A te agasala ko so se faifaiga, lagonaga, io me ko mafaufauga kolā e ‵teke atu ki tulaga o te Atua. E aofia i ei a te ‵teke atu ki tulafono a te Atua mai te faiga o te mea ‵se io me se faifaiga sē amiotonu i te kilokiloga a te Atua. (1 Ioane 3:4; 5:​17) E fakamatala mai foki i te Tusi Tapu me i te fakatamala se agasala​—telā ko te fakatamala o fai te mea tonu.​—Iakopo 4:​17.

I ‵gana mua kolā ne fakaaoga i te Tusi Tapu, a pati mō te agasala e fakauiga ki te “ke seke mo te māka” io me se taketi. E pelā mo se potukau o sotia i Isalaelu mua, ne apo latou i te faka‵tonuga o olotou fatu i olotou siligi ko te mea “ke se mafai eiloa o seke.” A te tugapati tenā, kafai e ‵fuli tonu, e mafai o fai penei “ka se agasala” latou. (Famasino 20:16) Tela la, a te agasala ko te seke mo te māka o tulaga ‵lei katoatoa o te Atua.

E pelā me ko te Mafuaga, ne ‵tau o fai ne te Atua a tulafono mō tino. (Fakaasiga 4:​11) E ‵tau o tuku atu ne tatou ki a ia se tala o ‵tou faifaiga.​—Loma 14:12.

E mata, e mafai o ‵kalo katoatoa keatea mai te agasala?

Ikai. E fai mai te Tusi Tapu me “ko oti ne agasala a tino katoa kae ko ‵mao mai te ‵malu o te Atua.” (Loma 3:​23; 1 Tupu 8:​46; Failauga 7:​20; 1 Ioane 1:8) Kaia ne tupu ei te mea tenā?

E seki agasala a te tauavaga muamua, ko Atamu mo Eva i te kamataga. Ne fai penā ona ko te mea ne faite lāua ke ‵lei katoatoa ki foliga o te Atua. (Kenese 1:​27) Kae ne galo atu te lā tulaga ‵lei katoatoa ona ko te sē faka‵logo ki te Atua. (Kenese 3:​5, 6, 17-​19) I te taimi ne fai lā tama‵liki, ne faka‵solo atu ne lāua te agasala mo te tulaga sē ‵lei katoatoa ki a latou. (Loma 5:​12) E pelā mo pati a Tavita, te tupu o Isalaelu, “Au ne fanau mo te agasala.”​—Salamo 51:5.

E mata, e ma‵sei atu a nisi agasala i lō nisi agasala?

Ao. E pelā mo te Tusi Tapu, e fai mai me i “tāgata Sotoma ne tino ma‵sei ‵ki, ne tino fai agasala matagā” telā “ko oko eiloa i te ‵mafa” olotou agasala. (Kenese 13:13; 18:20) Mafaufau ki manatu ‵tonu e tolu kolā e fakaiku aka ei a te matagā io me ko te ‵mafa o te agasala.

1. Matagā. E fakailoa mai i te Tusi Tapu ke ‵kalo keatea tatou mai i agasala matagā e pelā mo faifaiga fakatauavaga sē ‵tau, ifo ki tupua, kai‵soa, kō‵na, ‵faomea, tatino, mo te faivailakau. (1 Kolinito 6:​9-​11; Fakaasiga 21:8) E faka‵kese ne te Tusi Tapu a agasala konei mo agasala kolā e fai mo te sē mafaufau e aunoa mo te iloa tonu, pelā mo pati mo faifaiga kolā e fakalogo‵mae atu ki nisi tino. (Faataoto 12:18; Efeso 4:​31, 32) E tiga eiloa te feitu tenā, e fakamalosi mai te Tusi Tapu ke se manatu mā‵ma tatou ki so se agasala, me e mafai o iku atu ki te ‵teke atu i se auala matagā ki tulafono a te Atua.​—Mataio 5:​27, 28.

2. Lagonaga. E fai a nisi agasala ona ko te sē iloa o mea kolā e manako ki ei te Atua. (Galuega 17:30; 1 Timoteo 1:​13) E tiga eiloa e seai ne fakamasakoga ki vaegā agasala penā, e faka‵kese ne te Tusi Tapu a agasala penā mai i agasala kolā e aofia i ei a te ‵teke atu mo te iloa tonu ki tulafono a te Atua. (Numela 15:30, 31) A agasala e fai mo te iloa tonu e māfua mai i te ‘masei o te loto.’​—Ielemia 16:12.

3. Fai ‵soko. E faka‵kese foki ne te Tusi Tapu a te agasala telā e fai fakatasi mo te agasala telā e fai faeloa mō se taimi tai leva. (1 Ioane 3:​4-8) A latou kolā e “agasala mo te loto kātoa,” ke oko foki eiloa māfai ko iloa ne latou a te mea tonu e ‵tau o fai, ka maua ne latou te fakasalaga ‵mafa a te Atua.​—Epelu 10:26, 27.

E mafai o logo‵mae malosi i te loto fanoanoa, a tino kolā ko ma‵sei olotou lagonaga i te faiga o agasala matagā, ona ko te ‵mafa o olotou mea ‵se ne fai. E pelā mo te Tupu ko Tavita, ne tusi mai: “Aku mea ‵se e ‵nofo i luga i toku ulu; e pelā me se amoga ‵mafa, ko tō ‵mafa katoa ki a au.” (Salamo 38:4) Kae e tuku mai ne te Tusi Tapu a te fakamoemoega tenei: “Ke na tiaki ne te tagata masei ana auala kae ko te tagata matagā ko ana mafaufauga; fai ke foki a ia ki a Ieova, telā ka fakaasi atu ne ia te alofa fakamagalo ki a ia, ki te ‵tou Atua, me ka fakamagalo ne ia i se auala lasi.”​—Isaia 55:7.