Baroma 6:1-23
6 Aboobo ino twaambe nzi? Sena tuzumanane kubisya ikutegwa luzyalo lwa Leza luvwule?
2 Peepe! Mbwaanga twakafwa kucibi,+ ino mbuti mbotukonzya kuzumanana kupona mucibi?+
3 Naa sena tamuzyi kuti swebo toonse notwakabbapatizyigwa muli Kristo Jesu+ twakabbapatizyigwa mulufwu lwakwe?+
4 Aboobo twakazikkwa anguwe kwiinda mulubbapatizyo lwesu mulufwu lwakwe,+ kutegwa mbuli Kristo mbwaakabusyigwa kuzwa kubafwu kubulemu bwa Usyi, mbubonya oobo andiswe tweelede kupona buumi bupya.+
5 Nkaambo ikuti naa twakamantana anguwe mulufwu luli mbuli lwakwe,+ nkokuti masimpe tuyookamantana alimwi anguwe mububuke buli mbuli bwakwe.+
6 Nkaambo tulizyi kuti buntu bwesu bwakaindi bwakagagailwa anguwe acisamu,+ ikutegwa mubili wesu mubi kautacikwe nguzu+ alindiswe akuti tutazumanani kuba bazike bacibi.+
7 Nkaambo muntu ooyo iwafwa waangununwa kucibi* cakwe.
8 Kunze lyaboobo, ikuti katufwide a Kristo, tusyoma kuti tuyoopona alimwi anguwe.
9 Nkaambo lino tulizyi kuti mbwaanga Kristo wakabusyigwa kubafwu,+ takonzyi kufwa alimwi pe;+ lufwu talucikwe nguzu kulinguwe pe.
10 Nkaambo lufwu ndwaakafwa, wakafwa buyo ciindi comwe kukabe kutamani kuti agusye cibi,+ pele buumi mbwapona, uponena Leza.
11 Mbubonya buyo andinywe, amulibone kuti mulifwide kucibi, pele kuti mulapona kuli Leza kwiinda muli Kristo Jesu.+
12 Aboobo, mutalekeli cibi kuzumanana kweendelezya mbuli mwami mumibili yanu iifwa+ ikutegwa kamutobela zisusi zyanjiyo.
13 Alimwi mutazumanani kwaaba mibili yanu* kucibi kaili zilwanyo zyakutalulama, pele amulyaabe kuli Leza mbuli bantu baumi ibakabusyigwa kuzwa kubafwu, alimwi amwaabe mibili yanu* kuli Leza kaili zilwanyo zyabululami.+
14 Mutalekeli cibi kuba simalelaanu mbwaanga tamweendelezyegwi amulawo pe,+ pele mweendelezyegwa aluzyalo lwa Leza.+
15 Ino twaambe nzi? Sena tweelede kubisya akaambo kakuti tatweendelezyegwi amulawo pele tweendelezyegwa aluzyalo lwa Leza?+ Peepe!
16 Sena tamuzyi kuti, ikuti naa kamulyaaba kumuntu umwi mbuli bazike bamvwida, nkokuti muli bazike bamuntu ooyo ngomuswiilila?+ Aboobo ikuti kamuli bazike bacibi+ muyootambula lufwu,+ pele ikuti kamuli bazike bakuswiilila muyootambula bululami.
17 Pele aalumbwe Leza kuti nokuba kuti mwakali bazike bacibi, mwakaziswiilila kuzwa ansi aamoyo injiisyo eezyo nzyomwakapegwa.
18 Inzya, mbwaanga mwakaangununwa kucibi,+ mwakaba bazike babululami.+
19 Akaambo kakubula nguzu kwamibili yanu, ndibelesya majwi ngobazyi kabotu bantu; nkaambo mbubonya ciindi cimwi mbomwakaaba zizo zyanu cakumaninina kuti mube bazike kubusofwaazi akububi kutegwa mucite buyo bubi, lino amwaabe zizo zyanu cakumaninina kamuli bazike kubululami kutegwa mube bantu basalala.+
20 Nkaambo nomwakali bazike bacibi, mwakalaangulukide kucita zintu zitaluleme.
21 Ino micelo nzi njomwakali kuzyala kuciindi eeco? Nzintu eezyo lino izimuusya nsoni. Nkaambo mamanino aazintu eezyo ndufwu.+
22 Pele lino akaambo kakuti mwakaangununwa kucibi akuba bazike ba Leza, imicelo njomuzyala mbusalali,+ eelyo kumamanino mbuumi butamani.+
23 Nkaambo cakuvwola cacibi ndufwu,+ pele cipego ncapa Leza mbuumi butamani+ kwiinda muli Kristo Jesu Mwami wesu.+
Bupanduluzi buyungizyidwe
^ Naa “wajatilwa cibi; walekelelwa cibi.”
^ Mu Chigiriki, “zizo zyanu.”
^ Mu Chigiriki, “zizo zyanu.”
