Haʼu bele hetan kmaan husi Bíblia nia liafuan ka lae?
Bíblia nia resposta
Sin. (Roma 15:4) Hanoin toʼok eskritura balu husi Bíblia neʼebé ajuda ona ema barak neʼebé hasoru susar no sente estrese.
Iha informasaun neʼe
Hasoru problema boot
Salmo 23:4: “Maski haʼu laʼo iha foho-leet neʼebé nakukun tebes, haʼu la taʼuk kona-ba perigu sira, tanba Ita hamutuk ho haʼu.”
Neʼe katak: Kuandu Ita halo orasaun ba Maromak no buka matadalan husi ninia Liafuan Bíblia, Ita bele tahan hasoru problema ho aten-brani.
Filipe 4:13: “Iha situasaun hotu haʼu hetan forsa liuhusi nia neʼebé fó kbiit mai haʼu.”
Neʼe katak: Maromak bele fó forsa ba Ita atu tahan hasoru problema naran deʼit.
Ema neʼebé Ita hadomi mate
Eclesiastes 9:10: “La iha serbisu ka planu ka koñesimentu ka matenek iha rate.”
Neʼe katak: Ema neʼebé mate ona la sente terus ida, no sira labele halo buat ida atu fó susar ba ita. Sira la sente buat ida.
Apóstolu 24:15: “Maromak sei fó moris-hiʼas.”
Neʼe katak: Maromak bele fó moris-hiʼas ba ita-nia belun ka família neʼebé mate ona.
Fó sala demais ba Ita-nia an
Salmo 86:5: “Tanba Ita, oh Jeová, a Ita mak diʼak no prontu atu fó perdua; Ita nakonu ho domin neʼebé laran-metin ba ema hotu neʼebé bolu Ita.”
Neʼe katak: Maromak fó perdua ba ema neʼebé arrepende an kona-ba sira-nia sala no deside metin atu la repete tan.
Salmo 103:12: “Hanesan lorosaʼe dook husi loromonu, nuneʼe mós nia tau ita-nia sala sira dook loos husi ita.”
Neʼe katak: Bainhira Maromak fó perdua ona, nia la temi tan sala sira-neʼe hodi duun ita ka fó kastigu ba ita, neʼe hanesan nia soe ita-nia sala ba fatin dook liu.
Sente triste
Salmo 31:7: “Ita haree ona haʼu-nia terus; Ita hatene didiʼak haʼu-nia susar boot sira.”
Neʼe katak: Maromak hatene Ita-nia susar hotu. Nia komprende Ita-nia sentimentu hotu maski ema seluk la hatene.
Salmo 34:18: “Jeová besik ema sira neʼebé laran-kanek; Nia salva sira neʼebé laran-triste.”
Neʼe katak: Maromak promete katak nia sei apoia Ita kuandu Ita sente triste. Nia bele fó Ita kbiit atu tahan Ita-nia terus.
Moras
Salmo 41:3: “Jeová sei tau matan ba nia durante nia moras.”
Neʼe katak: Maromak bele ajuda Ita atu tahan hasoru moras neʼebé sériu hodi fó Ita dame, forsa, pasiénsia, no matenek atu bele foti desizaun diʼak.
Isaias 33:24: “La iha ema ida iha rai mak sei dehan: ‘Haʼu moras.’”
Neʼe katak: Maromak promete kona-ba tempu neʼebé ema hotu sei iha saúde diʼak.
Estrese no laran-susar
Salmo 94:19: “Bainhira haʼu laran-taridu tebes, Ita fó kmaan ba haʼu no halo haʼu kontente.”
Neʼe katak: Se ita husu Maromak nia ajuda kuandu ita sente estrese, nia bele ajuda ita atu kalma nafatin.
1 Pedro 5:7: “Entrega imi-nia laran-susar hotu ba nia, tanba nia hanoin imi.”
Neʼe katak: Maromak hanoin ita no hatene susar neʼebé ita hasoru. Nia konvida ita atu halo orasaun hodi fó sai ita-nia laran-susar.
Funu
Salmo 46:9: “Nia sei hapara funu sira iha mundu tomak.”
Neʼe katak: Maromak nia Ukun sei halakon funu hotu.
Salmo 37:11, 29: “Ema laran-maus sei simu rai nuʼudar sira-nian, no sira sei hetan ksolok boot ho dame neʼebé barak. . . . Ema laran-loos sira sei simu rai nuʼudar sira-nian, no sira sei moris ba nafatin iha rai.”
Neʼe katak: Ema diʼak sei moris haksolok ba nafatin iha rai neʼebé nakonu ho dame.
Hanoin barak kona-ba futuru
Jeremias 29:11: “Jeová dehan: ‘Haʼu hatene didiʼak buat neʼebé haʼu hakarak ba imi, haʼu hakarak fó imi dame, laʼós fó-terus, no haʼu hakarak fó imi futuru kapás no esperansa.’”
Neʼe katak: Maromak promete futuru kapás ba ninia povu.
Apokalipse 21:4: “Nia sei hamaran sira-nia matan-been hotu husi sira-nia matan, mate la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”
Neʼe katak: Maromak promete atu halakon buat aat hotu neʼebé Ita haree no hasoru ohin loron.
a Jeová mak Maromak nia naran. (Salmo 83:18) Haree informasaun “Sé mak Jeová?”
Karik Ita sei gosta
LIVRU HAKLAKEN
Tanba Maromak hanoin ita, neʼe lori benefísiu saida?
Eskritura sira bele ajuda hametin ita-nia fiar ba Jeová nia promesa kona-ba futuru.
PERGUNTA KONA-BA BÍBLIA
Haʼu bele hetan esperansa husi neʼebé?
Bíblia bele ajuda ita atu moris kontente agora no tau fiar ba futuru neʼebé kapás.
TÓPIKU SELUK TAN
Liafuan konsola ba ema neʼebé triste tanba família ka belun mate
Kuandu ema neʼebé ita hadomi mate, karik ita bele sente katak la iha ida mak komprende ita-nia sentimentu triste. Maibé Maromak komprende, no nia bele ajuda ita.
LIVRU HAKLAKEN
Bainhira moris susar demais atu tahan
Moris iha folin nafatin maski hasoru susar oioin.
HANORIN IMPORTANTE SIRA HUSI BÍBLIA
Tanbasá mak Maromak husik terus akontese?
Bíblia nia resposta bele halo ita sente kontente no kmaan.
BÍBLIA NIA HANORIN
Koko ami-nia kursu Bíblia
Hahú kursu Bíblia ho gratuitu hamutuk ho Testemuña ida.