NZYOBAAMBA BANTU

Misyobo imwi yabantu ibona kuti kunyina cilubide akucita bumambe ikapati kuti bwacitwa amulumi. Alimwi bamwi babona cikwati kuti tabuli bubambe bweelede kukkalilila.

NCOLYAAMBA BBAIBBELE

Mu Bbaibbele, bumambe kanji-kanji caamba koonana kwakuliyandila nkwacita muntu uukwete naa uukwetwe amuntu ngwatakwetene limwi. (Jobu 24:15; Tusimpi 30:20) Bumambe ncintu cimusesemya Leza. Mu Israyeli wansiku, ibakali kujatwa bumambe bakali kujaigwa. (Levitiko 18:20, 22, 29) Jesu wakayiisya kuti basikumutobela tabeelede kucita bumambe.—Matayo 5:27, 28; Luka 18:18-20.

KAAMBO NCOCIYANDIKA

Ibacita bumambe tabalemeki cikonke ncobakakonka ciindi nobakakwatana. Alimwi ‘nkubisizya Leza.’ (Matalikilo 39:7-9) Bumambe bulakonzya kwaandaanya bana kubazyali babo. Alimwi kaambo kapati nkakuti “Leza uyoobabeteka . . . basimamambe.”—Bahebrayo 13:4.

“Cikwati acilemekwe abantu boonse, alimwi bulo bwacikwati butasofwaazyigwi pe.”—Bahebrayo 13:4.

NCOLYAAMBA BBAIBBELE

Bbaibbele lilazumizya banabukwetene kulekana kuti umwi wacita bwaamu. (Matayo 19:9) Eeci caamba kuti, ikuti umwi wacita bumambe, nkokuti ooyo uunyina mulandu ulakonzya kusala kumuleka iwacita bumambe naa kuzumanana kukkala anguwe. Aaya makani aakulisalila.—Bagalatiya 6:5.

Kulubazu lumwi, walo Leza ubona cikwati kuti cilisetekene alimwi taceelede kumana. (1 Bakorinto 7:39) Leza ulabijilwa kuti muntu wasala kumana cikwati akaambo katwaambo tutayi komoonga mbuli kutabotelwa angobakwetene limwi. Aboobo, kusala kulekana taali makani mauba-uba.—Malaki 2:16; Matayo 19:3-6.

“Ndimwaambila kuti kufwumbwa uuleka mukaintu wakwe ikutali akaambo kabwaamu, umubikka muntenda yakucita bumambe.” —Matayo 5:32.

NCOLYAAMBA BBAIBBELE

Peepe. Bbaibbele lyaamba kuti Leza ulabafwida luse aabo ibeempwa akuleka zibi zyabo kubikkilizya abumambe. (Milimo 3:19; Bagalatiya 5:19-21) Alimwi buya Bbaibbele lilaamba kujatikizya bamaalumi abamakaintu ibakacileka kucita bumambe eelyo bakaba balongwe ba Leza.—1 Bakorinto 6:9-11.

Luse lwa Leza lwakalibonya mumakani aajatikizya Mwami Davida wamu Israyeli wansiku. Davida wakacita bumambe amukaintu waumwi wabasikalumamba bakwe. (2 Samuele 11:2-4) Bbaibbele lilaamba cakusalazya kuti “ncaakacita Davida cakabija kapati” kuli Leza. (2 Samuele 11:27) Naakasinswa, Davida wakeempwa eelyo Leza wakamulekelela. Nokuba boobo, Davida wakali kuyoopenga akaambo kacibi ncaakacita. (2 Samuele 12:13-14) Mwami musongo Solomoni wakazikwaamba kuti “muntu woonse uucita bumambe . . . takwe maano pe.”—Tusimpi 6:32.

NCOMUKONZYA KUCITA

Ikuti mwacita bumambe, mweelede kulomba kulekelelwa kuli Leza akuli ngomukwetene limwi. (Intembauzyo 51:1-5) Amwiiye kusulaika bumambe mbubwenya mbwabusulaika Leza. (Intembauzyo 97:10) Amube amakanze aakuteebelela zintu ziletela muzeezo wakoonana, kutayeeya azintu zyakoonana, kulitondezya kuti mulamuyanda muntu ngomutakwetene limwi naa cintu buyo cimwi cikonzya kumupa kuti muyande koonana amuntu ngomutakwetene limwi.—Matayo 5:27, 28; Jakobo 1:14, 15.

Ikuti ngomukwetene limwi wakalicitide bumambe, amusyome kuti Leza ulizyi mbomulimvwa. (Malaki 2:13, 14) Amumulombe kuti amusololele alimwi akumuumbulizya mpoonya ‘walo uyoomulanganya.’ (Intembauzyo 55:22) Ikuti mwasala kumulekelela ngomukwetene limwi akuzumanana kukkala mucikwati, nyoonse nyobilo mweelede kubeleka canguzu kubambulula cikwati canu.—Baefeso 4:32.

Musinsimi Natani wakaambila Davida iwakeempwa kubumambe mbwaakacitide kuti: “Awalo Jehova wakulekelela cibi cako.”—2 Samuele 12:13.