Bakolose 3:1-25
3 Pele ikuti mwakabusyigwa antoomwe a Kristo,+ amuzumanane kuyandaula zintu zyakujulu, ooko Kristo nkwakkede kujanza lyalulyo lya Leza.+
2 Amuzumanane kubikkila maano zintu zyakujulu,+ ikutali zintu zyaanyika.+
3 Nkaambo mwakafwa alimwi buumi bwanu bwasiswa antoomwe a Kristo muli Leza.
4 Eelyo Kristo, ibuumi bwesu,+ aakuyubununwa, andinywe muyooyubununwa antoomwe anguwe mubulemu.+
5 Aboobo, amujaye zizo zyamubili wanu+ eezyo zili anyika kujatikizya zisusi mbuli bwaamu,* busofwaazi, luunyaunya,+ kunyomenena zintu zibi, alimwi abusyaacivwulemwangu kwalo kuli nkukomba mituni.
6 Akaambo kazintu eezyi bukali bwa Leza bulaboola.
7 Andinywe mbomwakali kupona* oobu musyule.*+
8 Pele lino mweelede kuzigusya zyoonse eezyi kulindinywe: bukali, kunyema, bubi,+ majwi aakusampaula,+ alimwi kutazwi majwi aacisapi+ kumulomo wanu.
9 Mutacengani pe.+ Amubusamunune buntu bwanu bwakaindi+ amicito yambubo,
10 akulisamika buntu bupya,+ oobo bubukulusyigwa lyoonse kwiinda muluzyibo lwini-lwini kutegwa bukozyanye acinkozya cayooyo wakabulenga.+
11 Aawa kunyina mu Giriki, naba mu Juda, nobuba bupalule naa kutapalulwa, muzwamasi, mu Sikuti,* muzike naa muntu waangulukide; pele Kristo ngozintu zyoonse alimwi uli muli boonse.+
12 Aboobo, mbomuli bantu ba Leza basalidwe,+ basalala alimwi bayandwa, amulisamike luyando lwamoyo walubomba,+ luzyalo, kulicesya,+ kubomba moyo+ alimwi akukkazika moyo.+
13 Amuzumanane kweengelelana akulekelelana camoyo woonse+ nokuba kuti umwi kajisi kaambo kakutongooka mweenzinyina.+ Mbubonya Jehova* mbwaakamulekelela camoyo woonse, andinywe mweelede kucita mbubonya oobo.+
14 Pele kunze lyazintu zyoonse eezyi, amulisamike luyando,+ nkaambo ncecaanzyo calukamantano cilondokede.+
15 Alimwi amulekele luumuno lwa Kristo lweendelezye mumyoyo yanu,+ nkaambo kayi, mwakaitwa kuluumuno oolu kuti mube mubili omwe. Aboobo amutondezye kuti mulalumba.
16 Amulekele ijwi lya Kristo kuti livwule mulindinywe mubusongo boonse. Amuzumanane kuyiisyanya akukulwaizyanya* antembauzyo,+ nyimbo zyakulumba Leza, nyimbo zyakumuuya ziimbwa cakulumba,* ikwiimbila Jehova*+ mumyoyo yanu.
17 Kufwumbwa ncomucita mube mukukanana naa mumilimo, amuzicite zyoonse muzina lya Mwami Jesu, kamulumba Leza Taata kwiinda mulinguwe.+
18 Nywebo nobakaintu, amulibombye kubalumi banu,+ mbwaanga eeci ncibotu mu Mwami.
19 Nywebo nobalumi, amuzumanane kubayanda bakaintu banu+ alimwi mutanoobanyemeni cakuzwa munzila.*+
20 Nywebo nobana, amubamvwide bazyali banu muzintu zyoonse,+ nkaambo eeci cilakkomanisya mu Mwami.
21 Nywebo nomausyi, mutanoobanyemyi bana banu,+ kutegwa batatyompwi.*
22 Nywebo nobazike, amubamvwide basimalelaanu baanyika+ muzintu zyoonse, ikutali buyo leelyo nobamulangilila, kamuli basikukkomanisya buyo bantu, pele amucite oobo camoyo woonse akuyoowa Jehova.*
23 Kufwumbwa ncomucita, amucicite camoyo woonse mbuli kuti mubelekela Jehova,*+ ikutali bantu pe,
24 nkaambo mulizyi kuti nkuuli Jehova* nkomuyootambula lukono kaluli bulumbu bwanu.+ Amulitakate kubelekela Simalelaanu, Kristo.
25 Masimpe, ooyo uubisya uyoolumbulwa kucibi ncaakacita,+ nkaambo Leza tasalululi pe.+
Bupanduluzi buyungizyidwe
^ Naa “koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
^ Naa “kweenda.”
^ Naa “nomwakali kupona boobo kaindi.”
^ Izina lyakuti “Sikuti” lyakali kubelesyegwa kwaamba “bantu babuyo batayiide, bazilikooko.”
^ Amubone Makani Aayungizyidwe A5.
^ Naa “akulayana.”
^ Naa “cakukondwa.”
^ Amubone Makani Aayungizyidwe A5.
^ Naa “mutanoobacitili calunya pe.”
^ Naa “batalendi moyo.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
