Ino Leza Ujisi Mazina Ongaye?

AMULIZYE

Bwiinguzi bwamu Bbaibbele

Leza ujisi buyo zina lyomwe limugeme. Lilembwa kuti יהוה mu Chihebrayo mpoonya kanji-kanji mu Chitonga lilembwa kuti “Jehova.” a Kwiinda mumusinsimi Isaya, Leza wakaamba kuti: “Ndime Jehova. Eeli ndezina lyangu.” (Isaya 42:8) Zina eeli lilajanika ziindi zibalilwa ku 7,000 mumalembe aakaindi aa Bbaibbele—ziindi zinji kapati kwiinda zina limbi lili loonse lyaamba Leza naa zina limbi lili loonse lyamuntu. b

Sena Leza ulaamazina aambi?

Nokuba kuti Bbaibbele lilamwaamba Leza kwiinda mukubelesya buyo zina lyakwe limugeme, lilabelesya mazina manji aabulemu alimwi aamupandulula. Mulongo uutobela uujisi mazina amwi aabulemu alimwi aamupandulula utondezya zina limwi alimwi mboliyubununa bube bwa Jehova naa mbwabede.

Zina lyabulemu	Mpolijanika	Ncolyaamba
Allah	(Kunyina)	Ibbala lyakuti “Allah” ndyaci Arabic alimwi talili zina ligaminide pele ndizina lyabulemu ilyaamba kuti “Leza.” Ma Bbaibbele aamuci Arabic alimwi aamumyaambo iimbi abelesya zina lya “Allah” ikwaamba “Leza.”
Singuzuzyoonse	Matalikilo 17:1	Ulijisi nguzu zitakonzyi kukazyigwa. Mabala aamu Chihebrayo aakuti ʼEl Shad·daiʹ, “Leza Singuzuzyoonse,” alajanika ziindi izili ciloba mu Bbaibbele.
Imutaanzi Amusyaalizi	Ciyubunuzyo 1:8; 21:6; 22:13	“Imutaanzi amusyaalizi,” naa “imatalikilo amamanino,” caamba kuti kunyina Leza Singuzuzyoonse iwakaliko musyule lya Jehova alimwi kunyina uuyooba kumbele lyakwe. (Isaya 43:10) Imutaanzi amusyaalizi ngamabala aakusaanguna aamamanino mualufabbeti yamu Chigiriki.
Sinsiku	Daniele 7:9, 13, 22	Tajisi matalikilo; walikupona lyoonse kakutanalengwa muntu uuli woonse naa cintu cili coonse.—Intembauzyo 90:2.
Mulengi	Isaya 40:28	Nguwakalenga zintu zyoonse ziliko
Taata	Matayo 6:9	Sikupa buumi.
Leza	Matalikilo 1:1	Cintu cikombwa; Cilaanguzu. Ibbala lya Chihebrayo lyakuti ʼElo·himʹ litondezya bupati bwa Jehova, bulemu, naa bubotu bwakwe.
Leza wabaleza	Deuteronomo 10:17	Mukwiimpana ‘abaleza banyina mulimo,’ Leza mupatikampatila ulakombwa abantu.—Isaya 2:8.
Mwiiyi Mupati	Isaya 30:20, 21	Ulapa lwiiyo lugwasya alimwi abusolozi.—Isaya 48:17, 18.
Mulengi Mupati	Intembauzyo 149:2	Nguwakalenga zintu zyoonse ziliko.—Ciyubunuzyo 4:11.
Leza uukkomene	1 Timoteyo 1:11.	Ulijisi lukkomano.—Intembauzyo 104:31.
Sikuswiilila mipailo	Intembauzyo 65:2	Ulaswiilila mupailo umwi aumwi iwaambwa cakusyomeka.
Ndiyooba Kufwumbwa Mbondasala Kuba	Kulonga 3:14	Ulaba kufwumbwa ciyandika kutegwa azuzikizye makanze aakwe. Bupanduluzi oobu bugwasya kupandulula zina limugeme, Jehova, ilyaambidwe mukapango katobela.—Kulonga 3:15.
Uuyanda kuti kakombwa buyo alikke	Kulonga 34:14	Uyanda kuti kakombwa buyo alikke.
Mwami walyoonse alyoonse	Ciyubunuzyo 15:3	Bweendelezi bwakwe tabujisi matalikilo naa mamanino.
Mwami	Intembauzyo 135:5	Mukamwini naa simalelo; mu Chihebrayo ʼA·dhohnʹ a ʼAdho·nimʹ.
Leza wamakamu	Isaya 1:9	Mweendelezi wamakamu aabangelo.
Mupatikampatila	Intembauzyo 47:2	Nguujisi cuuno cisumpukide.
Ooyo Uusalalisya	Tusimpi 9:10	Nguuinda kusalala (mubukkale boonse)
Mubumbi	Isaya 64:8	Ulijisi nguzu kubantu alimwi amasi, mbubwenya mubumbi mbwajisi nguzu kubulongo.—Baroma 9:20, 21.
Munununi	Isaya 41:14	Ulabanununa bantu kuzwa kucibi alufwu kwiinda mucipaizyo cacinunuzyo ca Jesu Kristo.—Johane 3:16
Ndomba	Intembauzyo 18:2, 46	Motuyubila alimwi ndolufwutuko lwesu.
Mufwutuli	Isaya 45:21	Ulavwuna kuntenda naa mapenzi.
Mweembezi	Intembauzyo 23:1	Ulabalanganya bakombi bakwe.
Mwami Singuzuzyoonse	Matalikilo 15:2	Ulaanguzu zinji zyakweendelezya; mu Chihebrayo ʼAdho·naiʹ.
Mupati Kwiinda	Daniele 7:18, 27	Mwami wiinda boonse.

