Helo (“Sheol alimwi a “Hades” mumyaambo yakusaanguna yamu Bbaibbele) ncuumbwe, kutali busena bantu nkobapenzyegwa mumulilo. Ino mbaani baunka ku helo? Bantu bali kabotu alimwi abatali kabotu. (Jobu 14:13; Intembauzyo 9:​17) Bbaibbele lyaamba kuti cuumbwe eeci ‘niŋanda iimikilidwe boonse bapona.’​—⁠Jobu 30:23.

 Awalo Jesu wakaunka ku helo naakafwa. Pele “kunyina naakasiigwa mu Cikkalilo Cabafwu,” naa helo akaambo kakuti Leza wakamubusya.​—Milimo 2:​31, 32.

Sena helo inooliko mane kukabe kutamani?

 Boonse baunka ku helo bayakujoka, uyoobabusya Jesu kwiinda mukubelesya nguzu zya Leza. (Johane 5:​28, 29; Milimo 24:15) Kujatikizya bubuke oobu bwakumbele, businsimi bujanika mulugwalo lwa Ciyubunuzyo 20:13 bwaamba kuti “lufwu a Cikkalilo Cabafwu [naa helo] zyakabaleka bafwu ibakali mulinzizyo.” Baakubusyigwa bantu boonse, helo taicinooliko pe; kunyina uyakuunka nkuko akaambo kakuti “lufwu talukoyoobako limbi.”​—⁠Ciyubunuzyo 21:​3, 4; 20:14.

 Nokuba boobo, tabali boonse ibafwa baunka ku helo. Bbaibbele lyaamba kuti bantu bamwi balabisya cakuti inga tiibeempwa pe. (Bahebulayo 10:26, 27) Bantu bali boobu kuti bafwa, tabaunki ku helo pe, pele baunka ku Gehena, busena bwiiminina kunyonyoonwa kukabe kutamani. (Matayo 5:​29, 30) Mucikozyanyo, Jesu wakaamba kuti bamwi basololi bazikombelo basikuupaupa ameso ibakali kupona ciindi naakali anyika bayakuunka ku Gehena.​—⁠Matayo 23:27-​33.