faifaiga ‵se kae fakalasilasi o te tāua o te papatisoga,” me ko te papatisoga fua e ‵fulu faka‵ma i ei a agasala.—Tusi 1, itulau 416-417.
^ pala. 7 Mai lalo i te ulutala ko te “Baptism (in the Bible),” i te New Catholic Encyclopedia, e fai mai: “E manino ‵lei me i te papatisoga o te Lotu mua ko te ufi kātoa ki lalo.”—Tusi 2, itulau 59.
You May Also Like
TALI KI FESILI MAI TE TUSI TAPU
E Mata, e ‵Pau a Lotu Katoa? E Mata, e Tapuaki Atu Katoa ki te Atua?
A manatu ‵tonu e lua kolā ne fakamatala mai i te Tusi Tapu e tuku mai i ei te tali.
AKOAKOGA I TE TUSI TAPU
Tofotofo Aka ki te Auala e Suke‵suke ei Matou ki te Tusi Tapu
Fakamolemole atu ke fai sau akoga faka-te-Tusi Tapu sē ‵togi ne se faiakoga i a koulua eiloa.