Masena amwi aajisi mazina mu Magwalo aa Chihebrayo

Masena amwi aajisi mazina aamu Bbaibbele alabikkilizya azina lya Leza ilimugeme, pele aaya taali mazina aakonzya kunjila mubusena bwazina lya Leza.

Busena	Mpobujanika	Ncolyaamba
Jehova-jire	Matalikilo 22:13, 14	“Jehova Uyoopa.”
Jehova-nisi	Kulonga 17:15	“Jehova Nindembela Yangu.” Jehova ngu Leza kwalo bantu bakwe nkobakonzya kubungana kutegwa bakwabililwa alimwi akugwasyigwa.—Kulonga 17:13-16.
Jehova-salomu	Babetesi 6:23, 24	“Jehova Nduumuno.”

Ncotweelede kulizyiba zina lya Leza akulibelesya

Leza weelede kulimvwa kuti izina lyakwe limugeme lyakuti Jehova lilayandika kapati, akaambo kakuti wakalibikkilizya mu Bbaibbele ziindi zinji kapati.—Malaki 1:11.
Mwana wa Leza, Jesu, cakwiinduluka-induluka wakakankaizya mboliyandika zina lya Leza. Mucikozyanyo, kuli Jehova wakapaila kuti: “Alisalazyigwe zina lyako.”—Matayo 6:9; Johane 17:6.
Aabo ibalizyiba akulibelesya zina lya Leza babweza ntaamu yakusaanguna kuba acilongwe a Jehova. (Intembauzyo 9:10; Malaki 3:16) Cilongwe cili boobo cipa kuti bagwasyigwe acisyomezyo ca Leza cakuti: “Akaambo kakuti ulandiyanda, ndiyoomuvwuna. Ndiyoomukwabilila akaambo kakuti ulilizyi zina lyangu.”—Intembauzyo 91:14.
Bbaibbele lilazuminizya kuti: “Nkobali aabo baambwa kuti baleza, kufwumbwa naa nkuujulu naa mpaanyika, mbubonya mbokuli ‘baleza’ banji ‘abami’ banji.’” (1 Bakorinto 8:5, 6) Nokuba boobo cakusalazya lyaamba Leza omwe wakasimpe azina lyakuti, Jehova.—Intembauzyo 83:18.

a Basikulemba Chihebrayo bamwi balombozya kulemba zina lya Leza kuti “Yahweh.”

b Zina lya Leza ililembwa kuti “Ja” mubufwaafwi lilajanika ziindi zibalilwa ku 50, kubikkilizya anoliswaanganizyigwa abbala lyakuti “Aleluya” calo icaamba kuti “Amumutembaule Ja.”—Ciyubunuzyo 19:1