Bahebrayo 7:1-28
7 Nkaambo ooyu Melekizedeki, imwami waku Salemu, imupaizi wa Leza Mupatikampatila, wakaswaangana a Abrahamu naakali kupiluka kuzwa kukujaya bami mpoonya wakamulongezya,+
2 alimwi Abrahamu wakamupa cakkumi cazintu zyoonse. Cakusaanguna, izina lyakwe lisandululwa kuti, “Mwami wa Bululami,” mpoonya alimwi ngomwami waku Salemu, nkokuti, “Mwami wa Luumuno.”
3 Mbwaanga tajisi bausyi abanyina, tajisi mulongo wazyalani nkwazulilwa, alimwi tajisi matalikilo aamazuba aakwe naaba mamanino aabuumi bwakwe, pele wakacitwa kuba mbuli Mwana wa Leza, ulazumanana kali mupaizi lyoonse.+
4 Amubone mbwaakali mupati muntu ooyu, ooyo Abrahamu silutwe wamukwasyi,* ngwaakapa cakkumi cazintu zibotu kapati nzyaakasaala.+
5 Masimpe, kweelana ambowaamba Mulawo, aabo bazwa mubana basankwa ba Levi+ ibatambula mulimo wabupaizi balaililwa kubweza cakkumi kubantu,+ nkokuti, kuzwa kubanabokwabo, nokuba kuti aaba mbaluzubo* lwa Abrahamu.
6 Pele muntu ooyu watakali kuzulilwa mumulongo wazyalani lyaba Levi wakatambula zyakkumi kuli Abrahamu alimwi wakamuleleka ooyo wakajisi zisyomezyo.+
7 Lino tacikazyigwi pe kuti imusyoonto ulelekwa amupati.
8 Kulubazu lumwi ibantu bafwa mbabatambula zyakkumi, pele kulubazu lumbi imuntu uutambula ngooyo uucitilwa bumboni bwakuti muumi.+
9 Alimwi inga kwaambwa kuti naba Levi ooyo uutambula zyakkumi, awalo wakapa zyakkumi kwiinda muli Abrahamu,
10 nkaambo tanaakaningaba lunyungu* lwasyaanyinakulu ciindi Melekizedeki naakaswaangana anguwe.+
11 Aboobo, ikuti nocakali kukonzyeka kulondoka kwiinda mubupaizi bwabana Levi+ (nkaambo bwakali cintu ciyandika mu Mulawo iwakapegwa kubantu), sena nokwacili kuyandika kubuka mupaizi uumbi uuli mbuli Melekizedeki+ ikutali uuli mbuli Aroni?
12 Lino mbwaanga bupaizi buli mukucincwa, kuyandika kuti awalo Mulawo ucincwe.+
13 Nkaambo muntu ooyo waambwa kujatikizya zintu eezyi wakazwa kumusyobo umbi, oomo mutakwe muntu wakabeleka mulimo kucipaililo.+
14 Nkaambo cilisalede kuti Mwami wesu ngwaluzubo lwa Juda,+ nokuba boobo Musa tanaakaamba cintu cili coonse kuti bapaizi bazwa kumusyobo ooyo.
15 Alimwi eeci cilalibonya kapati nokubuka mupaizi umbi+ uuli mbuli Melekizedeki,+
16 iwaba boobo, ikutali kweelana ambowaamba mulawo uuyeeme abuzyale bwakumubili, pele kweelana anguzu zyabuumi butakonzyi kunyonyoonwa.+
17 Nkaambo kujatikizya nguwe bumboni bumwi bwaamba kuti: “Yebo uli mupaizi lyoonse mane kukabe kutamani mbubonya mbuli Melekizedeki.”+
18 Aboobo, mulawo wakusaanguna wagusyigwa nkaambo taujisi nguzu alimwi taugwasyi pe.+
19 Nkaambo kunyina cintu Mulawo ncowakalondola,+ pele ibulangizi butaliboteli ibwakaletwa mbobwakalondola zintu,+ alimwi muli mbubo motuswenena afwaafwi kuli Leza.+
20 Alimwi, mbwaanga eeci tiicakacitwa buyo kakunyina cikonke
21 (nkaambo ncobeni nkobali baalumi aabo ibakaba bapaizi kakunyina cikonke, pele ooyu waba mupaizi kwiinda mucikonke cakakonkwa kujatikizya nguwe ayooyo iwakaamba kuti: “Jehova* wakonka, alimwi takacinci maano pe,* ‘Yebo uli mupaizi lyoonse mane kukabe kutamani’”),+
22 awalo Jesu waba cisinizyo cacizuminano ciinda kubota.+
23 Kunze lyaboobo, kwakaba bapaizi banji basimulyazina+ nkaambo lufwu lwakali kubakasya kuzumanana kabali bapaizi,
24 pele akaambo kakuti walo ulapona lyoonse mane kukabe kutamani,+ ibupaizi bwakwe tabujisi basimulyazina pe.
25 Aboobo ulakonzya kubafwutula cakumaninina aabo baboola kuli Leza kwiinda mulinguwe, nkaambo walo ulapona lyoonse kutegwa kabakombelezyela.+
26 Nkaambo swebo tuyandika mupaizi mupati uuli boobu, uusyomeka, uutakwe mulandu, uutasofweede,+ uuzandwidwe kuli basizibi, alimwi uusumpukide kwiinda majulu.+
27 Mukwiimpana abapaizi bapati aabo, walo tayandiki kutuula zituuzyo abuzuba pe,+ kusaanguna kujatikizya zibi zyakwe mwini mpoonya azyabantu bambi,+ nkaambo eeci wakacicita ciindi comwe buyo naakalituula lwakwe mwini.+
28 Nkaambo Mulawo usala baalumi batajisi nguzu kuba bapaizi bapati,+ pele ijwi lyacikonke+ ilyakaambwa musyule a Mulawo lisala mwana, ooyo wakalondolwa+ kukabe kutamani.
Bupanduluzi buyungizyidwe
^ Naa “sikale.”
^ Mu Chigiriki, “bazwa mucibuno.”
^ Mu Chigiriki, “wakacili mucibuno.”
^ Amubone Makani Aayungizyidwe A5.
^ Naa “takausi pe.”
