LiBhayibheli lifundzisa kutsi kutfukutsela kakhulu kungamlimata umuntfu lotfukutsele kanye nalabo labatfukutselele. (Taga 29:22) Nanobe ngaletinye tikhatsi kungase kube nesizatfu sekutfukutsela, liBhayibheli litsi labo ‘labanentfukutselo lengalawuleki’ ngeke basindziswe. (Galathiya 5:19-21) LiBhayibheli linetimiso letingasita umuntfu lonenkinga yekutfukutsela.

•  Kubi sanhlobo yini kutfukutsela?

•  Kunini lapho kukubi khona kutfukutsela?

•  Yini longayenta nawufikelwa kutfukutsela?

•  Emavesi eliBhayibheli lakhuluma ngekutfukutsela

 Cha. Kungase kufaneleke kutfukutsela kuletinye timo. Nasi sibonelo, Nehemiya indvodza lebeyitsembekile ‘yatfukutsela yabila’ ngesikhatsi iva kutsi labanye lebekakhonta nabo Nkulunkulu bebahlushwa.—Nehemiya 5:6.

 Ngaletinye tikhatsi naNkulunkulu uyatfukutsela. Nasi sibonelo saloko: Ngesikhatsi bantfu bakhe basendvulo bephula sivumelwano sabo sekukhonta yena kuphela futsi sebacala kukhonta bonkulunkulu bemanga, “intfukutselo yaSimakadze yabavutsela.” (Tikhulu 2:13, 14) Nome kunjalo, intfukutselo ayisibo buntfu baNkulunkulu Jehova lobugcamile. Ngaso sonkhe sikhatsi utfukutsela nakunesizatfu futsi uyakhona kutibamba.—Eksodusi 34:6; Isaya 48:9.

 Intfukutselo yimbi nangabe kute sizatfu sekutfukutsela futsi ingalawuleki, lokuyintfo levamile kubantfu labanesono. Nati tibonelo taloko:

•   Khayini “watfukutsela kakhulu” ngesikhatsi Nkulunkulu angawunaki umnikelo wakhe. Watfukutsela kakhulu kangangekutsi waze wabulala umnakabo.—Genesisi 4:3-8.

•   Umphrofethi Jona “watfukutsela kakhulu” ngesikhatsi Nkulunkulu ahawukela bantfu baseNineve. Nkulunkulu wakulungisa kucabanga kwaJona, wambonisa kutsi bekete ‘lilungelo lekutfukutsela’ nekutsi bekufanele abavele labo bantfu labaphendvukile.—Jona 3:⁠10–4:1, 4, 11. a

 Letibonelo tikhombisa kutsi “intfukutselo yemuntfu ayikuletsi kulunga kwaNkulunkulu.”—Jakobe 1:20.

•   Cabanga ngengoti lengabakhona nawunentfukutselo lengalawuleki. Labanye bangase bacabange kutsi kukhombisa kutsi batfukutsele kangakanani, kuluphawu lwekutsi banemandla. Nase kukhulunywa liciniso, umuntfu lowehluleka kubamba intfukutselo yakhe unenkinga lenkhulu yekuba butsakatsaka. LiBhayibheli litsi: “Umuntfu lowehluleka kutibamba ufanana nelidolobha lelibhidlikelwe tindvonga talo.” (Taga 25:28; 29:11) Ngakulolunye luhlangotsi, nangabe senta imetamo yekutibamba nasitfukutsela, sisuke sikhombisa emandla mbamba kanye nelikhono lekwehlukanisa emkhatsini walokuhle nalokubi. (Taga 14:29) LiBhayibheli litsi: “Kuncono kuba ngumuntfu lobeketelako kunekuba silwi.”—Taga 16:32.

•   Lwisana nentfukutselo usengakenti intfo lotawutisola ngayo kamuva. Tihlabelelo 37:8 titsi: “Tibambe ungatfukutseli, uluyekele lulaka, ungacansuki, ngobe loko kubanga kona.” Naka kutsi nangabe sitfukutsele, sinalo lilungelo lekutikhetsela—singakhetsa kutibamba ‘sisengakoni.’ Efesu 4:26 utsi, “tfukutselani, kodvwa ningoni.”

•   Nakungenteka, khwesha ngekushesha kuleso simo usengakacali kutfukutsela. LiBhayibheli litsi, “Kususa incabano kufanana nekubhobosa imbobo emantini lavalelwe; kufanele ivalwe lembobo emanti asengakayandzisi.” (Taga 17:14) Nanobe kukuhlakanipha kulungisa kungevani kwenu ngekushesha, kungenteka wena naloyo lenicabane naye kudzingeke nehlise umoya kucala kuze nitokhulumisana ngekuthula.

•    Tfola emaciniso endzaba. Taga 19:11 titsi, “Umuntfu lonekucondza uyakubamba kutfukutsela kwakhe.” Sisuke sihlakaniphile nangabe sicale safuna emaciniso onkhe ngendzaba ngaphambi kwekufinyelela esiphetfweni. Nangabe silalelisisa kahle tonkhe tinhlangotsi taleyondzaba, mancane ematfuba ekutsi sitfukutsele ngalokute sidzingo.—Jakobe 1:19.

•    Thantazela kuthula kwengcondvo. Umthantazo ungakusita ube nekuthula “kwaNkulunkulu lokwendlula konkhe kucondza.” (Filiphi 4:7) Umthantazo ungulenye yetindlela letibalulekile yekutfola umoya longcwele waNkulunkulu, longasenta sibe netimfanelo letifaka ekhatsi kuthula, kubeketela, kanye nekutibamba.—Lukha 11:13; Galathiya 5:22, 23.

•   Khetsa bangani ngekuhlakanipha. Ngalokuvamile siyaye silingise bantfu lesitihlanganisa nabo nasenta tintfo. (Taga 13:20; 1 Khorinte 15:33) Kungako kufaneleka kahle kutsi liBhayibheli liseluleke litsi: “Ungabi ngumngani wemuntfu lonenhlitiyo lencane, ungabi nebudlelwane nemuntfu losheshe acansuke.” Leni? Lichubeka litsi, “Nawuba ngumngani wakhe, ungahle ufundze imikhuba yakhe, loko kube lugibe emphilweni yakho yonkhe.”—Taga 22:24, 25.