Sena Njiisyo ya Helo Njamasimpe? Ino Helo Ninzi Kweelana a Bbaibbele?

AMULIZYE

Bwiinguzi bwamu Bbaibbele

Ma Bbaibbele aamwi aakaindi aakasandululwa mumwaambo wa Cikuwa, mbuli Bbaibbele lya King James Version, abelesya bbala lyakuti “helo” mutupango tumwi. (Intembauzyo 16:10; Milimo 2:27 a) Mbubwenya mbokutondezyedwe mucifwanikiso cabukombi ncomubwene mucibalo eeci, bantu banji basyoma kuti helo mbusena kuli mulilo uuvwilima kukabe kutamani kwalo bantu babi nkobasubulwa. Pele sena Bbaibbele mboliyiisya oobo?

Mucibalo eeci tulalanga-langa makani aatobela:

Sena helo mbusena bantu nkobapenga kukabe kutamani?

Peepe. Mabala aakusaanguna aakasandululwa kuti “helo” muma Bbaibbele aamwi aakaindi (mu Chihebrayo, “Sheol”; kumane mu Chigiriki, “Hades”) aamba “Cuumbwe,” ikwaamba kuti, busena muzikkilwa bantu boonse. Bbaibbele litondezya kuti bantu ibali mu“Cuumbwe” balifwide.

Bafwide kunyina ncobazyi aboobo tabakonzyi kumvwa kucisa. “Mucuumbwe oomo moyoonjila, taakwe ncoyoocita nikuba kuyeeya, niluba luzibo nibuba busongo pe.” (Mukambausi 9:10, BT) Helo tabuli busena buzwide bantu bakwiila akaambo kakumvwa kucisa. Muciindi caboobo, Bbaibbele lyaamba kuti: “Ibabi abausyigwe nsoni; abaumune wi mu Cuumbwe.”—Intembauzyo 31:17; Intembauzyo 115:17.
Cisubulo cacibi ncabikkide Leza ndufwu, ikutali kupenzyegwa mumulilo wahelo. Leza wakaambila Adamu, muntu wakusaanguna, kuti lufwu ndolwakali kuyooba cisubulo cakutyola mulawo wakwe. (Matalikilo 2:17) Kunyina ncaakaamba kujatikizya kupenzyegwa kukabe kutamani muhelo. Kumane kumbele, Adamu naakabisya, Leza wakamwaambila cisubulo ncaakali kuyoopegwa naakati: “Uli bulongo, aboobo uyoojokela kubulongo.” (Matalikilo 3:19) Wakali kuyooleka kupona. Lino ikuti naa Leza wakali kuyoomutola mumulilo wahelo, sena naatakamwaambila cacigaminina? Leza tanaacinca cisubulo cipegwa kuli baabo batyola milawo yakwe. Aboobo, nokwakainda ciindi cilamfwu kuzwa Adamu naakabisya, Leza wakasololela mulembi umwi wa Bbaibbele kulemba kuti: “Cakuvwola cacibi ndufwu.” (Baroma 6:23) Takuciyandiki kusubulwa akaambo kakuti “muntu ooyo iwafwa waangununwa kucibi cakwe.”—Baroma 6:7.
Muzeezo wakupenzya bantu kukabe kutamani ulamusesemya Leza. (Jeremiya 32:35) Muzeezo uuli boobu uliimpene ancoliyiisya Bbaibbele kuti “Leza nduyando.” (1 Johane 4:8) Uyanda kuti katumukomba akaambo kakuti tulamuyanda, ikutali akaambo kakuyoowa kupenzyegwa kukabe kutamani.—Matayo 22:36-38.
Bantu bali kabotu bakaunka kuhelo. Ma Bbaibbele aabelesya bbala lyakuti “helo” apa muzeezo wakuti baalumi basyomeka, mbuli Jakobo alimwi a Jobu, bakali kulangila kuunka kuhelo. (Matalikilo 37:35; Jobu 14:13) Naba Jesu Kristo waambwa kuti wakali muhelo ciindi coonse ncaakafwide. (Milimo 2:31, 32) Calibonya kuti, ciindi bbala lyakuti “helo” nolibelesyegwa muma Bbaibbele aayo, lyaamba Cuumbwe.

Ino cikozyanyo naa caano ca Jesu camwaalumi muvwubi alimwi a Lazaro caamba nzi?

