1 Bakorinto 11:1-34
11 Amwiiye ndime mbubonya andime mbondiiya Kristo.+
2 Ndilamulumbaizya nkaambo mulandiyeeya muzintu zyoonse alimwi mulazitobelesya zilengwa mbubonya mbondakamwaambila nzizyo.
3 Pele ndiyanda kuti muzyibe kuti mutwe wamwaalumi uuli woonse ngu Kristo+ awalo mutwe wamukaintu mwaalumi;+ mpoonya mutwe wa Kristo ngu Leza.+
4 Kufwumbwa mwaalumi uupaila naa uusinsima kalivwumbide kumutwe uusya mutwe wakwe nsoni;
5 pele kufwumbwa mukaintu uupaila naa uusinsima+ katalivwumbide kumutwe uusya mutwe wakwe nsoni, nkaambo ncimwi buyo amukaintu uugeledwe munkulu.
6 Nkaambo ikuti mukaintu katalivwumbi kumutwe, nkokuti agelwe; pele ikuti kacuusya nsoni kumukaintu kugelwa naa kukululwa, alivwumbe.
7 Mwaalumi teelede kulivwumba kumutwe, nkaambo walo ncikozyanyo+ alimwi mbulemu bwa Leza, pele mukaintu mbulemu bwamwaalumi.
8 Nkaambo mwaalumi tanaakazwa kumukaintu pe, pele mukaintu nguwakazwa kumwaalumi.+
9 Kunze lyaboobo, mwaalumi tanaakalengelwa mukaintu pe, pele mukaintu nguwakalengelwa mwaalumi.+
10 Nkakaambo kaako mukaintu weelede kuba acitondezyo cakulibombya kumutwe wakwe akaambo kabangelo.+
11 Kunze lyaboobo, mu Mwami, mukaintu takonzyi kubako kuti kakunyina mwaalumi awalo mwaalumi takonzyi kubako kuti kakunyina mukaintu.
12 Nkaambo mbubonya mukaintu mbwaakazwa kumwaalumi,+ awalo mwaalumi nkwali kwiinda mumukaintu; pele zintu zyoonse zizwa kuli Leza.+
13 Amulikoswede makani nobeni: Sena cileelela kuti mukaintu apaile kuli Leza katalivwumbide kumutwe?
14 Sena bukkale bwini tabumuyiisyi kuti cileta masampu kumwaalumi kuti kajisi masusu malamfwu,
15 pele ikuti mukaintu kajisi masusu malamfwu, mbulemu kulinguwe? Nkaambo upedwe masusu muciindi cacitambala.
16 Pele ikuti muntu umwi kayanda kukazya kwiinda mukutobela ciyanza cimbi, swebo tunyina ciyanza cimbi pe noziba mbungano zya Leza.
17 Pele kumakani aaya ngondimulailila, tandimulumbaizyi buya pe nkaambo mwaswaangana antoomwe tamuswaanganini kucita zibotu pe, pele muswaanganina kucita zibi.
18 Nkaambo amubone, nomuswaangana antoomwe mumbungano, ndimvwa kuti kuli kwaandaana akati kanu; alimwi munzila imwi ndilasyoma kuti makani aaya ngamasimpe.
19 Nkaambo kuleelede kuba tukamu twabantu bazandukide akati kanu,+ kutegwa aabo mbakkomanina Leza abalo balibonye.
20 Ciindi nomuswaangana mubusena bomwe, mubwini tamuswaanganini kuti mulye Mulalilo wa Mwami.+
21 Nkaambo nomucita oobo, aumwi usaanguna kulya cilalilo cakwe mwini, cakuti kujanika kuti umwi ufwide nzala alimwi umbi ulikoledwe.
22 Sena tamujisi maanda momukonzya kulida akunywida? Naa sena musampaula mbungano ya Leza akubausya nsoni aabo banyina ncobajisi? Ino ndimwaambile nzi? Sena ndimulumbaizye? Kumakani aaya nsikoomulumbaizya pe.
23 Nkaambo ndakatambula kuzwa ku Mwami eeco andime ncindakamuyiisya, kuti Mwami Jesu busiku+ mbwaakali kuyakwaabwa wakabweza mukamu,
24 eelyo naakamana kulumba wakaukomauna akwaamba kuti: “Eeci ciiminina mubili wangu+ uupegwa akaambo kandinywe. Kamucita oobu lyoonse kutegwa kamundiyeeya.”+
25 Wakacita mbubonya oobo kujatikizya nkapu,+ nobakamana kulya cilalilo, ulaamba: “Inkapu eeyi yiiminina cizuminano cipya+ iciyeeme abulowa bwangu.+ Amuzumanane kucita oobu, kufwumbwa leelyo nomunywa nkapu eeyi, ikundiyeeya.”+
26 Nkaambo kufwumbwa nomulya mukamu ooyu akunywa nkapu eeyi, mulazumanana kwaambilizya lufwu lwa Mwami, kusikila akaboole.
27 Aboobo kufwumbwa uulya mukamu naa kunywa nkapu ya Mwami munzila iteelede unooli amulandu kujatikizya mubili alimwi abulowa bwa Mwami.
28 Muntu asaangune kulilingula abone naa uleelela,+ mpoonya natiilye mukamu alimwi akunywa nkapu.
29 Nkaambo ooyo uulya akunywa katazyi ncowiiminina mubili nkokuti uliletela lubeta kwiinda mukulya akunywa.
30 Nkakaambo kaako ibanji akati kanu tabajisi nguzu alimwi balicisidwe, alimwi ibamwi baloona mulufwu.*+
31 Pele ikuti twalilingula akubona naa tuleelela, tatukonzyi kubetekwa pe.
32 Nokuba boobo, notubetekwa, tulalulamikwa a Jehova,*+ kutegwa tutapegwi mulandu antoomwe anyika eeyi.+
33 Aboobo, bakwesu, nomuswaangana antoomwe kuti mulye mulalilo, amulindilane.
34 Ikuti umwi kafwide nzala, alye kuŋanda yakwe, kutegwa nomuswaangana antoomwe mutabetekwi.+ Pele kujatikizya makani aasyaala ndiyakwaalanganya ndaakuboola ooko.
