Ikai, e se ‵pau a lotu katoa. E maua i te Tusi Tapu a tala e uke o lotu kolā ne seki fakafiafia atu ki te Atua. Ne aofia a vaega fakavae konei e lua i olotou tapuakiga.

Vaega 1: E tapuaki ki atua ‵se

E fakasino atu te Tusi Tapu ki te tapuaki atu ki atua ‵se i vaegā tugapati pelā me “ne mea sē ‵tonu,” “e seai ne aoga” kae “e se tāua.” (Ielemia 10:​3-5; 16:19, 20) Ne fakatonu atu a Ieova * te Atua ki te fenua mua o Isalaelu: “E se ‵tau o isi ne nisi atua aka o koe i oku tafa.” (Esoto 20:​3, 23; 23:24) Kafai ne tapuaki atu te kau Isalaelu ki nisi atua, “ne kaitaua malosi a Ieova.”​—Numela 25:3; Levitiko 20:2; Famasino 2:​13, 14.

Koi ‵pau eiloa te kilokiloga a te Atua ki te tapuaki atu ki “mea kolā e fakaigoa ki atua.” (1 Kolinito 8:​5, 6; Kalatia 4:8) E fakatonu atu a ia ki a latou kolā e ma‵nako o tapuaki atu ki a ia ke fakagata te ‵kau atu ki tino kolā e aofia i lotu ‵se, mai te fai atu: “Olo kea‵tea mai i a latou, kae ‵vae koutou kea‵tea.” (2 Kolinito 6:​14-​17) Kafai e ‵pau a lotu katoa kae ‵taki atu ei a tino ki te Atua, kaia la ne fai mai ei ne te Atua se vaegā fakatonuga penā?

Vaega i te 2: E tapuaki ki te Atua tonu i se auala telā e se talia ne ia

I nisi taimi, ne tapuaki atu a te kau Isalaelu ki te Atua kae fakaaoga a talitonuga mo faifaiga a tino e tapuaki ki atua ‵se, kae ne ‵teke atu a Ieova ki olotou taumafaiga ke palu tasi a te lotu tonu mo lotu ‵se. (Esoto 32:8; Teutelonome 12:​2-4) Ne taku fakamasei ne Iesu a takitaki lotu i ana aso, ona ko te auala ne tapuaki atu ei latou ki te Atua, ne fakafoliga atu ne latou i tua a te lotou ma‵losi i mea fakalotu, kae ne amio ‵pelo latou me ne fakaseaoga ne latou “a vaega tāua o te Tulafono, e pelā mo fakamasinoga ‵tonu, te alofa fakamagalo mo te fakamaoni.”​—Mataio 23:23.

E penā foki i aso nei, ko te lotu fua telā e fakavae ki te munatonu e takitaki atu ei a tino ki te Atua. A te munatonu tenei e maua i te Tusi Tapu. (Ioane 4:​24; 17:17; 2 Timoteo 3:​16, 17) A lotu kolā e fe‵paki olotou akoakoga mo te Tusi Tapu e takitaki atu fua i ei a tino keatea mai te Atua. E uke a akoakoga e mafau‵fau a tino me e maua i te Tusi Tapu​—e aofia i ei te Tolutasi, te agaga o te tino telā e tumau i te ola mai tua o te mate, mo te fakapuapuaga ki te se-gata-mai i te afi​—ne māfua mai a mea konā mai i tino kolā ne tapuaki ki atua ‵se. A tapuakiga kolā e fakamalosi aka i ei a vaegā akoakoga penā e “se aoga,” io me se tāua, me e sui ne latou a mea e manako ki ei a te Atua ki tuu fakalotu.​—Maleko 7:​7, 8.

E takalialia te Atua ki loi fakalotu. (Tito 1:​16) Ke fesoasoani ki tino ke fakapili‵pili ki te Atua, e ‵tau o aoga a te lotu ki olaga o tino i aso katoa kae e se aofia fua i ei a faifaiga matea io me ko faifaiga masani. E pelā mo te mea e fai mai i te Tusi Tapu, penei: “Kafai se tino e mafaufau i a ia se tino lotu kae e se pule faka‵lei atu ki tena alelo, e fakaloiloi ne ia a tena loto, kae e seai se aoga o tena tapuakiga. A te lotu telā e ‵ma kae e se lailai i te kilokiloga a te Atua te ‵tou Tamana e fai penei: ke tausi atu ki tama‵liki ko ‵mate olotou mātua mo fāfine ko ‵mate olotou avaga i olotou puapuaga, kae ke tumau i te ‵ma e aunoa mo se lailaiga mai te lalolagi.” (Iakopo 1:​26, 27, fml) E fakaaoga i te King James Version a te tugapati ko te lotu ‵ma pakipaki” me i te tapuakiga tenei e ‵ma kae e seai ne faifaiga ‵loi i ei.