Jesu nguwakaamba cikozyanyo naa caano eeci alimwi cililembedwe kulugwalo lwa Luka 16:19-31. Zikozyanyo ziyiisya njiisyo ziluzi alimwi ambwazibona zintu zimwi Leza. Cikozyanyo camwaalumi muvwubi alimwi a Lazaro tiicakali kujatikizya bantu beni pe. (Matayo 13:34) Kutegwa muzyibe zinji kujatikizya ncico, amubone cibalo cakuti “Ino Caano Camwaalumi Muvwubi Alimwi a Lazaro Caamba Nzi?”

Sena helo caamba kwaandaanizyigwa kuli Leza?

Peepe. Njiisyo yakuti bafwide balazyiba kuti baandaanizyigwa kuli Leza iliindene ancoliyiisya Bbaibbele, lyalo ilyaamba cakusalazya kuti bafwide tabazyi cintu nociba comwe.—Intembauzyo 146:3, 4; Mukambausi 9:5.

Sena kuli muntu wakaangununwa kale kuzwa muhelo?

Inzya. Bbaibbele lilijisi zibalo izyaamba bantu bali 9 ibakafwide akuzikkwa mu Cuumbwe (bbala lisanduludwe kuti “helo” muma Bbaibbele aambi) kumane bakabusyigwa b akutalika kupona alimwi. Ikuti nobakazyiba kuti bali muhelo, nobakaamba izyakabacitikila nobakali mumo. Pele kunyina naba omwe akati kabantu aaba ibali 9 wakaamba kuti wakapenzyegwa naa kumvwa cili coonse. Nkaambo nzi? Kaambo nkakuti mbubwenya Bbaibbele mboliyiisya ciindi coonse, bantu aaba kunyina ncobakazyi pe, cakali buyo mbuli kuti ‘bakali muŋonzi’ zinji.—Johane 11:11-14; 1 Bakorinto 15:3-6.

a Bunji bwama Bbaibbele aamazuba aano aamumwaambo wa Cikuwa taabelesyi bbala lyakuti “helo” kulugwalo lwa Milimo 2:27. Muciindi caboobo, amwi abelesya mabala mbuli aakuti “cuumbwe,” (New Century Version); “nyika yabafwide,” (New International Version); “bafwide” (The Passion Translation). Mpoonya aamwi akaile kulisiya buyo bbala lyamu Chigiriki lyakuti “Hades.”—Holman Christian Standard Bible, NET Bible, New American Standard Bible, English Standard Version.

b Amubone 1 Bami 17:17-24; 2 Bami 4:32-37; 13:20, 21; Matayo 28:5, 6; Luka 7:11-17; 8:40-56; Johane 11:38-44; Milimo 9:36-42; Milimo 20:7-12.

Tupango twamu Bbaibbele tujatikizya helo, naa Cuumbwe

Jobu 14:13: “Eelo kaka inga cainda kubota kuti wandisisa mu Cuumbwe [naa “helo” kweelana a Bbaibbele lya Douay-Rheims], . . . kuti wandibikkila ciindi cili mbocibede akundiyeeya!”

Bupanduluzi: Mwaalumi iwakali kusyomeka Jobu wakalizyi kuti Cuumbwe (naa helo) cakali kuyoopa kuti kupenga kwakwe kumane akuti Leza wakali kuyoomubusya kuzwa mumo.

Intembauzyo 145:20: “Jehova ulabalinda boonse aabo bamuyanda, pele babi boonse uyoobanyonyoona.”

Bupanduluzi: Leza uyoobanyonyoona cakumaninina bantu babi. Tabakazumanani kupona mucuumbwe kutegwa abapenzye.

Mukambausi 9:10: “Kunyina mulimo naa kuyeeya noluba luzyibo naa busongo mu Cuumbwe [naa “helo” kweelana a Bbaibbele lya Douay-Rheims], oomo moya.”

Bupanduluzi: Aabo ibali mu Cuumbwe, naa muhelo, kunyina ncobazyi pe aboobo tabakonzyi kupenga. Alimwi buya, bantu mbaakalembela majwi aaya aabusongo mulembi wa Bbaibbele ooyu, bakali kubikkilizya abantu bakali kucita zibotu.

Milimo 2:31: “Wakazibonena limwi zyakumbele eelyo wakaamba zyabubuke bwa Kristo kuti kunyina naakasiigwa mu Cuumbwe.”

Bupanduluzi: Jesu Kristo naakafwa wakali mu Cuumbwe (naa helo.)

Baroma 6:23: “Cakuvwola cacibi ndufwu.”

Bupanduluzi: Lufwu, kutali kupenzyegwa muhelo, ncecisubulo cikkwene cacibi.

