Sena Mulakasya Mafilimu, Mabbuku, naa Nyimbo Zimwi?
Peepe. Mbunga yesu tailangi-langi mafilimu, mabbuku, naa nyimbo zimwi kutegwa ibikke milawo iikasya bantu bamumbunga zyintu eezyo. Nkaambo nzi ncoitacitili boobo?
Bbaibbele likulwaizya muntu umwi aumwi kuba “amaano” aayiisyidwe kutegwa kaandaanya ciluzi acitaluzi.—Bahebulayo 5:14.
Magwalo alaamba njiisyo nzyakonzya kutobela Munakristo ciindi nasala zyintu zyakulikondelezya. a Mbubwenya mbocibede mumbazu zyoonse zyabuumi, makanze eesu ‘ngakusinizya naa ncotucita cilatambulika ku Mwami.’—Baefeso 5:10.
Bbaibbele liyiisya kuti aabo bali njemitwe yamikwasyi balilijisi nguzu, aboobo balakonzya kukasya zyakulikondelezya zimwi kubanamukwasyi wabo. (1 Bakolinto 11:3; Baefeso 6:1-4) Kunze lyamumukwasyi, kunyina uuzumizyidwe kubikka milawo yakukasya Bakamboni bamwi kujatikizya mafilimu, nyimbo, naa baimbi.—Bagalatiya 6:5.
a Mucikozyanyo, Bbaibbele lilakasya kucita zyintu zili zyoonse zisumpula kukomba mizimo, bwaamu, naa kulwana.—Deuteronomo 18:10-13; Baefeso 5:3; Bakolose 3:8.