Ndakazyalilwa kucisi kaindi icakali kwiitwa kuti German Democratic Republic (GDR), mumunzi wa Saxony. Bukkale mbotwakali kupona aŋanda bwakali kukkomanisya alimwi bwakali kabotu. Bazyali bangu bakandiyiisya kulilemeka kabotu. Cisi ca GDR cakali cisi oomo bantu mobakali kusyoma kuti lubono lwacisi ndwabantu boonse, aboobo bantu banji mumunzi wa Saxony, bukombi tiibakali kububikkila maano. Mebo lwangu ndakali kusyoma kuti Leza tako pe. Mumyaka yangu yakuzyalwa iili 18, ndakali kweendelezyegwa amizeezo yobilo: wakutasyoma kuti Leza nkwali alimwi awakusyoma kuti lubono lwacisi ndwabantu boonse.

Ino nkaambo nzi ncondakali kusyoma kuti lubono lwacisi ndwabantu boonse? Akaambo kakuti ndakali kuukkomanina muzeezo wakuti bantu boonse baleelene. Kuyungizya waawo, ndakali kusyoma kuti zintu zyoonse zyakeelede kwaabanizyigwa kabotu, mbwaanga eeci cakali kuyoomana penzi lyakuti bamwi mbavwubi kapati kwiinda bamwi. Aboobo ndakajata bubi mukabunga kabakubusi ikakali kusyoma kuti lubono lwacisi ndwabantu boonse. Nondakajisi myaka yakuzyalwa iili 14, ndakabeleka kwaciindi cilamfwu mumulimo wakubambulula mapepa aakasowedwe kuti abe mapya alimwi. Bantu bamudolopo lya Aue bakabotelwa kapati akaambo kamulimo ngondakali kucita cakuti imfwulumende yakandipa bulumbu. Nokuba kuti ndakacili mwana, ndakaba acoolwe cakuzyibana ankume-nkume zyamapolitikisi zyamucisi ca GDR. Ndakali kulimvwa kuti ndakajisi makanze mabotu alimwi akuti buumi bwangu bwakali kuyooba kabotu kumbele.

Mpoonya cakutayeeyelwa zintu zyakacinca. Mu 1989, munyinza iwakali kwaandaanya cisi ca Germany uutegwa Berlin Wall wakamwaigwa alimwi Nkamu yamasi aa Kkomyunizimu aaku Eastern Europe yakamana. Asyoonto-syoonto zintu zyakali kuyaabunyongana. Kalitanalampa, ndakazyiba kuti kwakali kudyaaminina kutaambiki mucisi ca GDR. Mucikozyanyo, bantu ibatakali kuuzumina muzeezo wakusyoma kuti lubono lwacisi ndwabantu boonse, bakali kudyaamininwa kapati. Kuyeeya kuli boobu tiikwakali kabotu pe. Sena ooyu tauli ngomuzeezo ngotwatakali kuyanda swebo notwakali kusyoma kuti lubono lwacisi ndwabantu boonse? Sena ooku tiikwakali kwaamba buyo amulomo? Eeci cakandityompya kapati.

Aboobo eeci cakandipa kuti ndicince makanze ngondakajisi akutalika kwiimba alimwi akuzekaula. Mbwaanga ndakali kukonzya kwiiya mbokwiimbwa kucikolo kandijisi bulangizi bwakuunka kuyunivesiti, ndakali kulombozya kuti kwiimba ube ngomulimo ngondinoocita mubuumi. Kuyungizya waawo, ndakacileka kulilemeka kabotu kweelana ambondakayiisyigwa kandicili mwana. Cintu ncondakali kubikkila kapati maano aciindi eeci nkulikondelezya, calo  icakali kubikkilizya kusyaba basimbi banji aciindi comwe. Pele kwiimba, kuzekaula alimwi abuumi bwakulikondelezya tiizyakapa kuti kutyompwa kwangu kumane. Noziba zifwanikiso nzyondakali kupenta zyakali kutondezya kuti ndakali kulibilika. Ino buumi bwakali kuyooba buti kumbele? Alimwi ino buumi bwakajisi mpindu nzi?

Nondakabujana bwiinguzi mbondakali kuyandula, ndakagambwa kapati. Mangolezya amwi kukkoleji, ndakalikkede ankamu yabasicikoloma katubandika zyabuumi bwakumbele. Mandy * wakali sicikoloma alimwi wakali umwi wa Bakamboni ba Jehova. Mangolezya aayo, Mandy wakanditondezya nzila iili kabotu. Wakandiita kuti, “Andreas, ikuti koyanda bwiinguzi kujatikizya buumi azintu zyakumbele, kolibikkila maano kapati Bbaibbele.”

