Ki te Kau Epelu 10:1-39
10 Kae ona ko te Tulafono se ata fakatusa+ fua o mea ‵lei kolā ka oko mai,+ kae e se ko mea ‵tonu, e se mafai eiloa ne te mea tenā* o fai ke ‵lei katoatoa a tino kolā e olo atu ki te Atua, e auala i taulaga kolā e ofo atu faeloa i tausaga takitasi.+
2 Moi ne mafai o fai penā, e mata, e se ‵tau o fakagata te ofoatuga o taulaga, me kafai ko oti ne faka‵magina a latou kolā e fai ne latou te taviniga tapu ko se toe lagona ne latou a te agasala i olotou loto?
3 Ikai, kae ko taulaga konei se fakamasauaga fua e uiga ki agasala i tausaga takitasi,+
4 me e se mafai ne toto o pulumakau mo kouti o tapale kea‵tea a agasala.
5 Tela la, i tena vauga ki te lalolagi ne fai mai tou tagata: “‘Ne seki manako koe ki taulaga mo mea kolā e ofo atu, kae ne fakatoka ne koe se foitino mō oku.
6 Ne seki talia ne koe a taulaga ‵sunu kātoa mo taulaga mō agasala.’+
7 Tenā ne fai aka ei au: ‘Kiloke! Au ko vau (e tusi i te peluga tusi a mea e uiga ki a au) o fai tou loto, e toku Atua.’”+
8 I te otiga o ana pati muamua konei: “Ne seki manako koe io me e talia ne koe a taulaga mo mea kolā e ofo atu mo taulaga ‵sunu kātoa mo taulaga mō agasala”—ko taulaga kolā ne ofo atu e ‵tusa mo te Tulafono—
9 tenā ne fai atu ei a ia: “Kiloke! Au ko vau o fai tou loto.”+ Ne fakaseai ne ia te mea muamua ko te mea ke fakatu aka te lua o mea.
10 Ko oti ne fakatapugina tatou e ‵tusa mo te “loto”+ tenei o te Atua, e auala i te ofoatuga o te foitino o Iesu Keliso fakatasi mō taimi katoa.+
11 E ‵tu atu foki a faitaulaga taki tokotasi i aso takitasi o ofo atu te taviniga ‵malu*+ kae ke fai faeloa a taulaga penā,+ kolā e se mafai o tapale katoatoa kea‵tea i ei a agasala.+
12 Kae ne ofo atu ne te tagata tenei te taulaga e tasi mō agasala mō taimi katoa kae ne sagasaga ifo i te feitu fakaatamai o te Atua,+
13 o fakatalitali i konā ke oko ki te taimi e tuku atu ei ana fili mo fai te mea e tuku ei ana vae.+
14 Me mai te ofoatuga o te taulaga e tasi tenei, ne fai ei ne ia a tino kolā e fakatapugina ke ‵lei katoatoa+ mō taimi katoa.
15 E se gata i ei, e molimau mai foki te agaga tapu ki a tatou, me i te otiga o pati konei:
16 “‘Tenei te feagaiga ka fai ne au mo latou mai tua o aso konā,’ ko muna a Ieova.* ‘Ka tuku ne au aku tulafono ki loto i olotou loto, kae ka tusi ne au a mea konā i olotou mafaufau.’”+
17 Tenā ne fai mai ei: “Kae ka se toe masaua eiloa ne au olotou agasala mo olotou faifaiga solitulafono.”+
18 Nei la, kafai ko fakamagalogina a mea konei, ko se toe ai ei se taulaga mō agasala.
19 Tela la, e oku taina, ona ko te mea ko maua ne tatou te loto toa* ke ulu atu ki loto i te koga tapu,+ e auala i te toto o Iesu,
20 telā ne ‵tala mai ne ia mō tatou e pelā me se auala fou kae ola i loto i te ‵pui laugatu,+ telā ko tena foitino,
21 kae ona ko te mea ko maua ne tatou se faitaulaga sili ke pule i te kāiga o te Atua,+
22 ke na olo atu la tatou ki mua o te Atua mo te loto fakamaoni mo te fakatuanaki katoatoa, me ko oti ne faka‵magina* a ‵tou loto lagona ma‵sei+ mo ‵tou foitino ko oti ne fakakoukou ki vai ‵ma.+
23 Ke na puke ‵mau tatou ki te folafolaatuga o te ‵tou fakamoemoega ki tino katoa e aunoa mo te fakavāi‵vai,+ me i te tino telā ne fai ne ia te tautoga e fakamaoni.