Ciyubunuzyo 20:13: “Lufwu a Cuumbwe zyakabaleka bafwu ibakali mulinzizyo.”

Bupanduluzi: Aabo ibali mu Cuumbwe balifwide. Bayoobusyigwa akupona alimwi.

Ciyubunuzyo 20:14: “Lufwu a Cuumbwe zyakawaalwa muzyiba lyamulilo.”

Bupanduluzi: Bantu boonse bali mu Cuumbwe (naa helo) baakubusyigwa, ciyoonyonyoonwa cakumaninina, mbuli kuti caumpwa amulilo. Kuzwa waawo, lufwu lwakaboola akaambo kacibi ca Adamu talukabi limbi pe.—Baroma 5:12.

Mboyakatalika njiisyo yamulilo wahelo

Yakatalisyigwa abantu batakali kukomba Leza: Bana Egepita bansiku bakali kusyoma mumulilo wahelo. Bbuku lyaamba zyamadilwe naa malila lyakuti Book Ȧm-Ṭuat (Amduat), lyalo basyaazibwene mumakani aakaindi njobaamba kuti njamumwaanda wamyaka wa 16 B.C.E., lyaamba kujatikizya aabo “bayoowaalwa muzilindi zyamulilo; alimwi . . . tabakaatiji mabangabanga aamulilo.”—The Egyptian Heaven and Hell.

Banakristo bakusaanguna tiibakayiisya pe: “Cilayandika kapati kuzyiba kuti mu Cizuminano Cipya, njiisyo yamulilo wahelo taijaniki mumulumbe ngobakali kukambauka Banakristo bakusaanguna.”—A Dictionary of Christian Theology.

Njiisyo zyaba Giriki zyakatalika kunjila muzikombelo: “Kuzwa akati kamwaanda wamyaka wabili [C.E.] Banakristo ibakayiisyigwa njiisyo zyaba Giriki bakatalika kusanganya njiisyo eezyo mubukombi bwabo . . . Njiisyo njobakali kuyandisya kapati yakali Platonism [zintu nzyaakayiisya Plato].” (Encyclopædia Britannica) Njiisyo eeyi yakali kubikkilizya akusyoma kuti muntu afwa wakali kupenzyegwa mumulilo. “Akati kabasyaazibwene naa bamayi boonse ba Giriki, Plato ngonguwe wakausumpula kapati muzeezo wahelo.”—Histoire des enfers (The History of Hell).

Njiisyo yamulilo wahelo yakabelesyegwa kutondezya kuti cakali buyo kabotu kupenzya bamwi: Ciindi cimwi camusyule calo civwula kwaambwa kuti The Spanish Inquisition, bantu ibakali kwaangwa akaambo kakusyoma njiisyo zimbi izyatakali zyacikombelo kumane akuumpwa acisamu, bakali kwaambilwa kuti bapegwa “kadyonko kambobakali kuyoopenga mumulilo wahelo.” Kulibonya kuti basikubapenzya bakali kulitaminina kuti bakali kucita oobo kutegwa bakulwaizye basimilandu kweempwa kabatanafwa. (The Spanish Inquisition, yakalembwa aba Jean Plaidy) Ncimwi buyo, awalo Mwami mukaintu waku England wazina lya Mary I wakaumpa ma protesitanti babalilwa ku 300 acisamu, kulibonya kuti wakacita oobo akaambo kakusyoma kuti “myuuya yabantu ibakali kusyoma munjiisyo zimbi izyatakali zyacikombelo yakali kuyooumpwa kukabe kutamani mumulilo wahelo, aboobo kunyina cakalubide mukubasubula kwiinda mukubaumpa aano anyika, mbuli Leza mbwaakali kuyoosubula bantu babi.”—Universal History, yakalembwa aba Alexander Tytler.

Kucinca ikwaba mazuba aano: Mazuba aano zikombelo zimwi zyakaleka kwaamba zintu zibi kapati kujatikizya helo. Pele tiizyakacita oobo akaambo kakuti lino zisyoma kuti njiisyo yamulilo wahelo njakubeja. Kulibonya kuti ziyanda buyo kukkomanisya bantu bazulilwa mumo. (2 Timoteyo 4:3) “Mazuba aano bantu bayanda Leza mubotu moyo, uusikilika alimwi uubapa kulimvwa kabotu . . . Makani aamba kujatikizya cibi alimwi amulandu taadumide pe mazuba aano.”—Basyaazibwene ba Jackson W. Carroll.