Livru Apokalipse signifika saida?
Bíblia nia resposta
Livru Apokalipse nia títulu mai husi liafuan Gregu Apokalypsis (apokalipse) neʼebé signifika “nakloke” ka “fó sai”. Livru neʼe nia naran hatudu ho klaru kona-ba livru neʼe. Livru Apokalipse fó sai kona-ba buat sira neʼebé subar hela no mós fó sai nanis kona-ba akontesimentu sira neʼebé sei akontese iha futuru. Iha profesia barak iha livru Apokalipse neʼebé seidauk sai loos.
Informasaun iha livru Apokalipse
Introdusaun.—Apokalipse 1:1-9.
Jesus nia mensajen ba kongregasaun hitu.—Apokalipse 1:10–3:22.
Vizaun kona-ba Maromak neʼebé tuur iha ninia kadunan iha lalehan.—Apokalipse 4:1-11.
Vizaun sira neʼebé tuituir malu no liga malu:
Selus hitu.—Apokalipse 5:1–8:6.
Trombeta hitu, no trombeta tolu ikus fó sai susar boot tolu.—Apokalipse 8:7–14:20.
Manko hitu, manko ida-idak iha susar boot no neʼe reprezenta Maromak nia tesi-lia ba mundu.—Apokalipse 15:1–16:21.
Vizaun sira kona-ba Maromak nia inimigu sei lakon.—Apokalipse 17:1–20:10.
Vizaun kona-ba bensaun neʼebé Maromak haraik ba lalehan no rai.—Apokalipse 20:11–22:5.
Konkluzaun.—Apokalipse 22:6-21.
Sujestaun atu bele komprende livru Apokalipse
Livru neʼe nia signifikadu mak pozitivu, no ema neʼebé serbí Maromak la presiza sente taʼuk. Bainhira ema barak rona liafuan “apokalipse” sira hanoin kona-ba dezastre boot neʼebé atu mosu. Maski nuneʼe, livru Apokalipse hahú no remata ho liafuan neʼebé hatete katak ema neʼebé lee, komprende no halo tuir liafuan iha livru neʼe sei kontente.—Apokalipse 1:3; 22:7.
Livru Apokalipse uza “sinál” ka símbolu barak no presiza komprende buat sira-neʼe iha dalan simbóliku.—Apokalipse 1:1.
Naran barak no símbolu barak neʼebé temi iha livru Apokalipse temi ona iha parte seluk iha Bíblia laran:
Jeová mak “Maromak loos iha lalehan” no Kriadór ba buat hotu.—Deuteronómio 4:39; Salmo 103:19; Apokalipse 4:11; 15:3.
Jesus Kristu mak “Maromak nia Bibi-Oan”.—João 1:29; Apokalipse 5:6; 14:1.
Diabu Satanás mak Maromak nia inimigu.—Génesis 3:14, 15; João 8:44; Apokalipse 12:9.
Babilónia Boot mak Maromak Jeová no ninia povu nia inimigu no hun ba lia-bosok oioin hanesan ho Babilónia (Babel) antigu.—Génesis 11:2-9; Isaias 13:1, 11; Apokalipse 17:4-6; 18:4, 20.
“Tasi” mak ema aat neʼebé kontra Maromak.—Isaias 57:20; Apokalipse 13:1; 21:1.
Sasán no serbisu neʼebé uluk ema halo kuandu adora Maromak iha tenda santu, hanesan arka aliansa, tasi neʼebé haree hanesan vidru (basia neʼebé uza atu fase liman no ain), ahi-oan, sunu insensu, no altár atu halo sakrifísiu.—Éxodo 25:10, 17, 18; 40:24-32; Apokalipse 4:5, 6; 5:8; 8:3; 11:19.
Animál fuik oioin neʼebé reprezenta ema nia governu sira.—Daniel 7:1-8, 17-26; Apokalipse 13:2, 11; 17:3.
Númeru sira neʼebé uza iha dalan simbóliku.—Apokalipse 1:20; 8:13; 13:18; 21:16.
Vizaun sira kona-ba buat neʼebé sei akontese durante “Naʼi nia loron”, neʼebé hahú bainhira Maromak nia Ukun harii iha tinan 1914 no Jesus komesa ukun nuʼudar Liurai. (Apokalipse 1:10) Tan neʼe ita bele fiar katak profesia barak iha livru Apokalipse sei sai loos durante ita-nia tempu.
Atu bele komprende livru Apokalipse, ita presiza buat neʼebé ajuda ita atu komprende informasaun seluk iha Bíblia, neʼe mak matenek husi Maromak no ajuda husi ema seluk neʼebé komprende ona informasaun neʼe.—Apóstolu 8:26-39; Tiago 1:5.