24 Kae ke na mafau‵fau* tatou te suā tino ki te suā tino o fakama‵losi atu ke fakatau a‵lofa kae fai a mea ‵lei,+
25 ke mo a ma ‵galo sāle tatou i ‵tou fakatasiga,+ e pelā mo te masani a nisi tino, kae ke fakamalosi atu te suā tino ki te suā tino,+ kae maise eiloa me ko iloa ne koutou i te aso tenā ko pili mai.+
26 Me kafai e fai ne tatou te agasala mo te loto kātoa i te otiga ne maua ne tatou te iloaga tonu o te munatonu,+ ko se toe ai ei se taulaga e ‵toe mō agasala,+
27 kae na ko te fakatalitali atu fua mo te mataku ki te fakamasinoga mo te kaitaua e ‵ka pelā me se afi telā ka fakaseai i ei a latou kolā e ‵teke.+
28 So se tino e se fakatāua ne ia te Tulafono a Mose e tamate e aunoa mo te alofa atafai mai i molimau a tino e tokolua io me tokotolu.+
29 Se a la tau faka‵tau, ka pefea te lasi atu o te fakasalaga e ‵tau o maua ne se tino telā ne lakalaka ne ia te Tama a te Atua kae e se fakatāua ne ia te aoga o te toto o te feagaiga+ telā ne fakatapu a ia ki ei, kae ko oti ne fai ne ia te agaga o te alofa tauanoa ke kaitaua?+
30 Me e iloa ne tatou a te Atua telā ne fai mai: “I a aku te taui ma sui; ka toe ‵togi atu ne au.” Kae toe fai mai: “Ka fakamasino ne Ieova* ana tino.”+
31 Se mea fakamataku ke maua ne koe te fakasalaga mai lima o te Atua ola.
32 Kae ke masaua faeloa ne koutou i aso ko ‵teka, i te otiga ne maua ne koutou te mainaga,+ ne kufaki koutou i se tofotofoga lasi fakatasi mo logo‵maega.
33 I nisi taimi ne tuku faka‵sau* atu koutou ki fakatauemuga mo puapuaga, kae i nisi taimi ne ‵kau fakatasi* atu koutou ki tino kolā e pokotia i mea konā.
34 Me ne fakaasi atu ne koutou te loto a‵lofa ki a latou kolā i loto i falepuipui kae ne talia ne koutou mo te fia‵fia ke ‵faomālō otou kope+ i te iloa atu me e isi se otou kope telā e ‵lei atu kae e tumau foki.+
35 Tela la, ke mo a ma ‵pei kea‵tea te otou loto ‵toa,* telā ka lasi ‵ki tena taui e maua.+
36 Me e manakogina ke kufaki koutou,+ ko te mea ke maua ne koutou te fakataunuga o te folafolaga māfai ko oti ne fai ne koutou te loto o te Atua.
37 Me “ko toetoe te taimi,”+ kae “ka oko mai eiloa te tino telā ka fai o vau kae ka se tuai.”+
38 “Kae ko taku tino amiotonu ka ola e auala i te fakatuanaki,”+ kae “kafai e toe foki a ia ki tua, ka se fiafia au ki a ia.”+
39 Nei la, a tatou e se ko vaegā tino kolā e toe ‵foki ki tua ki te fakaseaiga,+ kae ko vaegā tino kolā e fakatuanaki ki te fakatumauga o ‵tou ola.
Fakamatalaga mai lalo
^ Io me kāti, “tāgata.”
^ Io me “ke fai te taviniga i mua o tino.”
^ Io me “loto talitonu.”
^ Eleni, “fakamatulutulu” ki te toto o Iesu.
^ Io me “ke manavase e uiga; saga ‵tonu ki.”
^ Eleni, “tuku faka‵sau atu e pelā me maimoa ki ei a tino i loto i se fale fai tafaoga.”
^ Io me “‵tu i olotou tafa.”
^ Eleni, “saolotoga o faipati atu.”
