Bahebrayo 4:1-16
4 Aboobo, mbwaanga cisyomezyo cakunjila mukulyookezya kwakwe nkocicili, atucenjele kuti kutabi naba omwe akati kanu uukonzya kubonwa kuti teeleli kunjila.+
2 Nkaambo andiswe twakakambaukilwa makani mabotu mbubonya mbuli mbabo;+ pele ijwi ndyobakamvwa kunyina nolyakabagwasya pe, nkaambo tiibakakamantene mulusyomo abaabo ibakaswiilila.
3 Nkaambo swebo notwatondezya lusyomo tulanjila mukulyookezya ooko, mbubonya mbwaamba kuti: “Aboobo kandinyemede ndakakonka ndilaamba, ‘Tabakanjili pe mukulyookezya kwangu,’”+ nokuba kuti milimo yakwe yakalimanizyidwe kuzwa kumatalikilo aanyika.+
4 Nkaambo kujatikizya buzuba bwaciloba, cibalo cimwi camu Magwalo caamba kuti: “Eelyo Leza wakalyookezya kumilimo yakwe yoonse mubuzuba bwaciloba,”+
5 alimwi lino Leza waamba kuti: “Tabakanjili pe mukulyookezya kwangu.”+
6 Aboobo, mbwaanga kucili bamwi ibeelede kunjila mukulyookezya ooku, alimwi aabo bakasaanguna kukambaukilwa makani mabotu tiibakanjila akaambo kakutaswiilila,+
7 alimwi lino kakwiindide ciindi cilamfwu wabikka buzuba bumwi kwiinda mukwaamba zili kuntembauzyo ya Davida kuti, “Sunu”; mbubonya mbokwaambwa musyule kuti, “Sunu ikuti nywebo muswiilile jwi lyakwe, mutayumyi myoyo yanu pe.”+
8 Nkaambo ikuti Joshua+ naakabanjizya mubusena bwakulyookezyela, kunyina Leza kumbele naakali kunga waamba zyabuzuba bumbi pe.
9 Aboobo kucili sabata yakulyookezya kubantu ba Leza.+
10 Nkaambo muntu iwanjila mukulyookezya kwa Leza walyookezya akumilimo yakwe mwini, mbubonya Leza mbwaakalyookezya kumilimo yakwe.+
11 Aboobo atusoleke kusikila mpotugolela kunjila mukulyookezya ooku, kutegwa kutabi muntu naba omwe uuba aciyanza nciconya eeco cakutaswiilila.+
12 Nkaambo jwi lya Leza lilaabuumi alimwi lilaanguzu+ alimwi lilabosya kwiinda panga lili lyoonse likwengedwe koonse-koonse+ alimwi lilayasa mane kukwaandaanya buumi amuuya, akukwaandaanya manungo aazifwuwa kumooma, alimwi lilakonzya kuzyiba mizeezo amakanze aamumoyo.
13 Alimwi kunyina cilenge nociba comwe cisisidwe mumeso aakwe,+ pele zintu zyoonse zili atuba alimwi zilivwumbwidwe kumeso aayooyo ngotweelede kulyaambilila.+
14 Aboobo, mbwaanga tujisi mupaizi mupati kapati ooyo wakainda mumajulu, Jesu Mwana wa Leza,+ atujatisye kwaambilizya lusyomo lwesu mulinguwe.+
15 Nkaambo mupaizi mupati ngotujisi tali yooyo uutakonzyi kutweetelela mukubula nguzu kwesu,+ pele tujisi yooyo iwakasunkwa munzila zyoonse mbulindiswe, pele watakacita cibi.+
16 Aboobo atuswene kucuuno cabwami caluzyalo lwa Leza akwaambaula cakutayoowa,+ kutegwa tukajane luse aluzyalo lwa Leza zyakutugwasya aciindi ceelede.