Tiindakacisyoma ncaakandaambila pe, pele ndakalibweza Bbaibbele akulibala. Mandy wakandikulwaizya kuti ndibale lugwalo lwa Daniele caandaano 2, alimwi ncondakabala cakandigambya kapati. Businsimi oobu bwaamba kuccililana kwabeendelezi banyika yoonse, nkokuti mfwulumende izyakali kunooyendelezya mane kusikila amumazuba ngotupona. Mandy wakanditondezya businsimi abumbi bwamu Bbaibbele ibwaamba kujatikizya buumi bwakumbele. Ndakatalika lino kubujana bwiinguzi bwamibuzyo njondakajisi. Pele ino nguni wakalemba businsimi oobo, alimwi nguni uukonzya kusinsima zyakumbele kakunyina kwiimpya? Sena eeci caamba kuti Leza nkwali ncobeni?

Mandy wakandiletela banabukwetene Bakamboni, ba Horst aba Angelika balo bakandigwasya kutegwa ndilimvwisye kabotu Jwi lya Leza. Kalitanalampa, ndakazyiba kuti mbunga ya Bakamboni ba Jehova njembunga yabukombi iibelesya zina lya Leza limugeme lyakuti, Jehova. (Intembauzyo 83:18; Matayo 6:9) Ndakaiya kuti Jehova Leza wakapa bantu bulangizi bwakupona kukabe kutamani anyika yaparadaiso. Lugwalo lwa Intembauzyo 37:9 lwaamba kuti: “Aabo balangila Jehova bayookona nyika.” Eeci cakandigwasya kuzyiba kuti bulangizi oobu bulipedwe kubantu boonse ibayanda kupona kweelana azyeelelo zya Leza mbubonya mbozyaambidwe mu Bbaibbele.

Nokuba boobo, ndakapenga kapati kucinca bukkale bwangu kutegwa ndipone kweelana ancolyaamba Bbaibbele. Mpuwo njondakajisi akaambo kakuba mwiimbi yakandipa kulisumpula, aboobo ndakali kuyandika kwiiya kulicesya. Kuyungizya waawo, tiicakali cuuba-uba kuleka buumi bwakutalilemeka mbondakali kupona musyule. Eelo kaka cilakkomanisya kuzyiba kuti Jehova ulakkazika moyo, ngusiluse alimwi ulabamvwisya aabo ibasolekesya kupona kweelana a Bbaibbele ncoliyiisya!

Muzeezo wakusyoma kuti lubono lwacisi ndwabantu boonse alimwi akutasyoma kuti Leza nkwali, wakandeendelezya kwamyaka iili 18 yakusaanguna yabuumi bwangu; pele Ibbaibbele lyali kubucinca buumi bwangu kuzwa ciindi nondakatalika kuliiya. Nzyondakaiya zyakapa kuti ndicileke kulibilika kujatikizya buumi bwakumbele alimwi cakandipa kuti ndibe abuumi bulaampindu. Mumwaka wa 1993, ndakabbapatizyigwa akuba umwi wa Bakamboni ba Jehova, mpoonya mumwaka wa 2000, ndakakwata ba Tabitha, musyomima musungu. Tulatola ciindi cinji kufwumbwa leelyo nocikonzyeka kugwasya bantu kutegwa balizyibe Bbaibbele. Bantu banji mbotuswaanganya mubukambausi bali mbuli mbondakabede kaindi, basyoma kuti lubono lwacisi ndwabantu boonse alimwi tabasyomi kuti Leza nkwali. Ndilimvwa kukkutila kapati ciindi nondigwasya bantu kubona mbobakonzya kumuzyiba Jehova.

Ciindi nondakatalika kwiiya a Bakamboni ba Jehova, bazyali bangu bakanyongana kapati. Nokuba boobo, kuzwa ciindi eeco balibonena kuti kuyanzana a Bakamboni ba Jehova kwandigwasya kapati. Cindikkomanisya ncakuti, lino balaiya Bbaibbele alimwi akujanika kumiswaangano. ya Bunakristo ya Bakamboni ba Jehova

Mebo aba Tabitha tulikkomene mucikwati cesu nkaambo tulasola kulutobela lulayo lwamu Bbaibbele lwaamba zyabanabukwetene. Mucikozyanyo, kutobela lulayo lwandilyo lujatikizya kusyomeka mucikwati kwazumanana kuyumya cikwati cesu.—Bahebrayo 13:4.

Lino tandiciyoowi mubuumi alimwi akulibilika kujatikizya zyakumbele. Ndilimvwa kuba cibeela camukwasyi wanyika yoonse wabasyomima, walo uujisi luumuno lwini-lwini alimwi alukamantano. Mumukwasyi ooyu tulibona kuti toonse tuleelene. Eeci ncondakali kusyoma alimwi ncondakali kuyanda kuzuzikizya mubuumi bwangu.