Oo. Noong nasa lupa si Jesus, tinupad niya ang maraming hula tungkol sa “Mesiyas na Lider,” na magiging “Tagapagligtas ng sanlibutan.” (Daniel 9:25; 1 Juan 4:14) At kahit pagkamatay niya, patuloy na tinupad ni Jesus ang mga hula tungkol sa Mesiyas.—Awit 110:1; Gawa 2:34-36.

•  Ano ang ibig sabihin ng “Mesiyas”?

•  Posible bang hindi lang isang tao ang tutupad sa mga hula tungkol sa Mesiyas?

•  Lilitaw ba ang Mesiyas sa hinaharap?

•  Ilang hula tungkol sa Mesiyas ang nakaulat sa Bibliya?

•  Mga hula tungkol sa Mesiyas na natupad kay Jesus

 Ang terminong Hebreo na Ma·shiʹach (Mesiyas) at ang katumbas na salitang Griego na Khri·stos (Kristo) ay parehong nangangahulugang “Pinahiran.” Kaya naman, ang “Jesu-Kristo” ay nangangahulugang “Jesus na Pinahiran,” o “Jesus na Mesiyas.”

 Noong panahon ng Bibliya, kapag ang isang tao ay hinirang sa isang pantanging posisyon ng awtoridad, pinapahiran siya sa pamamagitan ng pagbubuhos ng langis sa kaniyang ulo. (Levitico 8:12; 1 Samuel 16:13) Hinirang ng Diyos si Jesus bilang Mesiyas—isang napakataas na posisyon ng awtoridad. (Gawa 2:36) Pero sa halip na langis, pinahiran ng Diyos si Jesus sa pamamagitan ng banal na espiritu.—Mateo 3:16.

 Hindi. Kung paanong ang fingerprint ay pagkakakilanlan ng iisang tao, ang katuparan ng mga hula sa Bibliya ay tumutukoy lang sa iisang Mesiyas, o Kristo. Pero nagbababala ang Bibliya na “ang mga bulaang Kristo at ang mga bulaang propeta ay babangon at magbibigay ng mga dakilang tanda at mga kababalaghan upang iligaw, kung maaari, maging ang mga pinili.”—Mateo 24:24

 Hindi. Inihula ng Bibliya na ang Mesiyas ay manggagaling sa angkan ni Haring David ng Israel. (Awit 89:3, 4) Pero wala na ang mga rekord ng talaangkanan ng mga Judio mula noong panahon ni David. Lumilitaw na nasira ang mga ito nang sakupin ng mga Romano ang Jerusalem noong 70 C.E. a Dahil diyan, imposible nang mapatunayan ng sinumang nag-aangkin na nagmula siya sa maharlikang pamilya ni David. Sa kabaligtaran, kahit mayroon pang mga rekord ng talaangkanan noong panahon ni Jesus, hindi mapabulaanan ng mga kaaway niya na siya ay nagmula sa angkan ni David.—Mateo 22:41-46.

 Imposibleng matukoy ang eksaktong bilang ng mga hula tungkol sa Mesiyas. Halimbawa, puwedeng magkakaiba ang paraan ng pagbilang sa mga hula na malinaw na tumutukoy sa Mesiyas. Ang ulat sa Isaias 53:2-7 ay bumabanggit ng ilang makahulang paglalarawan tungkol sa Mesiyas. Puwedeng bilangin ng iba ang buong ulat na ito bilang iisang hula; baka ituring naman ito ng iba bilang magkakahiwalay na hula.