Naʻe fakamoʻui ʻe Sīsū ʻa e faʻahinga mateaki ʻo e tangatá ʻi he taimi naʻá ne foaki ai ʻene moʻuí ko ha feilaulau huhuʻí. (Mātiu 20:28) Ko ia, ʻoku ui ʻe he Tohi Tapú ʻa Sīsū ko e “Fakamoʻui ʻo e māmaní.” (1 Sione 4:​14) ʻOku toe pehē ai: “ʻOku ʻikai ha fakamoʻui ʻi ha toe taha kehe, he ʻoku ʻikai mo ha toe hingoa ʻi he lalo langí kuo tuku mai ki he haʻohaʻonga ʻo e tangatá ʻa ia kuo pau ke tau maʻu ai ʻa e moʻuí.”​—Ngāue 4:​12.

 Ko Sīsū naʻá ne ‘pekia maʻá e tokotaha kotoa pē’ ʻokú ne ngāueʻi ʻene tui kiate iá. (Hepelū 2:9; Sione 3:​16) Hili iá, “naʻe fokotuʻu hake ia ʻe he ʻOtuá mei he maté,” pea naʻe foki hake ʻa Sīsū ki hēvani ko ha meʻamoʻui laumālie. (Ngāue 3:​15) Ko ia ai, ʻoku malava ʻe Sīsū “ke fakahaofi fakaʻaufuli ʻa e faʻahinga ʻoku fakaofiofi ki he ʻOtuá fakafou ʻiate iá, koeʻuhí he ʻokú ne moʻui maʻu pē ke tautapa maʻanautolu.”​—Hepelū 7:​25.

Ko e hā ʻoku tau fiemaʻu ai ʻa Sīsū ke tautapa maʻa kitautolú?

 ʻOku tau angahalaʻia kotoa pē. (Loma 3:​23) ʻOku fokotuʻu ʻe he angahalá ha ʻā vahevahe ʻiate kitautolu mo e ʻOtuá, pea ʻoku taki atu ia ki he mate. (Loma 6:​23) Ka naʻe hoko ʻa Sīsū ko ha “tokotaha taukapo” ki he faʻahinga ʻoku nau ngāueʻi ʻa e tui ki heʻene feilaulau huhuʻí. (1 Sione 2:1, fakamatala ʻi lalo) ʻOkú ne taukapo maʻa kinautolu, ʻo kole ki he ʻOtuá ke fanongo ki heʻenau ngaahi lotú pea fakamolemoleʻi ʻenau ngaahi angahalá ʻo makatuʻunga ʻi heʻene feilaulau huhuʻí. (Mātiu 1:​21; Loma 8:​34) ʻOku tali ʻe Sihova ʻa e tautapa ʻoku fai ʻe Sīsuú koeʻuhí ʻoku fehoanaki ia mo Hono finangaló. Naʻe fekau hifo ʻe he ʻOtuá ʻa Sīsū ki he māmaní “ke fakahaofi ʻa e māmaní fakafou ʻiate ia.”​—Sione 3:​17.

ʻE fakahaofi kitautolu ʻe heʻetau tui pē kia Sīsuú?

 ʻIkai. Neongo kuo pau ke tau tui kia Sīsū ke maʻu ʻa e fakamoʻuí, ka ʻoku toe fiemaʻu ha meʻa lahi ange. (Ngāue 16:30, 31) ʻOku pehē ʻi he Tohi Tapú: “Hangē pē ko e mate ʻa e sinó ʻi he ʻikai ha laumālié, ʻoku pehē pē ʻa e mate ʻa e tuí ʻi he ʻikai ha ngāué.” (Sēmisi 2:​26) Ke fakahaofí, kuo pau ke tau:

•   Ako fekauʻaki mo Sīsū pea mo ʻene Tamaí, ʻa Sihova.​—Sione 17:3.

•   Fakatupulekina ʻa e tui kiate kinaua.​—Sione 12:44; 14:1.

•   Fakahāhā ʻetau tuí ʻaki ʻa e talangofua ki heʻena ngaahi fekaú. (Luke 6:​46; 1 Sione 2:​17) Naʻe akoʻi ʻe Sīsū ʻe ʻikai ke fakahaofi ʻa e tokotaha kotoa pē ʻoku ui kiate ia “ʻEiki” ka ko kinautolu pē ʻoku nau “fai ʻa e finangalo ʻo [ʻene] Tamai ʻoku ʻi hēvaní.”​—Mātiu 7:​21.

•   Hokohoko atu hono fakahāhā ʻetau tuí neongo ʻa e ngaahi faingataʻá. Naʻe fakahaaʻi mahino ia ʻe Sīsū ʻi heʻene pehē: “Ko e tokotaha kuó ne kātaki ʻo aʻu ki he ngataʻangá ʻe fakahaofi.”​—Mātiu 24:13.